沪语新山歌：《想起阿拉小辰光》

         这次新出版的《上海壁角落》里，我收入了自己写的三首沪语新山歌。

        写新山歌的初衷是，那么多好玩的老上海话，想要传伊下去，假使就简单罗列一下，也没啥意思。别人也兴趣缺缺。

        我的英文老师有一个好比喻：单词是砖头，一堆砖头是不容易被记住的。文章是墙，把砖头粘合起来，一荣俱荣，一损俱损。要么都记住，要么都忘光。所以，他要我们背课文而不是只记单词。

        我想，老上海话里的成语（phrase）也是如此。那我就来砌几堵墙吧。

春天里么百花香，

喫饱仔饭唔没事体东趤西趤瞎趤趤。

趤法趤法就想起了阿拉小辰光。

伊辰光，

屋里向么螺丝壳里做道场，

大人正勒忙，

侬再投五投六投三仙，

勿识相，要吃辣火酱。

快点跑到外头去，

去阿哩？

脚踏西瓜皮，滑到阿里是阿里。

假使袋袋里向有铜钿，

搿么肯定头颈胁细，独想触祭。

反正猢狲不赅宝，

弗用忒反倒讨惹厌。

哪怕碰着七十二个大头鬼，

今朝也要用光伊。

一碗烂熩面，

刚刚端到眼门前，

已经眼睛像霍显，筷子像雨点，

牙齿像轧钳，喉咙像拉纤。

穷叫鲜是鲜得来，眉毛侪落光。

打仔耳光也弗肯放。

横竖横，拆牛棚，

吃光当光弗生疮。

万一强盗碰着贼爷爷，

反而买了炮仗拨人家放。

真是聪明面孔笨肚肠。

有排人，就是三等白相人，独吃自己人，

虽然本事好像猪头肉（咾）三勿精，

不过专门三六九，捞现钞，拗小分，捞横档，

烧香赶脱老和尚。

不如喫‍了肚皮里，有道是，

嫖是挜空，赌是白弄，着是威风，吃是真功；

有吃弗吃猪头三，

吃得着，就是额角头碰着天花板。

假使袋袋里向瘪缩缩，

门槛就要精到九十六。

做人弗好脚花乱，

香烟屁股也要讨来喫。

搿就叫

朋友轧得深，香烟屁股喫到根。

香烟屁股烫手，还好猛吸三口。

有道是

死要面子活受罪，

何必打肿面孔充胖子。

穷极无聊望野眼，

作兴碰着小垃三。

虽然是眠床底下放鹞子，

也要睏梦头里笑转来。

我本是万宝全书缺只角，

牛皮吹到野豁豁。

明晓得直升飞机吊蟹，悬空八只脚，

照样像阎罗王差小鬼，跑得来得快。

只要弗是湿手搭面粉，掼也掼勿忒，

我就要叫伊眼睛一眨，老母鸡变鸭。

啥人晓得马屁拍勒马脚浪，

新买马桶三日香。

花好稻好样样好，

弄到末脚勿入港。

半夜三更回转去，

一眼唔没落场势。

吃素碰着月大，南瓜生勒棚里，

明明唔没啥花头，还要装得像煞有介事。

这真是寒露开花不结子，

自家有病自家知。