地狱级广东阿妈偏方，每一款都系童年阴影！
古语有云：家有一老，如有一宝
但对于唔少广东仔女嚟讲
家有一老母，真系估佢唔到！
点解？
因为我哋阿妈真系生草药，噏得就噏
每次只要有啲咩头晕身㷫、屙呕肚痛
佢就会攞出嗰啲唔知喺边度
听返嚟嘅所谓“民间偏方”
每次我哋用充满童真嘅双眸问佢嘅时候
佢永远都系嗰句：
相信唔少人都畀自己老母整过一镬
从此之后，童年阴影再都唔系咩
黑衣人、龙婆、吸血鬼
而！系！佢！哋！
初级版
@吖鸭
阿妈每次听到我打思噎，就会同我讲连饮16啖水就冇事喇。从细到大，万试万灵！唔知有冇其他方法呢？
✎打思噎：打嗝，也可以写作打思肊、打思噎、打思嗌、打司肊。
@番瓜
细个唔识食鱼周不时啃到鱼骨，阿妈每次就喺我头顶反扣个碗用筷子敲碗底，嗰个视听感觉，仲犀利过依家5D电影！
结果当然就梗系毫无用处喇！发生呢啲事真系直接去搵医生最好喇！
@光头强
如果以形补形真系有用嘅话，我依家都唔使光头喇！
有名你叫光头强，细个阿妈成日同我讲食多啲黑芝麻，头发先会变黑，好似人哋X柔啲姐姐噉。但系我依家根本生唔出头发！
仲有话咩食葱变聪明，饮奶会生高，全部都系呃我嘅！除咗横向发展，我海拔依然保持不变！你话边个够我惨？！
@门牙
因为细个阿妈同我讲畀蚊咬起蚊赧，用十字封印佢就唔会痕。所以依家养成坏习惯，逢亲蚊赧都要封印佢。
依家大个咗就梗系知道冇鬼用喇！
▲隐藏着黑暗力量嘅蚊赧，等我嚟封印你！
✎蚊赧：蚊子叮咬后的疹块，赧读音“naan3”，音同难第5声。
上面嗰啲真系冇咩出奇
基本个个广东人嘅阿妈都噉教落
不过下面呢啲~
就真系有啲夸张
温馨提示：以下内容，请勿在进食时观看，
多谢你嘅合作
晋级版
@猛汉的男人
我知实有好多人同我一样饮过呢样嘢！！
以前边有依家咁好环境，细个咳咗成个月，屋企人以为有鬼搞我！然后叫啲师傅嚟睇，跟住饮咗三日佢哋所讲嘅开过光嘅符水，其实有冇效果，我真系唔记得，不过啲符水又真系几好饮。
严重怀疑呢位自己友仲未好返
麻烦佢嘅亲朋戚友带佢去cheak下个脑比较好
@Allen
其实夏枯草煲猪横脷，真系好正常嘅一样嘢，虽然话啲汤黑墨墨，鬼死咁冇食欲，不过眯埋眼“咕”一声吞咗佢都冇眼屎干净盲。
弊就弊在我喺煲汤度捞起成条因为熬煮而逐渐变黑嘅猪横脷！我幼小纯洁嘅心灵就噉样畀条猪横脷玷污咗喇！
✎黑墨墨：黑不溜秋。墨音“mak6”。
@瓶平
我同你哋讲，支吹双飞人、风油精都唔算犀利，我仲支吹过十滴水！呢世仔都记住佢朕味！我怀疑我真系充话费送嘅，细个流鼻血我老母仲试过滴白萝卜水入个鼻度，真系唔知佢边度听返嚟嘅偏方！简直令我生不如死！
@独孤冇剑
有阵时，有啲嘢，整定嘅。
细个感冒，唔知阿妈定系嫲嫲听埋啲唔知咩偏方，话大蕉皮煲蚝豉可以医重感冒，当你以为大蕉皮煲蚝豉系黑暗料理嘅时候，食过先知“真香”。
只要食唔死人
真系有好多广东人愿意尝试
@檐蛇守护队
大家都知细路好容易有百日咳喇。
而我伟大嘅母上大人，就试过逼我饮檐蛇煲水。你冇试过，永远唔会知道到底有几有效，直接断尾。从此之后，我就奉檐蛇为我嘅救命护法，经常感恩在心！
势估唔到
原来上次嘅位仁兄嘅檐蛇煲风油精
确系真有其事
真系佩服佩服
世界之大，无奇不有
广东人嘅涉猎，真系不可估量
你以为檐蛇已经系最得人惊？
真系唔系，真系冇！
仲有呢啲！
真系睇完都唔想食饭！
悭返餐饭钱！
（唔使多谢我，举手之劳！）
攞你命3000版
@ Venn
作为已经20+岁嘅后生仔，当我听到我老母同我讲甴曱煲水可以医小儿惊风嘅时候，我觉得我好咗嘅小儿惊风又复发。
我真系跪求各位老窦老母爷爷嫲嫲，请你哋相信科学！甴曱真系好污糟！讲起都起鸡皮！
@🚀
好彩依家科技发达，喉咙痛咳食粒药就好得返。细个我嫲嫲就试过整咸竹蜂水畀我医喉咙痛。
但系我唔知系咩咪几好咯！不知者不罪啊嘛，偏偏畀我睇到碗水上面漂住只类似蜜蜂一样嘅物体，点解唔可以整走只竹蜂！我真系惊到以为畀人落降头啊X！
▲图片过于血腥，已贴心打码。
@生到咁大真系幸运
曾经听过我阿妈同我讲，我嫲嫲喺我阿哥细个嘅时候唔知边度听到一个偏方，话甴曱肠专门治喊惊，我当时听到嘅时候真系唔方唔惊咯！
仲有，甴曱条肠真系咁容易整出嚟？！要几多条肠先够？
斋睇都已经又核突又想作呕
真系佩服呢位自己友嘅阿哥
雷电法王可能都要甘拜下风！
@叉烧包
以前成面都系暗疮，然后阿妈唔知喺边度听到话生剁泥鳅可以医暗疮。
相信年少无知嘅你同我都以为最多敷喺块面度，但！事！实！上！我阿妈想我生吞泥鳅！我觉得日本人如果见到呢一幕都会非常惊讶！
@大超
俗话讲得好：苦口良药。只有意志坚定的人才能到达彼岸！
不过如果你试过食臭屁虫，包保你当场就可以升仙！话可以驱风对风湿病好，不过真系只想同佢讲拜拜，食完直接升天唔怪之得有好处。
虽然坊间一直据传
广东人咩都食！
但作为广东人嘅我哋都知道
话可以乱讲，屎系唔可以乱食嘅！
但系势估唔到
广东又真系有人会食屎！
@翠姨
旧时啲瓦背顶啲猫屎干咗之后攞嚟撞姜水，专门治哮喘。仲有童子尿浸鸡蛋，浸够100日之后每日早上定时八点食，都治哮喘同痰上颈。
你以为食猫屎就已经好犀利？
我话你知，连人屎都有人争住食！
@屎都唔敢食，你点话自己广东人！
细细个嘅时候听老母同嫲嫲讲，细路仔生积要食屎坑入面啲屎！知道自己要食屎之后，真系唔敢立乱食嘢，唔系嘅话分分钟要畀老母捉去食屎！
其实所谓嘅屎，系屎坑入面挂住嘅嗰啲污迹，俗称嘅人中白同人中黄！甚至仲听过有啲村民为咗呢啲屎大打出手！真系犀利……（呕）
生积：细路仔唔想食饭嘅时候，就系中医所讲嘅疳积。
细细个唔识嘢
病咗就真系乖乖地听阿妈话
畀咩食咩
但系每次谂返起身细个试过嘅呢啲偏方
真系好像问返阿妈一句：
我到底系唔系亲生㗎？！
上面讲嘅呢啲偏方
当然有啲系有科学依据
有啲冇科学依据喇！
依家科技咁发达
有咩头晕身㷫梗系第一时间搵医生喇！
不过我哋发现咗一条偏方
对咩症状都有效
特别系针对穷！
冇错，就系用钱掟你
边度唔舒服掟边度！
包你唔舒服都变到好舒服！
不过如果你哋下次见到呢个偏方
一定要掀住你阿妈唔好畀佢乱嚟！
▲图片来自网络
各位自己友
你哋阿妈仲有咩偏方？
你哋有冇遇到有用嘅偏方？
欢迎留言同我哋一齐分享你阿妈啲偏方！
本期文章内容均来自网友不堪入目的真实经历，
均已化名形式呈现，有删改。
如有雷同……衷心祝愿你健康长大！
如需转载请联系小编，
原创不易，多谢合作！
往期精选