བོད་ཀྱི་བྱིས་པ། འཕགས་ཆེན་གྱི་སྙན་ངག་གསར་པ།

 

བོད་ཀྱི་བྱིས་པ།

འཕགས་ཆེན་གྱིས་ཚིག་བརྩམས། 

ཤིང་གི་ལྷ་མོས་གྱེར་འདོན་བྱས།

བོད་ཀྱི་བྱིས་པ།

ཁྱེད་ཀྱི་མཛེས་སྡུག་གསལ་ལྷམ་མེར་ཡོད

མགོ་སྐྲ་བྱིལ་བྱིལ་མིག་ཟུང་ལྷེམ་ལྷེམ།

འཛུམ་མདངས་ཤིག་ཤིག་དགོད་སྒྲ་ལྷང་ལྷང་།

བཅོས་མིན་གྱི་གཤིས་ཀ་ལས་ཞི་འཇམ་གྱི་སྦྲང་ཆར་འབབ།

ལྷད་མེད་ཀྱི་སེམས་པ་ལ་དྭངས་གཙང་གི་ཉི་ཟེར་འཕྲོས།

ང་ནམ་ཡང་ཁྱེད་ཀྱི་སྤྱོད་ཚུལ་ལ་དགའ།

གལ་ཏེ་ང་རང་ཁྱེད་ཡིན་ན།

གལ་ཏེ་ཁྱེད་རང་ང་ཡིན་ན།

འོན་ཀྱང་ང་ཚོ་གབ་ཚིག་ཅིག་རེད།

བོད་ཀྱི་བྱིས་པ།

རྩྭ་ཐང་གི་ཞོགས་པ་ཅི་འདྲ་མཛེས་པ་ལ།

ཁྱེད་ཀྱིས་གཟིགས་དང་།

ཁྱེད་རང་འཛུམ་དུས་རྡོ་བ་རྣམས་ཀྱང་འཛུམ་བཞིན་ཡོད།

ཁྱེད་རང་ངུ་དུས་རྩི་ཤིང་དག་ཀྱང་ངུ་བཞིན་ཡོད།

ཁྱེད་ནི་མ་འོངས་པའི་ལོ་ཟླ་རེད།

ང་ནམ་ཡང་ཁྱེད་ཀྱི་འཇིག་རྟེན་ལ་དགའ།

རྩེད་ར་ཆུང་ཆུང་མ་རེད།

རྩེད་མོ་ཆེན་པོ་རེད།

ཁྱེད་ནི་ང་ཚོའི་གཏན་ཚིགས་སུ་བཀོད་ཡོད།

བོད་ཀྱི་བྱིས་པ།

ཁྱེད་ནི་བྲིས་མི་ཚར་བའི་ལོ་རྒྱུས་ཀྱི་གླེགས་བམ་ཞིག་ཡིན།

ཁྱེད་ཀྱི་ལང་ཚོ་དེ།

ཁྱེད་ཀྱི་འགན་འཁྲི་དེ།

ཁྱེད་ཀྱི་རྨི་ལམ་དེ།

གངས་རི་དང་སྦྲ་ནག་བརྒྱུད་ནས་སྨིན་དགོས།

གཙང་པོ་དང་ནས་ཞིང་བརྒལ་ནས་འབྱུང་དགོས།

སྙིང་སྟོབས་དང་ཤེས་རབ་བསྐྱེད་ནས་རྫོགས་དགོས།

དུས་ཚོད་དང་དུས་ཚོད་ཕྲད་པ་ལས།

ཡོད་ཚད་ཁྱེད་ཁོ་ན་ལ་དབང་ངེས།

            2019/4/15ཉིན་ཟུར་མང་ནས་བྲིས།

1 ཡུལ་ཤུལ་གྱི་སྙན་ངག་ཆེད་བསྒྲིགས། ༼ཁག་དང་པོ།

2 ཡུལ་ཤུལ་གྱི་སྙན་ངག་ཆེད་བསྒྲིགས། ༼ཁག་གཉིས་པ།

3 ཡུལ་ཤུལ་གྱི་སྙན་ངག་ཆེད་བསྒྲིགས། ༼ཁག་གསུམ་པ།

4 ཡུལ་ཤུལ་ཁུལ་མི་རིགས་སློབ་འབྲིང་སློབ་མའི་རྩོམ་ཡིག་ཆེད་བསྒྲིགས།

5 ལོ་ཉིན་ཞང་ཡུས་སློབ་འབྲིང་གི་གཙང་གསུམ་སློབ་མའི་རྩོམ་ཡིག་ཆེད་སྒྲིག