ཚུལ་བློ་དང་བསོད་དར་ལ་ཕུལ་བའི་ངོ་སྤྲོད་གཏམ་གྱི་སྒྱུ་མ།
ཚུལ་བློ་དང་བསོད་དར་ལ་ཕུལ་བའི་ངོ་སྤྲོད་གཏམ་གྱི་སྒྱུ་མ།
རྩོམ་པ་པོ། སད་མི།(ལྷ་ཐོག)
ཚུལ་བློ་མཆོག་དང་བསོད་དར་མཆོག་མཆོག་ཅེས་མཆོག་ཅེས་བཀུར་བ་ཡིས།།
དམན་པ་བདག་གི་ཁ་བཤད་འདིས་ས་ཆེན་འདི་ལ་རྐང་རྗེས་འཇོག།
རྟ་མགོ་ཅན་དང་ཟོག་མགོ་ཅན་དེང་གི་དྲྭ་འབུ་གཟའ་འབུ་ཚོ།།
ཟློག་ཅེས་ཟློག་ཅེས་བཏོན་པ་ཡིས་སྡེ་ཆེན་འདི་ནས་ཕུང་པར་ཅི།།
ན་ནིང་དང་ནི་ད་ལོ་སོགས་བོད་འདི་སྤྲང་བོ་མ་གྱུར་བ།།
ཚུལ་བློ་དང་ནི་བསོད་དར་གཉིས་དེ་ལས་གཞན་པ་སུ་ཡིས་དྲིན།།
སྡོམ་པ་དང་ནི་དམ་ཚིག་སོགས་ཡོད་མེད་གཉིས་ཀ་མ་ཤེས་ཐལ།།
གང་ལྟར་བོད་འདི་སྐྱོང་པ་པོ་ཚུལ་བློ་བསོད་དར་བཀའ་དྲིན་ཆེ།།
སྡོམ་པ་མི་འདུག་མི་བཤད་དེ་སྡང་སེམས་མེད་ནོ་ཁོ་ཐག་རེད།།
སངས་རྒྱས་མ་རེད་མི་ཟེར་ར་མི་ལས་ལྷག་ཙམ་ཡིན་ས་རེད།།
སངས་རྒྱས་སྟོང་ཕྲག་བྱོན་ན་ཡང་བོད་འདི་སྐྱོབ་མཁན་ཁྱེད་གཉིས་ཡིན།།
མཁས་པ་ཁྲི་འབུམ་འགྱིངས་ན་ཡང་བོད་འདིར་མཁས་པ་ཁྱེད་གཉིས་ཡིན།།
སྐྱ་བོའི་སྡེ་དང་ལོག་པའི་སྡེ་ཤེས་ཡོན་སྡེ་སོགས་མང་ན་ཡང་།།
བོད་ཀྱི་སྡེ་བ་དངོས་མ་སྟེ་རབ་བྱུང་སྡེ་འདི་བོད་ལ་མཁོ།།
གཞུང་ལུགས་བག་ཙམ་ཤེས་པ་དང་ཚིག་རྩོད་ཅུང་ཙམ་སྨྲས་པ་ཡིས།།
ནང་སེམས་ཁྲོ་བོ་མ་གྱུར་པ་ཞི་བར་བཞུགས་མཁན་ཁྱེད་གཉིས་ཡིན།།
ཁ་ལུད་སྣབས་ལུད་ཐོགས་པ་དང་གཡུས་སྐྱག་འབྱིད་པ་མི་ཤེས་པའི།།
སྐད་སྟོང་མགོ་སྟོང་ཁོག་སྟོང་འགས་འཕྱ་སྨོད་བྱས་པ་ཉམས་རེ་ང་།།
བསོད་ནམས་དར་རྒྱས་ཟེར་བ་འདི་སངས་རྒྱས་དང་ནི་རྣམ་མཁྱེན་དང་།།
གྲུབ་པ་ཐུབ་པ་མ་ཡིན་པས་རྩ་ཕྲན་ཙམ་གྱི་སྐྱོན་ལོས་ཡོད།།
རྣམ་ཤེས་དང་ནི་ཀླད་པ་དང་བསམ་ཤེས་ལ་སོགས་ཡོད་གྱུར་ན།།
རྒྱ་བླ་དང་ནི་མཁས་མཛངས་སོགས་ཚུལ་བློ་འདི་ཉིད་བོད་ཀྱི་རྟེན།།
དཔལ་འབྱོར་དང་ནི་མཛེས་མ་དང་ཤེས་ཡོན་དང་ནི་རིག་གནས་དང་།།
གང་འདོད་འཚོགས་པའི་ཚུལ་བློ་འདི་དེང་རབས་བོད་ཀྱི་གཞི་འཛིན་ཡིན།།
དགྲ་བོ་གང་ཡིན་མ་ཤེས་ཤིང་གྲོགས་པོ་གང་ཡིན་མ་གོ་བར།།
བསྟན་གཤེགས་སུ་ཡིན་མ་ཤེས་ཤིང་བསྟན་འཛིན་གང་ཡིན་མ་གོ་བར།།
ཧམ་བཤད་ལོག་བཤད་འབུམ་སྨྲས་ཀྱང་རང་ལ་ཕན་པའི་ཤིག་ཙམ་ཞིག།
རྒྱ་ཡུལ་བོད་ཡུལ་དབྱིན་ཡུལ་སོགས་གང་ལ་ཡོད་ན་དཀོན་མཆོག་ཨེན།།
བོད་ཀྱི་མཁས་དབང་གཡག་རྒོད་ཚོ་ཀླད་པ་སྟོང་རྐྱང་མིན་རྒྱུ་ན།།
གཡག་གི་རྭ་རྩེད་ངོམ་རན་ཐལ་གད་པའི་ནང་དུ་མ་འགྲེལ་རོགས།།
ཚོར་བ་དང་ནི་རེག་བྱ་སོགས་བདེ་སྡུག་ཡོད་པའི་ཁྱི་ལའང་།།
རང་གི་བདེ་སྡུག་ཁུར་ཆེན་དེ་རང་ནུས་གང་གིས་འགྲུབ་པར་བྱེད།།
རྟོགས་སད་དང་ནི་རིགས་སྨྲ་དང་སྙན་ངག་པ་ཡིས་བཤད་པ་དག།
ཧམ་བཤད་ཉོག་བཤད་རྐྱང་པ་ལས་ལག་ལེན་བཟོས་པ་གཅིག་ཀྱང་མེད།།
ཁ་བཤད་ཆུ་ཡི་ལྦུ་བ་དང་ལག་ལེན་གསེར་གྱི་ཐིགས་པ་ཉིད།།
དེང་གི་མཁས་པའི་ཚུགས་ཀ་ཅན་སྐྱབས་ཆེན་སོགས་ཀྱི་ཆོས་ཉིད་དོ།།
གྲྭ་ལོག་དང་ནི་ཁྲེལ་མེད་དང་གནས་ལུགས་ཤེས་དང་མི་ཤེས་གཉིས།།
གང་ལྟར་ཡི་གེ་འབྲི་ཤེས་ཙང་རྣམ་རྟོག་ཨ་ལ་པ་ལ་ཉིད།།
ཨ་བྲས་སྒོ་ནས་བལྟས་པ་བཞིན་ཏུག་སེ་ཏུག་སེ་ཐོན་པས་ན།།
སྐྱག་པར་མཛུབ་བཙུགས་བྱེེད་པ་དང་ཨོང་ཤ་ལྕེ་ཡིས་ལོས་ལྡག་ཨང་།།
པད་འབྱུང་ནམ་མཁའི་ལྷ་རུ་བརྩིས་ཡིད་བཞིན་སྙིང་གི་ཐིག་ལེར་སྒོམ།།
མ་བཅོས་འབངས་ཀྱི་དད་པ་ཉིད་ད་ནི་སུ་ཡིས་འདམ་དུ་བརྫངས།།
ཡང་ཡང་སེམས་ཀྱི་སློབ་བུ་ཉིད་སྙིང་གི་པདྨོར་འཛུམ་པར་ཀྱེ།།
བདུད་དང་སྲིན་གྱིས་མ་གོས་ཤིང་དགྲ་དང་སྡང་རྣམས་གྲོགས་སུ་སྨོན།།
2018 3 25 ཉིན་མོར།
རྩོམ་ཡིག་གིས་རྩོམ་པ་པོའི་ལྟ་བ་ལས་ངེད་ལུག་ཚང་གི་ལྟ་བ་མི་མཚོན།