ཉེ་བའི་ལོ་ཤས་རིང་དང་། ལྷག་པར་དུ་ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན་དུ། རང་ལྗོངས་ཀྱི་སྤྱི་ཚོགས་དཔལ་འབྱོར་དང་། མི་དམངས་མང་ཚོགས་ཀྱི་འཚོ་བར་གནམ་ས་བླ་འོག་ཏུ་འགྱུར་བ་ལྟ་བུའི་འགྱུར་ལྡོག་བྱུང་དང་འབྱུང་བཞིན་ཡོད་པས། མི་དམངས་མང་ཚོགས་ཀྱི་ཐོབ་སྣང་དང་། སྐྱིད་སྣང་། བདེ་སྣང་བཅས་ཇེ་ཆེར་འཕེལ་བཞིན་ཡོད་ལ། ཁོང་ཚོས་མཛེས་སྡུག་ལྡན་པའི་འཚོ་བར་བཅངས་པའི་དགའ་ཞེན་དང་རེ་བའང་ཇེ་ཆེར་འགྲོ་བཞིན་ཡོད།
ལོ་ལྟར་ལོ་གསར་འཆར་ཉེའི་མཚམས་སུ། ལྷ་སའི་ཁྲོམ་གཞུང་དུ་མི་ཚོགས་ཀྱི་འདུ་ལོང་རབ་ཏུ་རྒོད་ཅིང་། ལོ་གསར་གྱི་མཁོ་ཆས་ཉོ་ཚོང་བྱེད་མཁན་གྱིས་འཚང་ག་ཤིག་ཤིག་བྱེད། བོད་ཀྱི་མང་ཚོགས་ཀྱི་ངོས་ནས་བརྗོད་ན། ལོ་གསར་ནི་ལོ་གཅིག་དུས་གཅིག་གི་དུས་ཆེན་གྲ་རྒྱས་ཤོས་དེ་ཡིན་ལ། ཆེས་སོས་དལ་བག་ཕེབས་དང་སྣང་བ་སྐྱིད་ཤོས་ཀྱི་དུས་ཚོད་ཤིག་ཀྱང་རེད། ལྷ་སའི་ཁྲོམ་གཞུང་ཁག་ཏུ་སྐྱོད་སྐབས། གྲལ་བསྟར་བསྒྲིགས་ནས་བཞག་པའི་ཕྱེ་མར་འབོ་དང་། བཟོ་ལྟ་སྣ་ཚོགས་ཀྱི་སྒོ་ཡོལ་དང་ཤམ་བུ། སྡེར་ཁ། དཔེ་གསར་གྱི་བོད་ཆས་སོགས་ལོ་གསར་གྱི་མཁོ་ཆས་སྣ་ཁ་ཧ་ཅང་མང་བ་དང་། འབྲི་གཡག་དང་བོད་ཕག་གི་ཤ་དང་། སྔོ་ཚལ། སྦྲང་རྩི། ཁ་ཟས་སོགས་གང་དགོས་ཅི་དགོས་འཛོམས་པས། འདི་ལས་བོད་ཀྱི་མང་ཚོགས་ཀྱི་འཚོ་བ་ཉིན་རེ་ལས་མ་འདས་པར་ཇེ་ཡག་ཇེ་སྐྱིད་དུ་ཕྱིན་པ་གསལ་པོར་རྟོགས་ལ། ལོ་གསར་གྱི་མཁོ་ཆས་ཁྲོམ་རས་མང་ཚོགས་ཀྱི་དགོས་མཁོ་གང་ལེགས་སྐོང་བཞིན་པའང་ངང་གིས་རྟོགས་ཐུབ།