༄༅།།འཛམ་གླིང་རིག་གནས་ཀྱི་ཤུལ་བཞག་གྲགས་ཅན། །
གངས་ཅན་རིག་མཛོད་ཀྱི་རིན་བྲལ་ནོར་བུ། །
བོད་པའི་བློ་གྲོས་ཀྱི་ཉིང་བཅུད་མཆོག་གྱུར། །
གླིང་སྒྲུང་གངས་རིའི་ཆབ་རྒྱུན།
（ཀྲུང་དབྱང་རླུང་འཕྲིན་ལས་ཁུངས་བོད་སྐད་འཕྲིན་ལམ་གྱི་གླིང་སྒྲུང་མུ་འབྲེལ་ལེ་ཚན།གཟའ་ཟླ་བ་ནས་པ་སངས་བར་གྱི་ཉིན་རེའི་དགོང་མོའི་ཆུ་ཚོད་དགུ་པའི་ཐོག་གཏོང་རྒྱུ།）
སྟག་གཟིག་ནོར་འགྱེད།
སྒྲུང་མཁན་ངོ་སྤྲོད།
པདྨ་ཡེ་ཤེས།
སི་ཁྲོན་ཞིང་ཆེན་དཀར་མཛེས་བོད་རིགས་རང་སྐྱོང་ཁུལ་སྡེ་དགེ་རྫོགས་ཆེན་གྱི་སྒྲུང་མཁན་གྲགས་ཅན་ཞིག་ཡིན་ཞིང་། སྤྱི་ལོ་༡༩༤༧ལོར་འཁྲུངས། ཆུང་ངུའི་དུས་སུ་ཁོང་གི་ཞང་པོ་མཁན་ཐུབ་བསྟན་སྙན་གྲགས་ཀྱི་དྲུང་ནས་བོད་ཡིག་འབྲི་ཀློག་སྦྱངས། པདྨ་ཡེ་ཤེས་ལྷན་སྐྱེས་ཀྱི་བློ་རིག་རྣོ་བ་དང་། ཆུང་ངུའི་དུས་ནས་གླིང་སྒྲུང་ལ་དགའ་ཞེན་ཆེ་བས། གླིང་སྒྲུང་གི་གདངས་དབྱངས་སུམ་ཅུ་ལྷག་ཙམ་ཁོང་དུ་ཆུད་པ་མ་ཟད། རང་ཉིད་ཀྱི་དམིགས་བསལ་ཁྱད་ཆོས་ལྡན་ཡོད། པདྨ་ཡེ་ཤེས་ཀྱིས་མི་ཚེ་ཧྲིལ་པོར་གླིང་སྒྲུང་འཆད་གྱེར་གནང་ཞིང་། དུས་རབས་གོང་མའི་ལོ་རབས་བརྒྱད་བཅུ་པའི་དུས་འགོར། ཁོང་གི་སྐད་པར་སྤྱིན་ཐག་ལ་སི་ཁྲོན་དང་། མཚོ་སྔོན། བོད་ལྗོངས་སོགས་ཀྱི་བོད་རིགས་མང་ཚོགས་ཀྱི་དགའ་བསུ་ཆེན་པོ་ཐོབ། ད་ཆ་ཁོང་དགུང་ལོ་བདུན་ཅུར་ཕེབས་ནའང་། སྔར་བཞིན་གླིང་སྒྲུང་འཆད་གྱེར་གནང་བ་དང་ཆབས་ཅིག་ཡུལ་མི་སྒྲིག་འཛུགས་ཀྱིས་གེ་སར་གར་འཆམ་སྒྲིག་འཛུགས་དང་འཁྲབ་སྦྱོང་གི་ཕྱག་ལས་གནང་མུས་སུ་མཆིས།
ཞག་གཅོད་བསོད་ནམས་ཉི་མ།
སྤྱི་ལོ་༡༩༦༩ལོར་བོད་ལྗོངས་ཆབ་མདོ་ལྷ་ཐོག་ཏུ་འཁྲུངས། དགུང་ལོ་བདུན་གྱི་ཐོག་སློབ་གྲྭར་ཞུགས། དགུང་ལོ་བཅུ་གཅིག་ཐོག་ཆོས་སྒོར་ཞུགས། ཁོང་ཆུང་ངུའི་དུས་ནས་བློ་རིག་བཀྲ་ཞིང་དྲན་ཤེས་བརྟན། ཁོང་གིས་ཆོས་ལུགས་ཐད་ནས་བླ་སྤྲུལ་སྐྱེས་ཆེན་དུ་མའི་ཞབས་ལ་གཏུགས་ནས་ཐོས་བསམ་གནང་བས་ཆོས་ཀྱི་མཁྱེན་པ་ཟབ་ཅིང་ཡངས་པར་གྱུར། དེ་དང་ཆབས་ཅིག་ཁོང་གིས་ལྷ་ཐོག་རྒྱལ་པོའི་དངོས་སློབ་མཛོ་པ་བཟོད་པའི་སྐུ་མདུན་ནས་གླིང་སྒྲུང་འཆད་གྱེར་གྱི་དབྱངས་རྟ་སློབ་སྦྱོང་གནང་། ཆོས་གྲྭར་ཞུགས་རྗེས་སྔར་བཞིན་གླིང་སྒྲུང་ལ་མཉེས་པོ་དང་འཆད་གྱེར་གནང་གི་ཡོད་ཅིང་། ཁོང་གི་གསུང་སྐད་བརྗིད་ཉམས་ཆེ་ཞིང་ཡིད་ལ་འཇེབས་པ་དང་། ནང་ཆོས་ཀྱི་ཡིད་དབང་འགུག་ནུས་ཆེན་པོ་ལྡན། ཁོང་ནི་ཁྱུང་པོ་སྟེང་ཆེན་ལ་ཐོག་ཞག་གཅོད་དགོན་དུ་འགྲོ་དོན་བསྟན་པ་སྐྱོང་བཞིན་བཞུགས་ཤིང་། དཔལ་སྤུངས་ལུགས་ཀྱི་བརྒྱུད་པའི་དབུ་མཛད་ཆེན་མོ་ཡང་ཡིན།
བུ་ཤེ།
ལྷ་བྲིས་པ་དང་སྒྲུང་མཁན་ཞིག་ཡིན། ཁོང་སྤྱི་ལོ་༡༩༦༥ལོར་སི་ཁྲོན་ཞིང་ཆེན་དཀར་མཛེས་ཁུལ་སྡེ་དགེ་རྫོང་དུ་འཁྲུངས། དགུང་ལོ་ལྔའི་ཐོག་དཔལ་སྤུངས་དགོན་དུ་བོད་ཡིག་འབྲི་ཀློག་སྦྱངས། དགུང་ལོ་བཅུ་བདུན་སྐབས་དཔལ་སྤུངས་དགོན་དུ་ལྷ་བྲིས་སྦྱངས། བུ་ཤེའི་ཡབ་ནི་རྒྱལ་ཡོངས་སུ་སྙན་གྲགས་ཆེ་བའི་སྒྲུང་མཁན་དིལ་ཆུང་དཔལ་ཆེན་ཡིན་པ་དང་། ཡབ་ཀྱི་ཤུགས་རྐྱེན་འོག་ཁོང་གིས་ཆུང་ངུའི་དུས་ནས་ཉིན་རེར་གླིང་སྒྲུང་གི་དབྱངས་རྟ་དུམ་བུ་རེ་སློབ་སྦྱོང་བྱེད་པ་དང་། རྒྱུན་དུ་གཞན་གྱི་ཁྱིམ་ཚང་དུ་གླིང་སྒྲུང་འཆད་གྱེར་གནང་གི་ཡོད། བུ་ཤེས་རང་ཉིད་ཀྱི་འབད་བརྩོན་དང་ནུས་ཤུགས་ལ་བརྟེན་ནས་གླིང་སྒྲུང་སྒྱུ་རྩལ་དེ་རྒྱུན་འཛིན་དང་དར་སྤེལ་གཏོང་རྒྱུ་དེ་རང་ཉིད་ཀྱི་འོས་འགན་ཞིག་ཏུ་བརྩི་བཞིན་ཡོད་ལ་དེ་རྒྱུན་འཛིན་དང་དར་སྤེལ་ཡག་པོ་གཏོང་རྒྱུའི་ཐད་ལའང་ཡིད་ཆེས་ཆེན་པོ་གནང་བཞིན་འདུག
བསོད་རྒྱལ།
སྤྱི་ལོ་༡༩༧༧ལོར་འཁྲུངས་ཤིང་། སྒྲུང་པ་གྲགས་ཅན་པདྨ་ཡེ་ཤེས་ཀྱི་བུ་གཞོན་པ་ཡིན། དགུང་ལོ་དྲུག་གི་ཐོག་ཡབ་ཀྱི་དྲུང་ནས་བོད་ཡིག་གི་འབྲི་ཀློག་སྦྱངས་པ་དང་། ཕྱིས་སུ་རྫོགས་ཆེན་དགོན་དུ་ཕེབས་ནས་རི་མོ་འབྲི་སྟངས་དང་གར་འཆམ་སོགས་ཀྱི་ཐད་སློབ་གཉེར་མཛད། སྤྱི་ལོ་༢༠༠༥ལོར་ནེ་པ་ལར་ཕེབས་ནས་པར་ལེན་དང་པར་རིས་སྒྲིག་བཟོའི་ཐད་སྦྱངས་པ་གནང་བས་པར་རིས་ཇུས་འགོད་དང་སྒྲིག་བཟོ་བྱེད་མཁན་ཞིག་ཏུ་གྱུར། མ་ཟད་ཁོང་སྒེར་ནས་གློག་བརྙན་གཉིས་རྩོམ་འབྲི་དང་འཁྲབ་འཁྲིད་གནང་། ཡབ་ཀྱི་ཤུགས་རྐྱེན་དབང་གིས་ཁོང་གིས་ཆུང་དུས་ནས་གླིང་སྒྲུང་ལ་དགའ་ཞིང་། གླིང་སྒྲུང་འཆད་གྱེར་སློབ་སྦྱོང་དང་བློར་འཛིན་གནང་། མིག་སྔར་ཁོང་མེས་པོ་གོང་མ་རྣམས་ནས་མཛད་པའི་སྒྱུ་རྩལ་གྱི་ཉིང་བཅུད་རྒྱུན་འཛིན་དང་དར་སྤེལ་གཏོང་རྒྱུའི་ཐད་ནུས་ཤུགས་ཡོད་རྒུ་འདོན་བཞིན་མཆིས།
༄༅། །གླིང་གེ་སར་རྒྱལ་པོའི་སྒྲུང་སྟག་གཟིག་ནོར་འགྱེད་ཅེས་བྱ་བ་བཞུགས་སོ། །（མུ་འབྲེལ།）
་
་
་
ཅེས་གསུངས་པས། གླིང་དཔའ་བརྟུལ་ཕ་ཁུ་སོགས་ཚང་མས་བཀའ་ཕེབས་དེ་བདེན་པར་གོ་ནས་ཕྱག་མཆོད་གསོལ་འདེབས་སྐབས། གཡས་གྲལ་གྱི་འགོ་ནས་བློན་ཆེན་ཚ་ཞང་འདན་མ་དེས། དར་ཁ་དོག་སྣ་ལྔ་དང་། སྟག་གཟིག་པགས་པ་དགུ་ཚན། གནམ་ལྕགས་རལ་གྲི་ཤུགས་ཁྲ་བཅས་ཕུལ་ནས། གཡའ། གླིང་རྗེ་སེང་ཆེན་རིན་པོ་ཆེ། སྔར་གསུངས་རྒྱལ་པོའི་བཀའ་དེ་བདེན། ཁྱེད་ནི་བོད་ལ་བཀའ་དྲིན་ཆེ། གོ་ན་གླིང་རུའི་ཕ་མ་འདྲ། གནང་འདི་ཙམ་སྦྱིན་པ་དགའ་སྤྲོ་ཆེ། སྟག་གཟིགས་གཡང་གི་དངོས་གྲུབ་འདི། རྒྱལ་པོས་མ་མཁྱེན་ཅི་ཡོད་དེ། ང་འདན་མའི་ཞུ་བ་ཨེ་འདྲ་ཡོད་ཟེར་ཞིང་གླུ་འདི་བླངས་སོ། །
གླུ་ཨ་ལ་ཐ་ལ་ལ་ལ་རེད། །ཐ་ལ་གླུ་ཡི་ལེན་ལུགས་རེད། །སྐྱབས་བླ་མ་ཡི་དམ་དཀོན་མཆོག་གསུམ། །གསོལ་བ་འདེབས་སོ་བྱིན་གྱིས་རློབས། །སྤྱི་གཙུག་བདེ་ཆེན་ཕོ་བྲང་ནས། །ཆོས་སྐུ་ལོངས་སྐུ་སྤྲུལ་སྐུ་གསུམ། །སྐུ་གསུམ་དགོངས་པས་བྱིན་གྱིས་རློབས། །ས་འདི་ས་ངོ་མ་ཤེས་ན། །རྨ་ཁམས་གླིང་གི་ས་ཆ་ནས། །ལྷ་གུར་དཀར་པོའི་ནང་ཤེད་རེད། །གཡས་གྲལ་གྲལ་གྱི་འགོ་མ་རེད། །ང་འདྲ་ང་ངོ་མ་ཤེས་ན། །ཤར་ལུང་རི་དྲུག་མཁར་ནང་ནས། །གདན་ཁྲི་གསུམ་རྩེགས་ཡང་སྟེང་ནས། །དཔའ་མི་འགྱུར་ཚ་ཞང་འདམ་མ་ཡིན། །ལྷ་ལ་དད་པ་ཆེ་མི་ཡིན། །དཔོན་ལ་བསམ་པ་དཀར་མི་ཡིན། །དགྲ་ལ་ཞེ་སྡང་ཚད་མི་ཡིན། །ཤི་ན་ཕངས་མེད་བྱེད་མི་ཡིན། །སྟོང་གཏམ་མ་ཡིན་དངོས་གནས་ཡིན། །དེ་ནས་རྒྱལ་པོ་རིན་པོ་ཆེ། །དགོས་འདོད་སྟག་གཟིག་ནོར་གཡང་འདི། །གླིང་དཀར་དམག་སྒར་དཀྱིལ་དུ་བཀོད། །ཕར་འཇོམས་དགྲ་དཔུང་མགོ་བོ་མནན། །ཚུར་ལ་ཟ་ཁ་གཏང་མ་བླངས། །ཚོ་དྲུག་རྒྱལ་ཁག་བཅོ་བརྒྱད་ལ། །ཁྲ་བོས་གནང་བགོས་ལོས་བྱེད་ཟེར། །དབུལ་པོ་རྒྱུ་དང་འཕྲད་པ་བྱེད། །བཀྲེས་པ་ཟས་ཀྱིས་ཚིམ་ལེ་བྱེད། །དངོས་གྲུབ་གནང་བགོས་ལོས་བྱེད་རེད། །ཡང་ན་དམག་དཔོན་གེ་སར་རྒྱལ། །གླིང་དཀར་རུ་ཤོག་རྒྱལ་ཁག་ལྔ། །རྒྱལ་པོ་ཁྱེད་དང་རྒྱལ་བློན་དྲུག །འགྲོ་དྲུག་འདྲེན་པའི་བསམ་པ་མཐུན། །གླིང་དཀར་དཔའ་བརྟུལ་འདན་མ་ངས། །དགྲ་ཁྲ་རྒོད་ཟླ་བ་མདའ་ཡིས་བསད། །ཤ་ཡི་ཤ་ལན་འདན་མས་བླངས། །བུ་དཔའ་བོ་དཔའ་བོའི་དཔའ་དར་དང་། །གནང་ཁྲ་མོ་བླངས་པའི་རྒོད་དར་དེ། །ཕོ་རང་ལ་ཡིན་ན་བབས་ཡོད་དེ། །ཁྲག་མཚོ་ཧོར་གྱི་དཔུང་ཤེད་ནས། །འཕྲུལ་བློན་ཧོར་གྱི་ཤན་པ་འདི། །རྒྱལ་པོ་ཁྱེད་ལ་བསམ་པ་དཀར། །དཀར་པོ་གླིང་རུའི་དཔུང་ཡ་ཚོ། །སེམས་གཡོ་སྒྱུ་མེད་པའི་བློན་ཆེན་ཡིན། །གཡུ་ལྷ་དུང་སྐྱོང་དཔའ་མོ་གསུམ། །ང་དང་སྐྱེན་པོ་མི་ལྔ་འདི། །རྒྱལ་ཁག་ལྔ་ཡི་འགོ་འཛིན་བྱས། །རྒྱལ་པོ་ཁྱེད་ཀྱི་ཞབས་ཞུ་སྒྲུབ། །རྒྱལ་པོ་ཁྱེད་ཀྱིས་ཐུགས་འཇགས་མཛོད། །དེ་ནས་ནོར་བུ་སྣ་ལྔ་འདི། །རྒྱལ་ཁག་ལྔ་ལ་བཞག་ན་བསམ། །རྒད་པོས་རང་འདོད་བཤད་ལེ་མིན། །ས་ལ་འབྲས་དྲུག་སྐྱེ་བ་དང་། །གནམ་ནས་སྦྲང་ཆར་འབབ་པ་དང་། །བཟང་གསུམ་རྟེན་འབྲེལ་འགྲིགས་ལེ་གདའ། །བསམ་པ་དཀར་པོའི་སྙིང་གཏམ་ཡིན། །རྒྱལ་པོའི་ཐུགས་ལ་དེ་འདྲ་ཞོག །གོ་ན་རྣ་བའི་བདུད་རྩི་གྱིས། །མ་གོ་གླུ་ཡི་ལེན་ལུགས་རེད། །
ཅེས་ཞུས་པས་དེར་གླིང་དཀར་ཚང་མས་འདན་མའི་གསུང་དེ་བདེན་ཏེ་ནོར་བུ་འདི་རྣམས་རྒྱལ་ཁག་སོ་སོར་བཀྲམ་ན་སྤྱིར་ནོར་བུ་འདི་རྣམས་ལ་བརྟག་ན་དགོས་འདོད་ཕུན་སུམ་ཚོགས། ཕྱི་རབས་བོད་ལ་དངོས་གྲུབ་ཀྱི་ཆར་རྒྱུན་འབེབས། དབྱར་རྩི་ཤིང་ལོ་འདབ་མེ་ཏོག་རྒྱས། ཚེ་བསོད་མངའ་ཐང་སྟོབས་རྩལ་དཔལ་འབྱོར་སོགས་རྒྱས་པ་འདུག་བསམས་ནས་ཐམས་ཅད་དགའ་བའི་ངང་ལ་བཞུགས། དེ་ནས་འཛམ་གླིང་སེང་ཆེན་རྒྱལ་པོའི་དགོངས་པར། འདན་མའི་གསུང་དེ་བདེན་ཏེ་ད་ལྟ་ཕྱི་རབས་སེམས་ཅན་རྣམས་ལ་གལ་ཆེ་བས་ནོར་བུ་འདི་རྒྱུན་ཆད་ཤོར་ན་འགྲོ་ཀུན་སེམས་ཅན་རྣམས་དངོས་གྲུབ་ཀྱི་སྐལ་པ་ཆད་འགྲོ་བ་ཡིན་པས། སྤྱི་དཔོན་འདི་ཕ་ཁུ་རྣམས་ཀྱི་འགོ་མ། ལོ་གྲངས་ནང་གི་མཐོ་བ། ལས་དང་བྱ་བ་ཅི་བྱས་ནའང་མཁས་པས་འདས་མ་འོངས་ད་ལྟ་དུས་གསུམ་ཐམས་ཅད་དགོངས་ཏེ། ཁོང་དྲག་པ་མཁྱེན་ཅིང་ཨ་ཁུ་ལ་ལན་གསུམ་གཟིགས་སྐབས་དེར། མདུན་གྲལ་གྱི་ནང་ནས་སྤྱི་དཔོན་རོང་ཚ་ཁྲ་རྒན་དེ་ཡར་བཞེངས་ནས་གེ་སར་རྒྱལ་པོའི་མདུན་དར་སྣ་ལྔ་ཕུལ། འདན་མ་དང་དཔའ་བརྟུལ་གང་དྲག་རྣམས་ལ་དར་རེ་ཕུལ་ནས། གཡའ། ཉོན་དང་ལྷ་རྒྱུད་རྒྱལ་བློན་རྣམས། ང་ཨ་ཁུའི་དྲན་ཚུལ་སྙན་ཞུ་འབུལ། བློ་ཡག་ཉེས་གང་ཡིན་ཐུགས་དཔྱད་མཛོད། ཟེར་ནས་གླུ་འདི་བླངས་སོ། །
གླུ་ཨ་ལ་ཐ་ལ་ལ་ལ་རེད། །སྐྱབས་བླ་མ་ཡི་དམ་དཀོན་མཆོག་གསུམ། །གསོལ་བ་འདེབས་སོ་ཐུགས་རྗེས་གཟིགས། །རིགས་དྲུག་ཆོས་ལ་འགྱུར་བ་ཤོག །སྲིད་གསུམ་བདེ་འགྲོ་ཐོབ་པར་ཤོག །དེ་རིང་ལྷ་དང་སྲུང་མས་གཟིགས། །ས་འདི་ས་ངོ་མ་ཤེས་ན། །རྨ་ཁམས་གཡང་གི་ར་བ་ནས། །ལྷ་གུར་དཀར་པོའི་ནང་ཤེད་ནས། །རྒྱལ་བློན་ཕུ་ནུ་མདུན་གྲལ་རེད། །ང་འདྲ་ང་ངོ་མ་ཤེས་ན། །དཀར་པོ་གླིང་རུའི་གཡང་ར་ནས། །ཁྲ་ཕུ་འཛམ་གླིང་ལ་ཁ་ཟེར། །མཁར་མི་འགྱུར་གནམ་རྫོང་ཕྱུག་མོ་ནས། །གདོང་མི་འགྱུར་རོང་ཚ་ཁྲ་རྒན་ཟེར། །དེ་ནས་གླིང་དཀར་རྒྱལ་བློན་ཚོ། །འདི་ལོ་སྟག་གཟིག་ནོར་གཡང་དེ། །དཀར་པོ་གླིང་ལ་འབེབས་པའི་ཚུལ། །རྒྱལ་བློན་རང་ཡུལ་འཁོར་ལེ་འདི། །ཀླུ་བདུད་མཚོ་ལ་ཆགས་པ་འདྲ། །རྟེན་འབྲེལ་ཆེ་ཚུལ་དེ་འདྲ་རེད། །དཔའ་བརྟུལ་རྩི་རྩི་གྲངས་མེད་འདི། །བསམ་པ་གླིང་དཀར་ཆོས་བློན་རེད། །དེ་ཡང་གནམ་གྱི་དང་པོ་ལ། །གཡུ་ལྷ་འདན་མ་ཤན་པ་དང་། །དུང་སྐྱོང་དཔའ་མོ་མི་ལྔ་འདི། །རྒྱལ་ཁག་ལྔ་ཡི་འགོ་དཔོན་རེད། །ཕོ་དཔའ་བོ་དཔའ་བའི་དཔའ་དར་དང་། །གནང་ཕྲ་མོ་བླངས་པའི་རྒོད་དར་དང་། །རྒོད་པོའི་དཔའ་དར་ལོས་དགོས་རེད། །ནག་པོའི་ནོར་དང་དཀར་པོའི་ལུག །ཁྲ་བོ་རྟ་དང་སྨུག་པོ་འབྲི། །ཁྱུང་དཀར་མཛོ་དང་མཛོ་མོ་སོགས། །སྟག་གཟིག་རྒྱལ་པོའི་ཕ་ནོར་རེད། །ཚོ་དྲུག་ནང་བགོས་བྱེད་རྒྱུ་རེད། །དཔའ་ཐང་ངར་བའི་དཔའ་བོ་རེད། །བློན་པོས་བསམ་པ་དཀར་ཚུལ་ལ། །དཔོན་པོས་བདག་རྐྱེན་ལོས་ཡོད་རེད། །མགོ་འདྲེན་གནང་བའི་འོག་སྡེ་འདིའི། །དཔོན་ལ་ཆབ་ཞུ་ཐིང་བས་ན། །བྱམས་སྐྱོང་སྡེ་ལ་ལོས་ཡོད་རེད། །དགྲ་བཞི་འདུལ་བའི་དཔའ་བོ་རེད། །གཏང་མ་ནང་ལ་བླངས་པས་ན། །རྒོད་པོར་དཔའ་དར་ལོས་ཡོད་རེད། །མི་དགོས་ཟེར་བ་སུ་ཡོད་དེ། །འཛམ་གླིང་རྒྱལ་པོ་གེ་སར་ཁྱེད། །འཛམ་གླིང་བདེ་ལ་འགོད་མི་རེད། །བོད་ལ་བཞག་པ་བྱེད་མི་རེད། །ཤཱཀྱ་ཐུབ་པའི་བཀའ་སྲུང་རེད། །ཨོ་རྒྱན་གཏེར་བཅུད་འཛུགས་མི་རེད། །འཁོར་བའི་སྔོན་བྱུས་འགོད་མི་རེད། །ཕ་ནོར་སྟག་གཟིག་ནོར་བུ་རྣམས། །སྒང་པ་བོད་ལ་ཕན་པའི་རྫས། །དགོས་འདོད་དཔའ་བརྟུལ་གནང་བཞག་ན། །བོད་ལ་བཞག་པ་ཨེ་ཡོད་ན། །རྒྱལ་པོས་མ་དགོངས་ཅི་ཡོད་དེ། །བོད་ཀྱི་འདོད་ཆུས་ཨེ་ཟུན་བསམ། །ང་ནི་རྒྱལ་པོ་ལྷ་ཡི་བུ། །ཟག་མེད་མངོན་ཤེས་ཐུགས་ལ་མངའ། །རྒྱལ་པོ་ཁྱེད་ཀྱིས་ལོས་མཁྱེན་རེད། །ང་སྤྱི་དཔོན་ཨ་ཁུའི་དྲན་ཚུལ་ལ། །ནགས་ཚལ་དཀྱིལ་འཁོར་མཐུག་པ་ན། །སྟག་མོ་འཛུམ་དྲུག་ཇེ་རྒྱས་རེད། །སྟག་ཕྲུག་དེ་ལ་དེ་འཁོར་རེད། །སྐྱེ་འགྲོ་རྒྱུན་དུ་མི་ཆད་འདུག །ནགས་ཚལ་སྡོང་པོ་ཆག་སོང་ན། །སྟག་མོ་འཛུམ་དྲུག་ག་ན་རྒྱས། །རྒྱ་མཚོ་ཁ་ཞེང་ཆེ་བས་ན། །ཀླུ་བདུད་རྩེ་ར་ལོས་རྒྱས་པ། །གསེར་ཉ་དེ་ལ་དེ་འཁོར་རེད། །རྒྱ་མཚོ་གཏིང་ནས་གྲམ་སོང་ན། །ཉ་སྲམ་འགྲོ་འགྲིམས་ག་ལ་ཡོད། །སྟག་གཟིག་ནོར་བུ་སྣ་བདུན་འདི། །ལྷ་ལ་བཀའ་གཏད་བཞག་པས་ན། །བོད་ལ་བདེ་སྐྱིད་ཇེ་རྒྱས་རེད། །ཡུལ་སྡེ་དེ་ལ་དེ་འཁོར་རེད། །ནོར་བུ་རྒྱུན་དུ་མ་ཆད་ན། །དགོས་འདོད་རང་མོས་བྱེད་པས་ཆོག །ཐ་མ་རྒྱུན་དུ་ཆད་སོང་ན། །སྒང་པ་བོད་ཀྱི་རྟེན་འབྲེལ་འཆུག །རྩ་མཆོག་རྒྱས་རྒྱུ་ག་ལ་ཡོད། །རྒྱལ་བློན་རྣམས་ཀྱིས་ཐུགས་བཞག་མཛོད། །གོ་ན་རྣ་བའི་བདུད་རྩིས་ཀྱིས། །མ་གོ་གླུ་ཡི་ལེན་ལུགས་རེད། །
ཅེས་ཟེར་བས་དེར་གེ་སར་རྒྱལ་པོས་སྤྱི་དཔོན་གྱི་གསུང་དེ་བདེན། སྟག་གཟིག་རྒྱལ་པོའི་ནོར་བསྒོས་གླིང་དཀར་གྱིས་བྱས་ན་བོད་ལ་བསྐལ་པ་བཟང་སྟེ་ནོར་བུ་སྣ་བདུན་འདི་ཡུལ་ལྷ་ཟོ་དོར་རྣམས་ལ་བཀའ་གཏད་བྱས་ན་ཇི་སྲིད་འཚོ་བའི་བར་ནོར་རྫས་རིགས་རྒྱུན་མི་ཆད་པ་དང་། ཕྱི་རབས་བོད་ལ་ས་བཅུད་ཡུལ་བཅུད་མི་རྒྱུའི་བཅུད་རིགས་བཟང་དགོས་པས། གཡའ། ཉོན་དང་གླིང་རུའི་ལྷ་སྡེ་རྣམས། རྒན་པོ་གླིང་རུའི་ཕ་ཁུ་དང་། རྒྱལ་བློན་ཕ་མའི་ནང་གྲལ་ལ། བོད་སྒང་པར་བཞག་པ་ཨེ་འདྲ་ཡིན། གླིང་ཁྲ་མོས་གནང་བགོས་ཨེ་འདྲ་བྱེད། ང་རྒྱལ་པོའི་བསམ་པ་ཨེ་འདྲ་ཡོད་གསུངས་ནས། གླུ་འདི་ལྟར་གསུངས་སོ། །
གླུ་ཨ་ལ་ཐ་ལ་ལ་ལ་རེད། །ཐ་ལ་གླུ་ཡི་ལེན་ལུགས་རེད། །སྐྱབས་བླ་མ་ཡི་དམ་དཀོན་མཆོག་གསུམ། །སྐུ་མི་འགྱུར་གསལ་ལ་སྤྱི་བོར་བཞུགས། །བཞུགས་ནས་བྱིན་གྱིས་བརླབ་ཏུ་གསོལ། །གླུ་མཆོད་ཅིག་སྒྲོལ་མ་དཀར་མོ་མཆོད། །མཆོད་གཉིས་སྒྲོལ་མ་སྔོན་མོ་མཆོད། །མཆོད་གསུམ་རིགས་གསུམ་མགོན་པོ་མཆོད། །དེ་རིང་ལྷ་ཁམས་གྲོགས་ལ་བྱོན། །ས་འདི་ས་ངོ་མ་ཤེས་ན། །རྨ་ཁམས་གཡང་གི་ས་ཆ་རེད། །ལྷ་གུར་མཐོང་བ་དོན་ལྡན་རེད། །མི་ང་དང་ང་ངོ་མ་ཤེས་ན། །མི་དབང་གླིང་རྗེ་གེ་སར་ཟེར། །དེ་ནས་རྨ་ཁམས་གླིང་རུའི་སྡེ། །ཡང་སྒོས་རུ་འདྲེན་རྒྱལ་ཁག་ལྔ། །ཉོན་དང་འདྲ་མ་ཨེ་འདྲ་ཡོད། །སྟག་གཟིག་ནོར་རྫོང་ཕ་ནོར་རེད། །ད་ལོ་དཀར་པོ་གླིང་ལ་བབས། །ཚོ་དྲུག་གླིང་པས་གནང་བགོས་རེད། །ཡ་མཚན་ཆེ་བ་ཨེ་འདྲ་ཡིན། །ཁྲ་བོ་ནོར་གྱི་གནང་བགོས་རེད། །དེ་རིང་སྤྱི་དཔོན་ཁྱེད་ལ་བབས། བགོས་ཡ་མཚན་ཅན་དེ་ཨ་ཁུས་གྱིས། །མི་རྒན་མཁས་ན་གཡང་རྒན་རེད། །སྟག་གཟིག་ནོར་ཆ་བདུན་པོ་འདི། །རྒྱལ་ཁག་ལྔ་ལ་བགོས་པས་ན། །ད་ལྟ་དངོས་གྲུབ་ལོས་རྒྱས་ཏེ། །ཕྱིན་ཆད་ཅི་ཡང་ཆ་མེད་རེད། །བོད་ཀྱི་དངོས་གྲུབ་ཆད་སོང་ན། །འཁོར་བ་ཆགས་ཐབས་དཀའ་མོ་རེད། །དེ་འདྲ་མ་བཟོ་འདི་འདྲ་བཟོ། །ཡུལ་ཕྱོགས་སྐྱོང་བའི་གཞི་བདག་དང་། །གཉན་ཆེན་དམག་དཔུང་འཁོར་བཅས་པ། །རྒྱལ་པོ་ང་ཡིས་བཀའ་གཏད་བྱེད། །ནོར་བུ་སུ་ཐོབ་གང་བབས་གྱིས། །ཁྲ་བོ་ཤྭ་ཡི་གདམ་ག་བསྐོར། །བར་གྱི་དབུས་གཙང་རུ་བཞི་ནས། །བོད་ཀྱི་བན་ནེ་རི་བཀྲ་དང་། །དོམ་ཤོག་གཉན་ཆེན་ཐང་ལྷ་དང་། །སྲིད་པ་ཆགས་པའི་ལྷ་དགུ་དང་། །འགུལ་ལྷ་བཅུ་གསུམ་འཁོར་དང་བཅས། །དེ་རིང་སྐྱེས་བུའི་གྲོགས་ལ་བྱོན། །ནོར་བུ་ནང་བགོས་བྱས་ཚུལ་འདི། །ཁྲ་བོའི་ཤྭ་ལ་གདམ་ག་གཟིགས། །ཇོ་བོ་སྒྱོགས་ཆེན་སྡོང་ར་དང་། །རྫ་ཡི་རྫ་རྒྱལ་ཕན་ཕྱུག་དང་། །ཤར་གྱི་རྨ་ཆེན་སྤོམ་ར་དང་། །རྩེ་ལྷ་བཅུ་གསུམ་འཁོར་དང་བཅས། །དེ་རིང་སྐྱེས་བུའི་གྲོགས་ལ་བྱོན། །སྟག་གཟིག་ནོར་བུ་བགོ་བའི་ཚུལ། །ཁྲ་བོ་ཤྭོ་ཡི་གདམ་ག་བསྐོར། །ཚ་བའི་རྡོ་རྗེ་དྲེལ་དཀར་དང་། །ཟིལ་ཁྲོམ་རྡོ་རྗེ་གཡུང་དྲུང་དང་། །རྒྱ་ཡི་ཁ་ཤ་མུ་ནེ་དང་། །རྡོ་ཐི་གངས་དཀར་མཚན་བརྒྱད་དང་། །གཉན་ཆེན་སུམ་བརྒྱ་དྲུག་ཅུ་བཅས། །དེ་རིང་སྐྱེས་བུའི་གྲོགས་ལ་བྱོན། །སྟག་གཟིག་ནོར་རྫོང་བགོ་བའི་ཚུལ། །ཁྲ་བོ་ཤྭོ་ཡི་གདམ་ག་བསྐོར། །དྲིས་ཤོད་ཁ་བ་ལོག་རི་དང་། །མདོ་སྨད་བྲག་ར་ལྷ་རྩེ་དང་། །ལྷོ་ཡི་རོང་ལ་རྒྱལ་མཚན་དང་། །རོང་བཙན་ཁ་བ་དཀར་པོ་དང་། །རྒྱ་ནག་རི་བོ་རྩེ་ལྔ་དང་། །མི་ཉག་གཡུ་རི་རྩེ་རྒྱལ་དང་། །གླང་ཆེན་འགྱིང་རི་འཁོར་དང་བཅས། །མ་ཡེངས་སྐྱེས་བུའི་གྲོགས་སུ་བྱོན། །སྟག་གཟིག་ནོར་རྫོང་བགོ་བའི་ཚུལ། །ཁྲ་བོ་ཤྭོ་ཡི་གདམ་ག་བསྐོར། །ཤྭོ་འདི་སུ་བབས་གང་བབས་གྱིས། །དགོས་འདོད་ནོར་ཆ་བདུན་པོ་འདི། །ཁྱེད་གཉན་ཆེན་རྣམས་ལ་བཀའ་གཏད་ཡིན། །འཛམ་གླིང་རྒྱལ་པོའི་གཏེར་རྫས་ཡིན། །སྒང་པ་བོད་ལ་འཇོག་རྒྱུ་ཡིན། །བསམ་དོན་འགྲུབ་པ་ད་རེས་ཡིན། །ལྷ་ཀླུ་གཉན་གསུམ་འཁོར་དང་བཅས། །དངོས་གྲུབ་རྒྱལ་པོའི་གླུ་དབྱངས་འབུལ། །ལྷ་ཚོགས་ཐུགས་ལ་དེ་ལྟར་ཞོག །གོ་ན་རྣ་བའི་བདུད་རྩི་གྱིས། །མ་གོ་གླུ་ཡི་ལེན་ལུགས་རེད། །
（ཚན་པ་གོང་མར་གསན་འདོད་ཚེ་འདིར་ནོན།）
ཡོང་ཁུངས། ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས།