ལམ་གྱི་འཆར་ཡན། འཕགས་ཆེན་གྱི་སྙན་ངག་གསར་པ།

འཕགས་ཆེན་གྱིས་བརྩམས།

ཐོག་མར་ཕ་ཡུལ་གྱི་ནམ་མཁའ་ལ་བལྟས་ཏེ

ལམ་གྱི་འཆར་ཡན་ཞིག་རི་རྩེའི་སྤྲིན་དཀར་ལ་བྲིས

གངས་རི་དང་ལུག་ཁྱུའི་བར་གྱི་ཐོ་ཡོར་ཇི་བཞིན

བདག་གི་མིག་ཟུང་ལས་ཤོར་བའི་རི་ཆུའི་འདབས་ནས

ས་མཐའ་ནས་རྨི་ལམ་མང་བའི་བདེན་པ་དེ་བསམས་ན

ལམ་གྱི་སྣེ་མོ་གཞན་ཞིག་གང་དུ་ཡོད་པར་ཤེས་འདོད་ཀྱིས

ང་རང་འདི་ལྟར་གཉིད་ལས་སད་པ་བཞིན་ཆས་ཤིང

མཐའ་ལས་ལྷུང་དོགས་ལྟར་བུད་སོང

ད་ལྟ་མི་ཚོགས་ཀྱི་ངོ་གདོང་སྲ་ཞིང་མཁྲེགས

རི་ཆུའི་ཕར་ཚུར་རྩུབ་ཅིང་གྱོང

གནམ་སའི་ཐ་སྙད་འཇམ་ཞིང་སྙི

ངེས་གཟུང་མེད་པའི་དུས་ཚོད་ཀྱི་ཧྲག་བར་ན

ལམ་གྱི་སྣེ་མོ་རེ་རེ་གཟུགས་མེད་སྒྲ་མེད་ཀྱི་རྣམ་ཤེས་བཞིན

ངའི་མིག་ནས་ཡལ་ཞིང་སེམས་ཀྱིས་གཟུང་བའམ

ལུས་ཀྱིས་མྱོང་ཞིང་ཡིད་ནས་བོར་བའམ

སུས་ཀྱང་བཤད་མི་ཐུབ་པའི་རྣམ་རྟོག་ཀྱིས་དེད

ས་ཐག་རིང་ཐུང་ནི་སེམས་ཀྱིས་གཅོད་དགོས

ལམ་གྱི་ཕྲ་རགས་ནི་ཅི་ཡང་མིན་པ་འདྲ

རླངས་འཁོར་ཆེ་ཆུང་གི་ལྷུ་ལག་དང

མེ་འཁོར་སྣ་ཚོགས་པའི་མགྱོགས་ཚད་ཀྱིས

ཡུལ་དང་ཡུལ་ཅན་གཉིས་མེད་ལྟར་བསྒྱུར་བའམ

གནམ་གྲུ་དང་མཚོ་གྲུའི་འཁྱུག་འགྲོས་ཀྱིས

སེམས་ཀྱི་ཉིན་སྲིབ་གཅིག་ཏུ་སྒྲེལ་བའི་འགྲུལ་བཞུད་འདི

འཆར་ཡན་གྱིས་དབུ་འཁྱུད་བྲིས་ཏེ་ཤེས་རབ་ཀྱིས་མཇུག་སྡུད་འབྲི་ཐུབ་ན་སྙམ།

2018/12/19ཉིན་ནན་ཅིན་ནས་མཇུག་གྲུབ་པར་བྲིས།

འཕགས་ཆེན།

ཁྱེད་རང་ཕེབས་པར་དགའ་བསུ་ཞུ།

འདི་ན་འཕྲིན་གསར་ཞིག་ཡོད།

འཕགས་ཆེན་འཕྲིན་སྟེགས།

1 ལི་ཐང་ཚངས་དབྱངས་རྒྱ་མཚོའི་སྙན་ངག་བྱ་དགའ་ཐོབ་པའི་འཕགས་ཆེན་གྱི་བརྩམས་ཆོས།

2 གྱེར་འདོན།༽ དཔལ་ལྷ་མོ་ལ་ཕུལ་བའི་སྙན་ངག