《ངའི་སྙིང་གི་ཨ་ལོང་ཡང་ལོང》མཐར་ཕྱིན་སློབ་མར་བྲིས་པའི་སྙན་ངག
2018ལོའི་ཟུར་མང་ལྔ་རིག་གཙུག་ལག་སློབ་གླིང་གི་སྐབས་ལྔ་པའི་མཐར་ཕྱིན་མཛད་སྒོ།
༢༠༡༨ལོའི་ཟུར་མང་ལྔ་རིག་གཙུག་ལག་སློབ་གླིང་གི་དགེ་རྒན་རྣམ་པ་དང་སྐབས་ལྔ་པའི་མཐར་ཕྱིན་སློབ་མའི་མཉམ་པར།
འཕགས་ཆེན། (ཡུལ་ཤུལ)
ལོ་གཅིག་ནི་ཐུང་ཐུང་ཞིག་མ་རེད
ལོ་གཅིག་ནི་རིང་རིང་ཞིག་མ་རེད
རིང་ཡང་རིང་ལ་ཐུང་ཡང་ཐུང་བའི་ལོ་འདིར
ངས་སེམས་ཀྱི་འོད་ཁང་རེ་རེ་བརྩེགས
ཁྱེད་ཚོས མེ་ལོང་གཅིག་ལ་མཉམ་དུ་བལྟས་ཏེ
སོ་སོའི་ངོ་གདོང་སོ་སོས་ཤེས་ན་བསམས
ལོ་གཅིག་གི་འཁོར་ལོའི་རྩིབས་ནས
ཁྱེད་ཚོས་ལོ་རྒྱུས་ཀྱི་གླེགས་བམ་བཀླགས
སྙན་ངག་གི་ཀུན་རྟོག་སྤྲོས
རྣམ་ཤེས་ཀྱི་གོམ་སྒྲ་ཇེ་མཐོར་སོང
ང་ཚོས་རྨི་ལམ་གྱི་བང་རིམ་ཞིག་བཞེངས་ཡོད་པ་དྲན་ནམ
ཁྱེད་ཚོ ནམ་ཡང་ངའི་སྙིང་གི་ཨ་ལོང་ཡང་ལོང་ཡིན
དུས་ཚོད་ཀྱི་རླུང་གཡུགས་རྗེས
དེ་རིང་གི་སྐར་མདའ་རེ་རེ་ཅི་ཡང་མ་རེད
ང་ཚོས་དབུགས་འབྱིན་རྔུབ་མཉམ་དུ་བྱས་ཏེ
དེ་རིང་གི་གར་སྟེགས་གསར་པ་འདི་བརྒལ་ཐུབ་སོང
ངའི་སེམས་ཀྱི་ལོ་མ་དམར་པོ
ངས་ཁྱེད་ཚོར་རྟེན་འབྲེལ་ཞུ
རྟེན་འབྲེལ་ནི་བརྩེ་དུང་ཞིག་རེད
རྟེན་འབྲེལ་ནི་གྲ་སྒྲིག་ཅིག་རེད
རྟེན་འབྲེལ་ནི་གོ་རིམ་ཞིག་རེད
རྟེན་འབྲེལ་ནི་རེ་སྨོན་ཞིག་རེད
ང་དང་ཁྱེད་ཚོའང་རྟེན་འབྲེལ་གྱི་མཐར་ཐུག་རེད
དེ་བས་རྟེན་འབྲེལ་ཞུ
དུས་ཚོད་ཕར་ཕར་སོང་རྗེས
ང་ཚོའི་བར་ལ་ཅི་ཞིག་གིས་འབྲེལ་བ་ཡོད་པ་ཤེས་སམ
བརྗེད་རྒྱུ་མེད་པའི་འདས་དོན་ནི་ང་ཚོའི་བར་གྱི་འབྲེལ་བ་རེད
རྙིང་རྒྱུ་མེད་པའི་འཆར་ཡན་ནི་ང་ཚོའི་བར་གྱི་འབྲེལ་བ་རེད
ཕྱི་འགྱངས་མེད་པའི་གོམ་སྟབས་ནི་ང་ཚོའི་བར་གྱི་འབྲེལ་བ་རེད
འཇིགས་པ་མེད་པའི་སྙིང་སྟོབས་ནི་ང་ཚོའི་བར་གྱི་འབྲེལ་བ་རེད
ང་ནི་རྟེན་གཞི་མཁྲེགས་པོ་ཞིག
ཁྱེད་ཚོ་ནི་གོར་མའི་ནགས་ཚལ་ཞིག
ང་ཚོ་ནི མ་འོངས་པ་ཟེར་བའི་དུས་ཚོད་ཀྱི་རུམ་ནས
བདེན་པའི་ཀ་བ་འདེགས་པའི་གྱད་མི་དེ་ཡིན་དགོས
ཤེས་རབ་ཀྱི་རལ་གྲི་ཐོགས་པའི་དཔའ་བོ་དེ་ཡིན་དགོས
རྨི་ལམ་གྱི་བདེན་པ་འཚོལ་བའི་ན་གཞོན་དེ་ཡིན་དགོས
2018/11/5ཉིན་ཟུར་མང་ལྔ་རིག་གཙུག་ལག་སློབ་གླིང་ནས་བྲིས།
འོག་ནས་ནོན་དང་ཤེས་བྱ་གསར་པ་མང་པོ་ལ་ལྟད་མོ་ལྟ་ཐུབ།