རྣམ་འདྲེན་བརྒྱད་པ་རྫོགས་པའི་སངས་རྒྱས་སྟོན་པ་གཤེན་རབ་མི་བོའི་
མཛད་པ་བཅུ་གཉིས་ཀྱི་སྐོར།
སེང་སྤྲུལ་རིག་འཛིན་ཉི་མས་བསྒྲིགས
དེ་ཡང་བདག་ཅག་གི་མགོན་པོ་རྣམ་འདྲེན་བརྒྱད་པ་བདུད་བཞི་མ་ལུས་པ་བཅོམ་མཛད། རྫོགས་པའི་སངས་རྒྱས་སྟོན་པ་གཤེན་རབ་མི་བོ་དེ་ཉིད་ཀྱིས་དང་པོ་བྱང་ཆུ་མཆོག་ཏུ་ཐུགས་བསྐྱེད་ཅིང་བར་དུ་བསྐལ་པ་གྲངས་མེད་གསུམ་གྱི་རིང་ལ་སྒྲིབ་གཉིས་སྦྱོང་ཞིང་ཚོགས་གཉིས་རྫོགས་པར་བསགས། མཐར་སྟག་གཟིག་འོལ་མོ་ལུང་རིང་དུ་མངོན་པར་སངས་རྒྱས་ནས་མཛད་པ་ཆེན་པོ་བཅུ་གཉིས་དང༌། དྲུག་ཅུ་རྩ་བཞི། མཛད་ཕྲན་བརྒྱ་དང་རྩ་བརྒྱད་སོགས་ཀྱིས་ཕྲིན་ལས་མཐར་ཕྱིན་ནོ། དེ་ཡང་སྟོན་པ་གཤེན་རབ་གནས་ངེས་པ་མེད་པ་རི་རྒྱལ་ལྷུན་པོ་དང་ཞང་བོད་སྟག་གཟིགས་སོགས་ལ་བྱོན་ནས་འགྲོ་དོན་མཛད། སྟོན་པ་མ་ངེས་པ་འཛམ་གླིང་བྱེ་བ་ཕྲག་བརྒྱར་སྤྲུལ་སྐུ་བྱེ་བ་ཕྲག་བརྒྱར་སྤྲུལ་ནས་འགྲོ་དོན་མཛད། བཀའ་མ་ངེས་པ་དྲང་དོན་དང་ངེས་དོན་ཐེག་པ་ཆེ་ཆུང་གི་བོན་སྒོ་བརྒྱད་ཁྲི་བཞི་སྟོང་གསུངས། འཁོར་མ་ངེས་པ་སོ་སྐྱེས་དང་འཕགས་པ་སོགས་བརྗོད་ལས་འདས་སོ། དུས་མ་ངེས་པ་དུས་གསུམ་ལ་སོགས་ལ་བཞུགས་ནས་འགྲོ་དོན་མཛད་དོ། སྟོན་པ་གཤེན་རབ་སྤྲུལ་སྐུའི་རྣམ་པར་མཛད་ནས་མདོ་སྡེའི་བོན་རྣམས་གསུང༌། ལོངས་སྐུའི་རྣམ་པར་མཛད་ནས་གསང་སྔགས་དང་རྫོགས་ཆེན་གྱི་བཀའ་འཁོར་བསྐོར་བ་མཛད་དོ། སྟོན་པ་གཤེན་རབ་མི་བོའི་མཛད་པ་རྒྱས་པ་དྲི་མེད་གཟི་བརྗིད་གླེགས་བམ་བཅུ་གཉིས་ཅན་དང་མདོ་གཟེར་མིག་སོགས་ལས་གསལ་ལོ། འདིར་བདག་ཅག་གི་སྟོན་པ་མཆོག་གི་སྤྲུལ་སྐུས་སྟག་གཟིག་འོལ་མོ་ལུང་རིང་དུ་གདུལ་བྱ་ཐུན་མོང་གི་ངོར་མཛད་པ་མཐའ་དག་བསྡུ་ན་མཛད་པ་བཅུ་གཉིས་སུ་འདུ། སྟོན་པ་ཉིད་སངས་རྒྱས་ནས་སླར་འཇིག་རྟེན་དུ་གཟུགས་ཀྱི་སྐུས་འགྲོ་དོན་མཛད་པ་ལ་གཤེན་ལོ་གཅིག་ནས་དྲུག་ཅུའི་བར་གྱི་མཛད་པ་དྲུག་ཅུ་ཐམ་པ་དང༌། དེའང་མཛད་པ་བཅུ་གཉིས་སུ་བསྡུས་ཏེ་བཤད་ཚུལ་གཉིས་སུ་ཡོད་པ་ལས། འདིར་མཛད་པ་བཅུ་གཉིས་ཀྱིས་བསྟན་པ་ལའང་སྔ་རབས་ཀྱི་མཁས་པ་དག་གི་བཤད་ཚུལ་ཅུང་མི་འདྲ་ཡང༌། འདིར་སློབ་དཔོན་དྲན་པས། སྐྱེས་བཞེས་བསྟན་སྤེལ་འགྲོ་གཉིས་འདུལ། ཁབ་བཞེས་སྲས་སྤྲུལ་འགྲོ་དོན་མཛད། བདུད་བཏུལ་བསྟན་པ་རྗེས་སུ་བཞག ཁྱིམ་སྤངས་འཁོར་སྤངས་མྱ་ངན་འདས། ཞེས་གསུངས་པ་ལྟར་མདོར་བསྡུས་ཏེ་ས་བཅད་ཙམ་ཞིག་བཀོད་པ་ཡིན་ཞིང༌། དེ་ལའང་གཙོ་ཆེ་བ་མཛད་པ་བཅུ་གཉིས་ཀྱི་ཁོངས་སུ་མཛད་པ་ཕྲ་མོ་རྣམས་ཤུགས་ལས་བསྟན་པའོ། །རྒྱས་པར་བཤད་པ་ལ་བཅུ་གཉིས་ལས།
དང་པོ་སྐྱེ་བ་བཞེས་པའི་ཚུལ་ནི། ཉི་སྒྲོན་ལས། སྟོན་པ་འཆི་མེད་གཙུག་ཕུད་ཀྱིས། སུམ་ཅུ་རྩ་གསུམ་ལྷའི་གནས་སུ། གཅུང་ཤེས་པ་དག་ལ་དབུ་རྒྱན་བསྐོན། གཅུང་ཁྱོད་ད་ལྟ་ང་ཡི་ཚབ། ལྷ་རྣམས་འདྲེན་པའི་སྟོན་པར་མཛོད། ང་ནི་གཏོ་རྒྱལ་བསྟན་རྟིང་ལ། སྟོང་གསུམ་མི་མཇེད་འཛམ་གླིང་དུ། བསྟན་པ་རྣམ་གསུམ་སྤེལ་དུ་འགྲོ། སྐུ་གསུང་ཐུགས་ཀྱི་བསྟན་རྫོགས་ནས། ཤེས་པ་ཡེ་གནས་སྲས་བུ་ཆུང༌། ཚེ་ལོ་བཅུ་པའི་འདྲེན་སྟོན་འགྱུར། ཅེས་བརྗོད་རང་གི་ལུས་པོ་ཡང༌། རི་རབ་ཁ་ལ་བཞག་ནས་ནི། བསམ་བཞིན་སྐྱེ་བའི་འཆི་འཕོ་མཛད། ཞེས་དང༌། ཞི་བ་ཡོངས་རྫོགས་ལས། ཡེ་ཤེས་གཙུག་ཕུད་ས་བཅུ་མ་ནོན་པས། སྒྲིབ་པའི་ཆ་ལ་འདྲེས་དོགས་ཀྱི་བག་ཚ་དང་ཉམ་ང་བྱུང་སྟེ་ཁྲི་རྒྱལ་ཁུག་པ་གདུང་སོབ་ཏུ་བཞག་ནས་སླར་འོག་མིན་དུ་གཤེགས་ཏེ། དེ་དུས་ཚེ་ལོ་ཁྲི་པ་ལགས་ཏེ། ཞེས་པས། ཡེ་གཤེན་གཙུག་ཕུད་ཁྲི་བའི་དུས་སུ་བྱོན་པས་འཕགས་ལམ་གྱི་ས་དགུ་ལས་མ་ནོན་ལ། དེས་སྒྲིབ་པ་མཐའ་དག་སྤངས་པའི་བླ་མེད་ཀྱི་ས་ནོན་ནས་བརྒྱ་པའི་སྟོན་པར་བྱོན་པ་སྟེ། དེ་ནི་ཁྱེའུ་གསལ་བའམ་འཆི་མེད་གཙུག་ཕུད་ཅེས་བྱ་སྟེ། བསྟན་པ་ཤན་འབྱེད་ལས། ཁྱེའུ་གསལ་བ་འཆི་མེད་གཙུག་ཕུད་ལ། ཡེ་ཤེས་ལྷ་ཡི་ཏིང་འཛིན་བོན་བསྟན་པས། ཤེས་བྱའི་སྒྲིབ་བྱང་ཐོགས་མེད་སྤྲུལ་སྐུར་གྱུར། ཞེས་སོ། དེའང་དག་པའི་འཁོར་གཡུང་དྲུང་སེམས་དཔའ་རྣམས་ལ་ལོངས་སྐུ་དང༌། མ་དག་པའི་སོ་སྐྱེ་རྣམས་ལ་སྤྲུལ་སྐུར་སྣང་ནས་འགྲོ་དོན་མཛད་པ་སྟེ། མདོ་ལས། བོན་གྱི་སྐུ་ལས་རྫོགས་པའི་སྐུ་བསྐྱེད་ནས། འདུལ་བའི་སེམས་ཅན་ཤེས་བྱའི་སྒྲིབ་པ་སྦྱོངས། ཞེས་སོ། ལྷ་རྣམས་ཀྱི་སྣང་ངོར་དེ་ཉིད་ཀྱི་ཡེ་ཤེས་ལྷ་ལས་འགྲོ་བ་འདུལ་བའི་ལུང་ཐོབ་ནས་ལྷའི་གནས་ནས་འཕོ་བའི་ཚུལ་མཛད་དེ་མིའི་ཡུལ་དུ་བྱོན་ཁར་ལྷ་དང་སྲིད་པ་གཉིས་ཀྱི་སྤྲུལ་པའི་སྟོངས་དང་བཅས་ཏེ་བྱོན་པས། བར་ལྷ་འོད་གསལ་གྱི་གནས་སུ་གཡུང་དྲུང་སེམས་དཔའ་རྣམས་ཤེས་བྱའི་སྒྲིབ་པ་སྦྱངས་ནས་ཐར་པ་ཆེན་པོའི་ས་ཐོབ་མཛད། ལམ་དུ་གཡེན་ཁམས་སུམ་ཅུ་རྩ་གསུམ་ལ་གཡེན་འདུལ་གྱི་བོན་པོ་རེ་རེ་བསྐོས། སུམ་ཅུ་རྩ་གསུམ་གྱི་གནས་སུ་ཁམས་གསུམ་གྱི་ལྷའི་རིགས་འཚོགས་པ་རྣམས་ལ་ལས་རྒྱུ་འབྲས་ཀྱི་བོན་བསྟན། དེར་ལྷ་ལས་བབ་པའི་མཆོད་རྟེན་ཡང་བཞེངས་སོ། དེ་ནས་ལྷའི་བུ་རྨ་ལོ་དང་བ་དང་གཡུ་ལོ་གཙུག་ཕུད་དང་བཅས་ཏེ་རི་རབ་ཀྱི་ཁ་ཁྱེར་ལ་བྱོན་ནས་ལྷ་མཐུ་རྩལ་ཅན་རྣམས་དམ་ལ་བཏགས། རི་རབ་ཀྱི་རྩེ་མོ་ནས་གཟིགས་ཚད་དང་དགོངས་ཚད་བཅུའམ་ལྔ་ལྔ་ཐུགས་ལ་བཀྲམ་སྟེ་གཟིགས་ཚད་ལྔ་ནི། གདུལ་ཞིང་མི་མཇེད་འཇིག་རྟེན། གདུལ་བྱ་མི། གླིང་འཛམ་གླིང་པ། འཁོར་འཛམ་གླིང་སོག་ཁའི་མི། རིགས་རྒྱལ་རིགས་དམུ་ལ་གཟིགས་པ་ལྔའོ། དགོངས་ཚད་ལྔ་ནི། ཡུལ་འོལ་མོའི་གླིང༌། མཁར་བར་པོ་སོ་བརྒྱད། ནོར་རིན་པོ་ཆེའི་གཏེར། ཡབ་རྒྱལ་བོན་ཐོད་དཀར། ཡུམ་རྒྱལ་བཞད་མ་ལྔ་ལ་དགོངས་སོ། དེ་ནས་ལྷའི་བུ་གཉིས་གཡུང་དྲུང་དགུ་བརྩེགས་རིའི་ནགས་ཚལ་དུ་སྦས་ཚུལ་མཛད་ནས་རིག་པའི་ཁྱེའུ་གསལ་བ་ཉིད་ཡི་གེ་ཨ་མ་དཀར་དམར་གཉིས་སུ་བསྡུས་ཏེ་ཡབ་རྒྱལ་བོན་ཐོད་དཀར་དང་ཡུམ་ཐུགས་རྗེའི་བྱམས་མའི་སྤྲུལ་པ་རྒྱལ་བཞེད་མ་གཉིས་ཀྱི་སྤྱི་བོར་བབ་སྟེ། ཟླ་དགུ་ངོ་བཅུར་ཡུམ་གྱི་ལྷུམས་སུ་བཞུགས་ཚུལ་བསྟན་ནས། བལྟམས་པའི་སྔ་ལྟས་སུ་གཡུང་དྲུང་དགུ་བརྩེགས་ཀྱི་ནགས་ཚལ་དུ་མུ་ལེ་དྲུམ་ཤིང་གི་སྡོང་པོ་ལ་ཡལ་ག་བརྒྱད་དུ་གྱེས་པ། ཡན་ལག་སྟོང་ཡོད་པ། ལོ་མ་འབུམ་ཕྲག་ཡོད་པ། འབྲས་བུ་རིན་པོ་ཆེ་རུ་འདུག་པ། ཤུན་པ་དར་ཟབ་ཏུ་འདུག་པ། ཁུ་བ་བདུད་རྩིར་འཛག་པ། ལོ་མ་དགོས་འདོད་འབྱུང་བ་ཞིག་སྐྱེས་སོ། དེ་ནི་ཡན་ལག་བརྒྱད་ལྡན་ཀྱི་སྡོང་པོ་ཞེས་བྱའོ། ཞེས་དྲི་མེད་ལས་གསུངས་ཤིང༌། མདོ་འདུས་ལས། མཁར་སྒོ་གཡས་སུ་ཨུ་དུམ་ཝ་ར་འཁྲུངས། མཁར་སྒོ་གཡོན་དུ་འཛམ་བུ་ཤིང་ཡང་སྐྱེས། ཞེས་སོ། གཞན་ཡང་གླིང་ཐམས་ཅད་དུ་ངོ་མཚར་བའི་མཚན་མ་འབུམ་ཕྲག་སྙེད་ཀྱིས་གང་ཞིང་བལྟམས་པའི་ཚེ་ཡུམ་ལ་གནོད་པ་མེད་པར་མཆན་ཁང་གཡས་ནས་ལོ་ཡི་རྒྱལ་པོ་ཤིང་ཕོ་བྱི་བའི་ལོ། ཟླ་བའི་དང་པོ་དཔྱིད་ཟླ་ར་བ་མེ་སྟག་གི་ཟླ་བ། ཞག་གི་སྙིང་པོ་ཚེས་པ་བཅོ་ལྔ། དུས་ཚོད་ཀྱི་དང་པོ་ནམ་ལངས་པ། སྐར་མའི་དམ་པ་རྒྱལ་གྱི་རུ་གོང་ལ་སྐུ་བལྟམས། མཚན་དཔེའི་དཀྱིལ་འཁོར་གསལ་མ་ཐག་ཚངས་པ་དང་བརྒྱ་བྱིན་སོགས་ཀྱིས་ཕྱག་གིས་དར་དཀར་གྱི་སྟེང་དུ་སྐུ་བླངས་ཤིང༌། ལྷ་མོ་དང་ཀླུ་མོ་རྣམས་ཀྱིས་སྐུ་ཁྲུས་གསོལ། ཕྱོགས་བཞིར་ཞབས་ཀྱིས་གོམ་པ་བདུན་བདུན་བོར་བའི་རྗེས་ལ་མེ་ཏོག་པདྨ་རེ་རེ་ལམ་ལམ་བརྡོལ་ཞིང༌། རིགས་དྲུག་གི་སེམས་ཅན་ཐམས་ཅད་དབུགས་དབྱུང་བའི་གསང་ལྷང་ལྷང་ཐེངས་གསུམ་དུ་བསྒྲགས་སོ། དེའི་ཚེ་མཚན་མཁན་བྲམ་ཟེས་རྒྱལ་བའི་མཚན་དཔེ་སོགས་ཡོན་ཏན་བརྒྱ་དང་རྩ་བརྒྱད་རྣམས་ཞིབ་ཏུ་བརྟགས་ཤིང་བཤད་ནས་མཚན་ཡང་སངས་རྒྱས་སྟོན་པ་གཤེན་རབ་མི་བོ་ཀུན་ལས་རྣམ་པར་རྒྱལ་བར་མཚན་གསོལ་བས་འཇིག་རྟེན་ཁམས་གཡོ་འགུལ་དང་བཅས་ཏེ་སྟོན་པ་གཏོ་རྒྱལ་ཡེ་མཁྱེན་གྱི་བསྟན་པ་ལ་གནས་པའི་སེམས་ཅན་སྔོན་དུ་ཚོགས་བསགས་ཤིང་སྒྲིབ་པ་སྦྱང་པ་རྣམས་དུས་དེར་སྟོན་པའི་རྐྱེན་དང་འཕྲད་མ་ཐག་སྲིད་པའི་འཆིང་བ་མཐའ་དག་ལས་གྲོལ་ཏེ་མངོན་སུམ་དུ་སངས་རྒྱས་ཏེ་སོང༌། དེ་ནས་དགུང་ཞག་གཉིས་ལོན་ནས་འཇིག་རྟེན་གྱི་ཁམས་སུ་ངོ་མཚར་གྱི་མཚན་མ་བཟང་པོ་དང་གཡོ་འགུལ་གྱི་ཆོ་འཕྲུལ་དང་བཅས་བརྒྱ་པའི་སྟོན་པ་ཡིན་པའི་རྟགས་སུ་འདས་པའི་སངས་རྒྱས་གཏོ་རྒྱལ་ཡེ་མཁྱེན་གྱི་བསྟན་པ་རྫོགས་ཏེ་སྐུ་གཟུགས་རྣམས་ནི་བྱ་འཕུར་བ་བཞིན་དུ་སོང༌། སྐུ་གདུང་ཐམས་ཅད་ནི་དར་བརྐྱང་པ་བཞིན་དུ་སོང༌། གསུང་རབ་རྣམས་ནི་དུང་ཕྱིས་པ་བཞིན་དུ་སོང་ངོ༌། དེའི་ཚེ་གཤེན་རབ་ཀྱི་མེས་པོ་དམུ་རྒྱལ་ཐེམ་སྐས་དང༌། ཕྱི་མོ་ཕྱྭ་ཟ་དང་འབྲང་མ་གཉིས་སྔར་བཞིན་དུ་སངས་རྒྱས། དགུང་ཞག་གསུམ་ལོན་པའི་དུས་སུ་སྔར་བཞིན་ངོ་མཚར་གྱི་ལྟས་དང་བཅས་གཤེན་རབ་ཉིད་ཀྱི་ཡབ་ཡུམ་དང་ལྟས་མཁན་ལ་སོགས་འོལ་མོའི་གླིང་གི་གདུལ་བྱ་སྦྱངས་པའི་འཕྲོ་ཅན་མཐའ་དག་རྣམ་མཁྱེན་གྱི་ས་ལ་རེག་པར་མཛད་དོ། །
གཉིས་པ་བསྟན་པ་སྤེལ་བ་ནི། རྒྱལ་བུ་རྒྱལ་སར་མ་ཕྱུང་གི་བར་དུ་ནགས་ཚལ་དབེན་པའི་གནས་སུ་གབ་ཅིང་སྦས་པའི་ཚུལ་དུ་བཞུགས་ཤིང་སྲིད་པའི་རྒྱུད་དང་ལས་འབྲས་རྣམས་གསུངས། རྒྱལ་སར་ཕྱུང་སྟེ་དགུང་ལོ་གཅིག་ནས་བཅུའི་བར་དུ་ཐེག་དགུའི་བོན་རྣམས་གསུང་ནས་ཐེག་དགུའི་གཤེན་པོ་རྣམས་ལ་གཉེར་གཏད། སྐད་རིགས་སུམ་བརྒྱ་དྲུག་ཅུའི་སྐད་སྒྱུར་བའི་གཡུང་དྲུང་སེམས་དཔའ་སུམ་བརྒྱ་དྲུག་ཅུས་གཡུང་དྲུང་གི་བོན་ཁམས་གསུམ་རིགས་དྲུག་གི་གནས་སུ་དར་བར་མཛད་ཅིང་རིགས་པའི་གནས་ལྔའི་བོན་རྣམས་གསུངས། སྤྱིར་སྟོན་པའི་ཐུགས་ཀ་ནས་འོད་ཟེར་བྱེ་བ་སྟོང་ཕྲག་དྲུག་ཅུ་སྤྲོས་པ་ལས་འཛམ་གླིང་བྱེ་བ་ཕྲག་བརྒྱ་ལ་སྟོན་པའི་སྐུ་བྱེ་བ་ཕྲག་བརྒྱ་དང༌། རིགས་དྲུག་ལ་འདྲེན་པའི་གཤེན་དྲུག་ལ་སོགས་སྤྲུལ་ནས་སེམས་ཅན་གྱི་དོན་མཛད། སྒོས་སུ་སྟོན་པའི་བསྟན་པ་བརྟན་པར་བྱེད་པ་ས་བདག། བསྟན་པ་སྤེལ་བའི་ཞིང་གི་མཆོག་གྱུར་ལྷ་ཀླུ་མི་གསུམ་ཡིན་པས་ན། དང་པོ་ས་བདག་གི་ཞིང་ཁམས་སུ་བསྟན་པ་སྤེལ་ཚུལ་ནི། དགུང་ལོ་བཅུ་གཉིས་པར་སའི་ལྷ་མོ་བརྟན་མ་ལ་ས་བདག་གི་ཁྱེའུ་དང་བུ་མོ་སྐུ་མདོག་གསེར་ལྟ་བུ་གསེར་གྱི་རྒྱན་ཁོ་ནས་བརྒྱན་པ་སྟོང་གིས་བསྐོར་ནས་འོལ་མོའི་གླིང་དུ་ལྷགས་ཏེ་སྟོན་པས་བདག་གི་ཡུལ་དུ་སྤྱན་དྲང་པས་གཡུང་དྲུང་སེམས་དཔའ་ཁྲི་དྲུག་སྟོང་དང་ཆས་ཏེ་བྱོན་ནས་ས་བདག་རྣམས་ལ་བོན་གྱི་འཁོར་ལོ་བསྐོར། གསས་ཁང་བ་རབ་ཡོངས་འདུལ་བཞེངས། དབང་ལྡན་དུས་ཀྱི་འཁོར་ལོའི་དཀྱིལ་འཁོར་ཞལ་ཕྱེས་ཏེ་དུས་འཁོར་གྱི་རྒྱུད་ལེའུ་སྟོང་ཕྲག་བརྒྱ་བ་དང་བཅས་པ་གཏན་ལ་ཕབ་ནས་ས་བདག་གི་བོན་པོ་གསེར་ཐུབ་འོད་སྲུང་ལ་གཉེར་དུ་གཏད། ས་བདག་གི་གདུལ་བྱ་ཚད་མེད་པ་སངས་རྒྱས་ཏེ་སོང༌། །
ལྷ་ཀླུ་མི་གསུམ་ལས། སྟེང་ལྷའི་ཡུལ་དུ་བསྟན་པ་སྤེལ་ཚུལ་ནི། ལོ་མཛད་བཅུ་གཉིས་རྫོགས་ནས་སྲས་སྤྲུལ་པའི་མཛད་པའི་སྐབས་ཤིག་ཏུ་ནམ་མཁའ་ལ་སྤྲིན་མང་པོ་གཏིབས་པའི་ནང་ནས་དུང་གི་ཁྱེའུ་རབ་ཏུ་མཛེས་པ་ཞིག་ལ་ལྷའི་སྲས་ལྕམ་དྲལ་སྟོང་རྩ་བརྒྱད་ཀྱིས་བསྐོར་བ། སྤྲིན་དཀར་གྱི་གདན་ལ་འཇའ་ཚོན་གྱི་གུར་ནང་དུ་འདུག་པ་ཞིག་སྟོན་པའི་སྤྱན་སྔར་བྱུང་ནས་སྟོན་པ་སྟེང་ལྷ་ཡུལ་དུ་གཤེགས་པར་ཞུས་པས་བྱོན་པར་ཞལ་གྱིས་བཞེས་ཏེ་གཡུང་དྲུང་སེམས་དཔའ་ཁྲི་དྲུག་སྟོང་ལྔ་སྟོང་ལྔ་བརྒྱ། སུམ་བརྒྱ་དང་དྲུག་ཅུ་བཅས་པ་གཤེན་གྱི་རྟ་བདུན་ལ་ཆིབས་ཀྱི་ཁ་ལོ་བསྒྱུར་ནས་གཞའ་ཚོན་གྱི་ལམ་ལ་རྫུ་འཕྲུལ་གྱི་གོམ་པས་བསྐྱོད་དེ་སུམ་ཅུ་རྩ་གསུམ་གྱི་གནས་སུ་ཕེབས། ཁམས་གསུམ་གྱི་ལྷའི་རིགས་རྣམས་ལ་བོན་གྱི་འཁོར་ལོ་བསྐོར། ཤིང་རྟའི་ཚལ་གྱི་དབུས་དཀྱིལ་དུ་གསས་ཁང་གཡུང་དྲུང་ལྷ་རྩེ་བཞེངས་ནས། ཀུན་དབྱིངས་རྒྱལ་བའི་དཀྱིལ་འཁོར་ཞལ་ཕྱེས་ཏེ་མངའ་དབུལ་མཛད། མདོ་སྡེ་དམ་པ་ཏོག་ཆེན་གཏན་ལ་ཕབ་སྟེ་ལྷའི་བུ་དམ་པ་ཏོག་དཀར་ལ་གཉེར་གཏད་ཅིང༌། ལྷ་ཁམས་སྟོང་པ་ཙམ་གྱི་གདུལ་བྱ་རྣམས་སངས་རྒྱས་ཏེ་སོང༌། །
འོག་ཀླུུ་ཡི་ཡུལ་དུ་བསྟན་པ་སྤེལ་ཚུལ་ནི། སྟོན་པ་དགེ་རྒྱས་ཡོན་ཏན་གྱི་གླིང་ན་བཞུགས་པའི་དུས་སུ་ཀླུའི་ཁྱེའུ་མཇུག་མ་སྦྲུལ་དུ་འདུག་པ་ཞིག་ཀླུ་ཤིང་པདྨའི་གདན་ལ་ཀླུའི་ཁྱེའུ་དང་བུ་མོ་མང་པོས་བཏེགས་ནས་སྟོན་པའི་དྲུང་དུ་འཁོད་དེ་སྟོན་པ་ལ་འོག་ཀླུའི་ཡུལ་དུ་གཤེགས་པར་ཞུས་བཞིན་དུ་བྱོན་ནས་ཀླུ་རྣམས་ལ་བོན་གྱིས་འཁོར་ལོ་བསྐོར། གསས་ཁང་གེ་སར་འབུམ་གླིང་བཞེངས་ནས་རྣམ་དག་པདྨ་ཡུམ་གྱི་དཀྱིལ་འཁོར་ཞལ་ཕྱེས་ཏེ་རབ་ཏུ་གནས་པར་མཛད། མདོ་འབུམ་གཟུངས་གསུམ་དང༌། ཁྱད་པར་དུ་ཤེས་རབ་ཀྱི་ཕ་རོལ་ཏུ་ཕྱིན་པ་གཏན་ལ་ཕབ་སྟེ་ཀླུ་ཁམས་སྟོང་པ་ཙམ་གྱི་སེམས་ཅན་རྣམས་བྱང་ཆུབ་ལ་རེག་པར་མཛད་དོ།།
བར་མིའི་ཡུལ་དུ་བསྟན་པ་སྤེལ་ཚུལ་ནི། ཤར་ལུས་འཕགས་པོ་སོགས་གླིང་བཞི་ལ་སྟོན་པའི་ཕྱག་ཞབས་བཞིའི་འོད་ཟེར་ལས་སྤྲུལ་པའི་སངས་རྒྱས་རེ་རེ་སྣང་བར་མཛད་དེ་ལས་ཅན་རྣམས་སྐད་ཅིག་དེ་ཉིད་ལས་གྲོལ་བར་མཛད། རྗེས་སུ་ལུས་པ་རྣམས་ལ་བསྟན་པ་སྣ་རེ་སྐྱོབ་པའི་ལྷ་རེ། འདྲེན་པའི་གཤེན་རེ། སྲུང་བའི་སྡོམ་པ་རེ་བཞག་ཅིང༌། གླིང་གསུམ་ནས་འཕོས་དུས་སུ་འཛམ་བུའི་གླིང་དུ་སྐྱེ་བའི་སྨོན་ལམ་བཏབ་བཞིན་དེར་སྐྱེས་ནས་ཐར་པ་ཐོབ་པར་མཛད། སྒོས་འཛམ་བུ་གླིང་ལ་རྒྱ་དཀར་ནག་མེ་ཉག་བལ་པོ་ཨོ་རྒྱན་ཟ་ཧོར་ཁ་ཆེ་ཐོད་གར་ལི་ཡུལ་ཕྲོམ་སྟག་གཟིག་སུམ་པ་ཞང་ཞུང་བོད་ལ་སོགས་སུ་སྟོན་པའི་སྤྲུལ་པས་སྐུ་རེ་རེ་སྣང་བར་མཛད་ཅིང་བསྟན་པ་ཆ་རེ་འདྲེན་པའི་གཤེན་རེ་ལ་གཉེར་གཏད་ནས་བསྟན་པ་སྤེལ། འོལ་མོའི་གླིང་དུ་ལྷ་ཀླུ་མི་གསུམ་གྱི་སློབ་མ་བྱེ་མའི་ལ་ཙམ་ལ་བསྒྲགས་པ་གསུམ་གྱི་དཔེའུ་ཙེ་དང་སྒོ་བཞི་མཛོད་དང་ལྔའི་བོན་འཁོར་བསྐོར་རོ།།
གསུམ་པ་དང་བཞི་པ་འགྲོ་གཉིས་འདུལ་བ་ནི། སྐྱོབ་སྟོན་གྱིས། ཞེ་སྡང་ཅན་གཏོ་བུ་དང་འདོད་ཆགས་ཅན་བཙུན་མོ་བཏུལ་བར་གསུངས་པར་མཛད་པ་གཉིས་འདུ་ཞིང༌། དྲི་མེད་ལས། ང་རྒྱལ་ཅན་ཁྲི་ཤིང་དབང་རྒྱལ། ཕྲག་དོག་ཅན་ཧ་ལ་ར་ཙ་དང་གུ་ཝེར་ར་ཙ་བཏུལ་བར་གསུངས་པ་རྣམས་ཡིན་ཏེ། དེ་དག་དུག་ལྔ་ཁ་ཚང་གི་གདུལ་བྱ་ཡིན་ཀྱང་རང་རང་ལ་དུག་དེ་དག་ཤས་ཆེ་བའི་དབང་གིས་བཞག་པའོ། དེས་ན་དང་པོ་གཏོ་བུ་དོ་དེ་དེ་སྟོན་པས་བཏུལ་བས་མ་འཐུལ་ཏེ་ངན་འགྲོར་སོང་བ་ལ་སྟོན་པས་ལྷ་གཤེན་བརྒྱའི་མཚན་ནས་བརྗོད་ཅིང་རྀགས་དྲུག་གི་གནས་ནས་འདྲེན་པའི་ཆོ་ག་མཛད་པས་རིགས་དྲུག་ཏུ་བརྒྱུད་པའི་སྐྱེ་བ་དྲུག་གི་མཐར་འོལ་མོའི་གླིང་གི་ཤམ་པོ་ལྷ་རྩེའི་སྒོ་དྲུང་དུ་མེ་ཏོག་གི་ཁ་ལ་བརྫུས་ནས་སྐྱེས་ཏེ་བྱུང་བ་ཐར་པའི་འབྲས་བུ་ཆེན་པོ་ཐོབ་པར་གྱུར་ཏོ།།
གཉིས་པ་ནི། ཧོས་དང་བ་ཡིད་རིང་གི་བཙུན་མོ་འགུ་ལིང་མས་སློབ་དཔོན་གཙུག་གཤེན་རྒྱལ་བ་ལ་འདོད་ཆགས་སྐྱེས་པ་ལ་སློབ་དཔོན་གྱིས་བཙུན་མོ་ལ་འདོད་ཆགས་ཀྱི་ལས་མ་སྤྱད་པས་བཙུན་མོ་ཁོང་ཁྲོས་ཏེ་སྐུར་པ་ཆེན་པོ་བཏབ་པའི་རྣམ་སྨིན་ནད་ངན་མཛེས་ཟིན་ནས་སྡུག་བསྔལ་བ་ལ། སྟོན་པས་ལྷ་མོ་སུམ་བརྒྱའི་མཚན་བསྒྲགས་ནས་བཙུན་མོ་ཕྱག་འཚལ་དུ་བཅུག་པས་ནད་ངན་དང་ལས་སྒྲིབ་བྱང་ནས་ཐར་པའི་འབྲས་བུ་ཐོབ་བོ།།
གསུམ་པ་ནི། རྒྱལ་པོ་ཁྲི་ཤིང་དབང་རྒྱལ་ངན་འགྲོར་བརྒྱུད་པ་ལ་བདེ་གཤེགས་ཀུན་རིགས་སྒྲོན་མའི་ཆོ་གའི་ཞལ་ཕྱེས་ཏེ་སངས་རྒྱས་ཀྱི་ས་ལ་བཀོད་དོ།།
བཞི་པ་ནི། རྒྱལ་པོ་ཧ་ལ་ར་ཙ་དང་གུ་ཝེར་ར་ཙ་གནས་གཡུལ་འཐབ་པའི་ཕན་ཚུན་དམག་མི་སྟོང་ཕྲག་དགུ་བསད་པས་གསོན་བཞིན་དུ་དམྱལ་བའི་སྡུག་བསྔལ་མཐོང་ནས་འགྱོད་པ་སྐྱེས་ཏེ་སྟོན་པ་ལ་བཤགས་པའི་ཐབས་ཞུས་པ་ལ་ཀུན་བཟང་རྒྱལ་བ་རྒྱ་མཚོའི་དཀྱིལ་འཁོར་ཞལ་ཕྱེས་པའི་ཐུགས་རྗེས་ལས་སྒྲིབ་བྱང་ནས་ཚེ་འདས་རྣམས་དང་ཞིང་ཁམས་ཀྱི་མི་ཚོགས་བསགས་སྒྲིབ་པ་བྱང་བ་རྣམས་སངས་རྒྱས་སོ།།
声明：
生根活佛微信公众平台开通赞赏功能，您的赞赏红包，全部用于文章作者生根活佛弘法利生事业中。