渣男老刘|八部半
文|费里尼
老刘真有其人,也真的姓刘,不是“我有一个朋友”那种套路。
老刘也真是渣男,不过廿几年前老刘死特的辰光,社会上还勿流行“渣男”的讲法。
总是先有事实,后有概念。
老刘虚岁一百死特的。
交关人侪讲:老刘只棺材,人生赢家(最后四个字,要用国语发音)。
老刘少年老成,17岁就混上海滩。拿了头婚太太的私房铜钿开学堂。啥学堂,画图学堂。老刘嗅觉灵敏,艺术品味也ok,在全中国第一个引进西洋棵体(此处存心用了我小辰光勿懂事体时的发音:棵体,防止被举报删特)麻豆写生。搿记轰动,老刘被保守阶级列为上海滩三大妖怪——其他两位一个是写《性史》的张竞生,一个是写准黄色歌曲《毛毛雨》的黎锦晖。
实话实讲,老刘引进世界先进艺术手段的意思在前,碰瓷封建意识的意思也是有的。军阀孙传芳就上当了,要捉老刘。老刘逃到法租界,法国总领事在巴黎啥么事没看到过,勿肯交出老刘。八卦小报一炒作,老刘名气一记头上去,变成上海滩顶流。
迭个辰光,老刘办学堂没国家一分洋钿拨款,侪靠老婆私房铜钿支撑,后头名气出来,学生多了,状况好转。头一个老婆利用价值严重缩水,花嚓嚓的老刘看伊也厌弃,就想办法甩回老家。老刘对外的讲法有交关,一歇歇讲老婆乡下富人小姐,来上海一记头勿适应,心理也邪气自卑,盯伊太紧,实在吃勿消;一歇歇又讲迭桩婚事啊,伊其实根本没圆过房,连夜反抗封建礼教,逃出生天。
因为老刘活得实在长,晓得真相的人侪死了差不多了,所以现在上网查,基本是后头一个讲法。所以历史真相搿么事,和健康休戚相关,也和面皮有关,能够舍得厚面皮和媒体讲故事,皮越厚,流传下来的形象越高大。
老刘的第二个老婆是伊的写生麻豆,嫁给他的辰光只有17岁。要讲伊的渣,还体现在,老刘一直讲这位才是他的第一个老婆——赛过现在的风投融资,第二个老婆是A轮,第一轮勿叫A轮,叫PreA。
迭个老婆给老刘养了好几个小孩,还陪他去法国游学开眼界。在法国,老刘认得了一生的好基友老傅。老傅上海本地人,从小没父亲,姆妈教育方式邪气粗暴,搞得老傅一辈子脾气火爆——用今朝的话讲,直男,情商低。
巴黎,花花世界,老刘一记头老虫跌了米缸里。一天,老刘在酒吧搭讪了一个金发美女,美女引老刘穿街走巷,去到一栋房子里(以下删去5000字)。老刘出来心别别跳,奥扫寻到老傅分享春天的故事。要讲老傅上海本地人就是老举,听好勿响,朝老刘勾勾小指姆头。老刘一路跟老傅穿街走巷,进到一栋房子里。老傅法郎开路,拉老刘进到一个房间,房间摩擦乌黑,墙上有洞洞眼。老刘伸过头去一窥,哦册那,还是昨天那个金发美女,不过男主角调了别人。
看好,老刘闷特。老傅痛心疾首,讲:侬只戆棺材,本来应该是收费项目啊。
至于老傅为啥介老举。我没查到资料旁证,不敢瞎讲。
老刘人渣,还小气,用上海话讲就是“沙坑”,人沙无敌。老傅老刘一部轮船回上海,接了老刘offer,去伊的画图学堂教书。老刘懂艺术,但更懂社交混圈子。学堂办学钞票侪要自家筹,除了对老傅还可以,老刘对其他员工侪比较沙坑。礼拜天老刘叫员工屋里厢吃饭,员工去了,老刘让伊代笔画油画,自家隔壁搓麻将,搓好,过来望一眼,面不改色拿笔签上自家名字。
搿员工后头穷困潦倒死特。老刘相当冷漠。老傅火气大,也没办法,只好宣布断交。
渣渣的老刘无所谓的,伊学堂办得还可以,顺便把A轮老婆调特了——这趟的B轮还是学生。老傅搿辰光也结婚了,不过很快又和老刘B轮老婆的阿妹搞上了暧昧,对老刘调老婆的事体,实在发不出啥调头。
老刘花嚓嚓的脚本从没停歇。在调老婆的间歇,继续以棵体写生搞七捻三,听讲麻豆里就有后头搞了邪气大的Blue apple。对搿只女人,老刘80几岁辰光和别人讲起来还忍不住凡尔赛:搿只女人送拨我我也勿要啊,不过,身材的确还可以……
没几年,日本人来了。要讲老刘,开始表现还是可以的。一家头跑到南洋为抗日义卖筹款。一年多没回来,B轮已经大肚皮了——小人是老刘一个朋友老萧的。
老刘搿辈子,只被一个女人fire过,就是B轮。后头交关年过后,讲起这个老婆,老刘还是痛惜不已。日本人后来发觉老刘在南洋搞事体,一部轮船拿伊车回上海。老刘先解决老婆的事体,伊比较大度,表示既然都珠胎暗结了,索性成全伊拉。老萧一记头面孔红了,寻到老刘,表示自家错了,如果老刘不介意,可以完B归赵。老刘眼乌珠一弹,讲:侪讲好了,搿种事体勿可以退货。
老萧:有数了。
懂的人后来讲,老刘看起来上路,其实是在南洋已经搭上了富商的女儿,也是伊的崇拜者,趁机调老婆咯。
C轮婚结好。日本人也没放过老刘。搿段辰光,老刘的经历邪气刮三。伊办画展,日本高官到场祝贺,有军人大佐之类,也有文化特务。老刘欧洲哪个国家没得去过,毅然和日本人谈笑风生。
讲讲也妖。天亮之后,老刘没事体一刚。只有最开始几年,有眼小危险。20几年前读过老刘图画学堂的一个学生,爬到了高位,写信向上头举报老刘汉奸。要讲老刘运道也是真好。写举报信的没多少辰光心脏病走特了。老刘虽然看起来还在待定区,但总算暂时安全。
多年以后,谈起写信的同行,老刘和后辈豁胖:侬看我有介许多女人,啥事体没,伊搞了一个就走特了喏。
最开始的几年,上头对老刘还是有想法的。那个欢喜讲自己来晚了的大佬曾经拍着台子和老刘的一个学生讲:政府大门开了还,让伊早点进来拿事体讲清爽!
老刘佝了上海,啥地方勿去,也勿响。辰光一长,居然就勿大有人讲这桩事体了。这是奇迹之一。
奇迹之二,是老刘当初画了勿该画的人的画,后来也没事体。大鲍斯还主动发调头以艺术的名义为伊开脱。
所有人侪想勿落。
老傅特老刘绝交十几年,后来老傅主动,恢复走动,老刘邪气激动,后头一直讲老傅是伊搿辈子最好的朋友。
拍案而起老傅,58岁。虚与委蛇老刘,十足99。
晚年老刘接受采访,思想开通,老底子交关瞎七搭八的事体,该讲不该讲全部讲。上海滩老刘和三国的老刘有句一式一样的台词:我的二弟从没让我失望。老刘讲法讲法,满面红光,鹤发童颜。
当年上海宝贝号称用身体写作,其实搿种么事侪是老刘这种人白相剩下来的,差不多100年前,老刘伊拉就用身体画图了。
老刘跑特也20多年了,晓得老刘的人,是越来越少,伊基本像古人一样活在传说里厢了。老刘算渣男伐?好像也算。不过和当代渣男最大的区别在于,肯出来讲伊坏话的女人一个没碰到。
搿句闲话是一点没错的:基层群众要的交关么事,只有骗子能给;女人要的交关么事,只有渣男能给。
(作者声明:本文涉及的所有事件均有出处,只不过根据上海话语境做了一眼眼调整)