【沪语】我有个上海小矮凳的故事，侬要听伐？

童年的记忆里，短腿的小小囡只能坐小矮凳上。有时坐在灶批间里帮外婆剥剥毛豆子，或者在天井里乘风凉，惬意得很！你家的小矮凳还在吗？小布期待在留言区看到关于你家小矮凳的故事哟！

    上海人日常生活当中，家生上头蒙了灰尘，用得最多个，是一只鸡毛掸子；屋里向小囡多个，传得辰光长个，还是一只小矮凳。埃个辰光，从小矮凳个数量，可以看出迭家人家小囡个多少；小矮凳个年数，也能大致反映出来迭家人家辣辣上海过日脚个年头。

    我从小用个是一只带靠背个小矮凳，辣我用个辰光，是漆成绿颜色个，弄得像幼稚园里向小朋友用个，后来漆成了蓝颜色。

    夏天介，小囡会得剥毛豆。迭个剥毛豆呢，就是坐辣小矮凳浪头个；乘风凉，小矮凳就经常要拎进拎出。小矮凳个分量勿重，正好是一个小囡个力道，落雨天，还可以顶辣头浪向逃回来。顶早晓得个鬼故事侪是坐辣小矮凳浪听来个。还有啥个四国大战啊、廿四点、通关、争上游、抽乌龟、大怪路子、钓鱼、接龙等等，几乎所有个棋牌游戏，也侪是坐辣小矮凳浪被启蒙个。

    小辰光还要参加“课外学习小组”，也叫“小小班”，就是放学以后，大家拎一只小矮凳，到一个屋里向比较大个同学屋里向去做功课。大家拎出来个小矮凳呢，也是各式各样。常见个是面子长方形个，也有圆形个，当然，下头侪有四只脚。我个靠背小矮凳呢，的确是比较考究个！

    我坐辣小矮凳浪头个姿势，永远会保持幼稚园里向头个姿势，两只手摆辣脚馒头浪。迭个已经养成习惯了。我从埃个辰光开始对自家个脚馒头记忆深刻，埃个俗称“脚馒头”个地方，是凸起来个，是老硬个，而下面个地方呢叫“脚窝窝”，搿倒是老软个。

    还有一个我经常去个地方，是跟小矮凳有关系个，就是弄堂口、过街楼下头个老皮匠摊头。迭个老皮匠摊头面前呢，永远会有几只小矮凳，是拨来修鞋子个人坐个。我老欢喜坐辣老皮匠个旁边，看伊哪能修鞋子。

    小矮凳是我童年个伙伴，伊陪我一道长大。

内容来源：上海非遗 

朗读：柳钟晔

资料：麦唐作

编辑：黄骞文