中秋佳节，崇明人这样过......

点击上方“上海农场知青网”可以订阅哦

“天上一轮才捧出，人间万姓仰头看”，全民族个节日中秋节到特，崇明人俗称“八月半”。从《崇明县志》里看到，400年前个明朝万历年间，岛浪厢个老祖宗就勒勒过八月半个特。小辰光听老人讲过，清朝搭子民国年间，崇明人是哪能过八月半个，真个叫老传统勒，后来搭子现在也是革样子过个。今天就是中秋节啦，来看看吾俚崇明人是怎么过节的吧~

八月半赏月吃月饼，是全国一样个。我里崇明爱有自家个风俗习惯嘞，过节革天吃个物事，除脱月饼外，爱有芋艿、番芋、毛豆结、长生果、番瓜。

月饼，勒勒老手里叫“果馅”。解放前后，收算一年一趟过八月半，也弗是家家人家吃得转月饼个，家境好个末买几只，推扳个末弗买。特别是农村里，钞票呒得，除非卖脱几只蛋买只把月饼骗骗小囡，总话过八月半吃月饼特。一段时间粮食统购统销，买月饼爱要粮票、糕点券个勒。1959年到1962年个困难时期，粥汤浪也吃勿着，月饼更加拗话特。

从解放直到六、七十年代，崇明吃个基本上是苏式月饼，手工做个，做工考究，一层又一层屑屑薄，薄特来亮光也透得过，里厢个心子脱现在个百果月饼差勿多，一角洋钿有处买一只特。现在听起来价钱小煞，要晓得革辰光工钱钿小，企事业职工只不过30块依上依下，农村里更加呒来生，革落吃月饼是当大事体个。

革辰光过八月半，大人裁拿月饼省拨小囡吃，自家稍微掰一眼尝一尝。小囡也晓得，吃一只月饼是弗轻容易个，弗会大大舒舒咬一口，特别是里厢个心子，又甜又香，交关想吃又弗舍得吃脱夷，先是舌头舔舔甜味，然后咬一小口，慢慢叫磨磨，让夷一点一点烊勒嘴里，最后咽下去。我当年也是革样子吃月饼个，而且一只月饼要吃一天勒，就是吃子一点囥好，过一歇爱吃一眼；或者今朝吃子点，明朝甚至后日吃通！有一趟我拿革种事体话勒孙子听，孙子笑来就是弗相信，爱话是天方夜谭勒呐！

现在是大勿同特，乡下也好，城里也好，过八月半个月饼弗单买勒多，爱要高档，苏式个、广式个、甜个、椒盐个，百果个、蛋黄个、火腿个、海鲜个，喜欢个就买，囤勒屋里厢，老个小个要吃哪革样就拿哪革样。

忒多特末吃来厌特，革两年八月半吃夜晚个辰光，一只月饼一斩四或是一斩八，一家老小爱是吃勿脱。朋友道里讲孛相，好多人家也是革样子，革就叫日脚好过特，物事多特，月饼何稀奇？

上面讲过，崇明特有个传统，过八月半吃芋艿、长生果、番芋、毛豆结、番瓜。中秋节个晨光，革几样货色算是有处吃特，不过呒宁长来熟透勒，农业社、人民公社革先，只有少煞个自留地里种一眼芋艿等辈，是弗舍得一棵一挖头个，看哪革棵催荷多勒大，轻轻叫用斜刀尖拨开烂泥，拣大个芋艿子扳下来，拿烂泥拨拨拢掩好，让小芋艿爱长，再到别一棵芋艿浪拣。番芋也革样子拣个，拨开烂泥扳大个，小个留勒地里。毛豆结采长足个，瘪个拗采夷。长生果弗大好拣，只好一道挖出来，老点个晒子囥到过年炒来吃，嫩点个八月半派用场，煠长生果要对嫩一眼个好吃。番瓜老早采好个特，放勒日头晃里晒勒绯绯红，吃出来沙腻腻，甜头足。

革几样物事，番瓜是烧粥个，暖荡荡，甜津津。芋艿、长生果、番芋、毛豆结是煠来吃个，一般是放勒一只镬子里煠个。有个喜欢白煠弗放盐，有个喜欢吃咸个，拿毛豆结两头个角剪脱，让咸味走进去。番芋本是甜个，放勒最高处，实际上是蒸熟个，咸味走勿着，吃出来就弗会甜勿甜咸勿咸特。

记忆里，直到现在，弗管城里乡下，八月半吃月饼、芋艿、番芋、毛豆结、长生果、番瓜粥，裁勒勒夜来革顿，因为日里要上班或者田里做生活，小囡勒勒学堂里，到子夜快末裁回转特，一家六门过八月半特。

家长勒勒早上或者点心行浪，就已拿芋艿、番芋听汰干净，夜快一到屋里就放勒镬子里煠，爱一只镬子里烧番瓜。弗多一歇，香味就跟子热气出来特，小囡对直问“熟末呒熟”，又横斋竖斋，真叫“煠蟹等勿得红”。

崇明人个赏月，也自有特色，假使是好天呒得大风弗大荫，就勒场心浪吃夜饭，男女老少团团坐，一边吃月饼、芋艿、番芋、毛豆结、长生果，一边看月亮，男客爱吃点酒，拿毛豆结、长生果审审。小囡吵来叫大人讲月亮个故事，像嫦娥奔月啦，吴刚砍桂花树啦，爱有月宫里个白兔啦、癞沟把啦。

要是天色弗大好，八月半个夜饭就勒屋里吃，不过月亮总归是要看个，大人也好，小人也好，吃子一歇出去望望，特别是小囡，跑进跑出，一歇进来话月亮大来落，一歇进来话月亮圆来落，一歇又进来话月亮打云里出来特，拉子大人快去看。好点人睏到半夜把醒特，连牵豁下来隔窗子望望月亮，爱有追到外头去看个勒！

 

多一点途径

多一点选择

多一点机会

为42万上海农场知青

创造“比现在好”的生活服务

微信号ID：shnczq

长按图片识别二维码，马上关注！

投稿邮箱：[e-mail]

客服电话：63666110，63666133

（周一至周五9:00-17:30）