རྗེ་བཙུན་མི་ལའི་རྣམ་མགུར་ལས། དང་པོ༽ བླ་མ་དྲན་དྲུག་གི་སྐོར།
༄༅། ། རྗེ་བཙུན་མི་ལའི་རྣམ་མགུར་ལས། དང་པོ༽ བླ་མ་དྲན་དྲུག་གི་སྐོར།
ན་མོ་གུ་རུ། རྣལ་འབྱོར་གྱི་དབང་ཕྱུག་རྗེ་བཙུན་མི་ལ་རས་པ་དེ་ཉིད། མཆོང་ལུང་ཁྱུང་གི་རྫོང་ན་འོད་གསལ་ཕྱག་རྒྱ་ཆེན་པོའི་ངང་ལ་བཞུགས་པའི་དུས། ནམ་ཞག་གི་ཚེ་འཚོ་བའི་སྟ་གོན་ལ་བཞེངས་པས། ཕྱེ་ཚ་ཆུ་རྡོར་དག་ལྟ་ཅི་སྨོས་ཏེ། གོ་ཁ་ན་ཤིང་ཡང་མི་འདུག །ཐབ་ཁ་ན་ཆུ་དང་མེ་ཡང་མི་འདུག་པས། ངའི་འདི་ཧ་ཅང་རང་ཡང་བློས་བཏང་དྲགས་འདུག་པས། ཤིང་ཞིག་འཐུ་རུ་འགྲོ་དགོས་དགོངས་ནས་བྱོན་ཏེ། ཤིང་ཐུ་བ་གང་ཙམ་རྙེད་པའི་ཚེ། རླུང་ཆེན་པོ་ཞིག་གློ་བུར་དུ་ལངས་ནས། རས་བཟུང་ཚེ་ཤིང་ཁྱེར། ཤིང་བཟུང་ཚེ་རས་ཁྱེར་བ་ལས། ཐུགས་དགོངས་ལ། ང་སྔར་རི་ཁྲོད་དུ་དེ་ཙམ་ཞིག་ལ་བསྡད་རུང་། ད་དུང་བདག་འཛིན་བློས་མ་ཐོངས་བར་འདུག བདག་འཛིན་བློས་མ་ཐོངས་པའི་ཆོས་དང་སྒྲུབ་པས་ཅི་བྱེད་སྙམ། རས་དགའ་ན་རས་ཁྱེར། ཤིང་དགའ་ན་ཤིང་ཁྱེར་གསུངས་གཉིས་ཀ་བློས་བཏང་སྟེ་བཞུགས་པས། འཚོ་བ་ངན་པའི་སྟོབས་ཀྱིས་བསེར་མའི་རྣམ་པས་ཡུག་ཅིག་ཐུགས་དྲན་མེད་དུ་ཐིམ་པ་ལས། བཞེངས་པའི་ཚེ། རླུང་ཞི་བ་དང་རས་དེ་ཤིང་སྡོང་གཅིག་གི་རྩེ་ལ་ལིང་ངེ་འདུག་པ་དང་། ཐུགས་སྐྱོ་བའི་ཉམས་ཤར་བའི་ངང་ལ་ཕ་བོང་ལུག་རོ་ཙམ་ཞིག་གི་ཁར་མཉམ་པར་བཞག་པའི་མཐར། ཤར་ཕྱོགས་གྲོ་བོ་ལུང་གི་ཕྱོགས་སུ་སྤྲིན་དཀར་པོ་ཞིག་ལིང་བྱུང་བས། སྤྲིན་དེའི་འོག་ན་གྲོ་བོ་ལུང་གི་དགོན་པ་ཡོད། དེ་ན་ངའི་བླ་མ་སྒྲ་སྒྱུར་མར་པ་ལོཙྪ་དེ་བཞུགས་ཏེ་སྙམ་པ་དང་། བླ་མ་ཡབ་ཡུམ་མཆེད་གྲོགས་རྡོ་རྗེ་སྤུན་གྱི་འཁོར་དང་བཅས་པའི་དབུས་ན་རྒྱུད་ཀྱི་བཤད་པ་དབང་དང་གདམས་ངག་རྣམས་གནང་ཚུལ་དྲན་ནས། ད་ལྟ་བཞུགས་ན་ཅི་ལ་ཐུག་རུང་མཇལ་དུ་འགྲོ་བ་ཡིན་ཏེ་དགོངས་པ་དང་། སྔར་གྱི་སྐྱོ་ཤས་དེའི་ཁར། བླ་མ་དྲན་དྲགས། ཐུགས་སྐྱོ་བ་ལ་ཚད་ལས་འདས་པ་ཞིག་གི་ངང་ནས། སྤྱན་ཆབ་མང་པོ་བསིལ་ཞིང་། ཐུགས་སྐྱོ་བའི་གདུང་དབྱངས་བླ་མ་དྲན་དྲུག་གི་མགུར་འདི་གསུངས་སོ། །
ཕ་དྲན་པས་གདུང་སེལ་མར་པའི་ཞབས། །སྤྲང་གདུང་དབྱངས་ཐལ་ལོ་མར་པ་རྗེ། །བྲག་དམར་མཆོང་ལུང་ཤར་ཕྱོགས་ན། །ཆུ་འཛིན་སྤྲིན་དཀར་ལང་མ་ལིང་། །སྤྲིན་དཀར་པོ་ལྡིང་བའི་འོག་ཅིག་ན། །རྒྱབ་རི་གླང་ཆེན་འགྱིངས་པའི་མདུན་ཞིག་ན། །མདུན་རི་སེང་ཆེན་འགྱིང་འདྲའི་སྟེང་ཞིག་ན། །གནས་ཆེན་གྲོ་བོ་ལུང་གི་དགོན་པ་ན། །རྡོ་ཆེན་ཨ་མོ་ལི་གེའི་ཁྲི་སྟེང་ན། །གདན་ཁྲི་སྙན་ས་ལེའི་པགས་སྟེང་ན། །དེ་ན་སུ་བཞུགས་སུ་མི་བཞུགས། །དེ་ན་སྒྲ་སྒྱུར་མར་པ་བཞུགས། །དུས་ད་ལྟ་བཞུགས་ན་དགའ་བ་ལ། །ང་མོས་གུས་ཆུང་ཡང་མཇལ་སྙིང་འདོད། །གདུང་སེམས་ཆུང་ཡང་མཇལ་སྙིང་འདོད། །ང་བསམ་ཞིང་མཚན་ལྡན་བླ་མ་དྲན། །བསྒོམ་ཞིང་མར་པ་ལོ་ཙཱ་དྲན། །ཡུམ་མ་ལས་ལྷག་པའི་བདག་མེད་མ། །དུས་ད་ལྟ་བཞུགས་ན་དགའ་བ་ལ། །ས་བསྐོར་ཐག་རིང་ཡང་མཇལ་སྙིང་འདོད། །ལམ་བགྲོད་པར་དཀའ་ཡང་མཇལ་སྙིང་འདོད། །བསམ་ཞིང་མཚན་ལྡན་བླ་མ= །བསྒོམ་ཞིང་མར་པ= །རྒྱུད་ཟབ་མོ་དགྱེས་པ་རྡོ་རྗེ་དེ། །དུས་ད་ལྟ་གསུངས་ན་དགའ་བ་ལ། །ང་ཤེས་རབ་ཆུང་ཡང་འཛིན་སྙིང་འདོད། །བློ་གྲོས་ཆུང་ཡང་སྐྱོར་སྙིང་འདོད། །བསམ་ཞིང་= །བསྒོམ་ཞིང་= །སྙན་བརྒྱུད་བརྡ་ཡི་དབང་བཞི་དེ། །དུས་ད་ལྟ་བསྐུར་ན་དགའ་བ་ལ། །ང་འབུལ་བ་ཆུང་རུང་ཞུ་སྙིང་འདོད། །དབང་ཡོན་མེད་རུང་ཞུ་སྙིང་འདོད། །བསམ་ཞིང་= །བསྒོམ་ཞིང་= ཁྲིད་ཟབ་མོ་ནཱ་རོ་ཆོས་དྲུག་དེ། །ད་ལྟ་གསུངས་ན་དགའ་བ་ལ། །ང་སྙིང་རུས་ཆུང་རུང་ཞུ་སྙིང་འདོད། །ང་སྒོམ་སྲན་ཆུང་རུང་བསྒོམ་སྙིང་འདོད། །བསམ་ཞིང་= །བསྒོམ་ཞིང་= །མཆེད་གྲོགས་དབུས་གཙང་དད་འདུས་དེ། །ད་ལྟ་བཞུགས་ན་དགའ་བ་ལ། །ང་ཉམས་རྟོགས་ངན་རུང་བསྡུར་སྙིང་འདོད། །གོ་བ་ཞན་རུང་བསྡུར་སྙིང་འདོད། །བསམ་ཞིང་= །བསྒོམ་ཞིང་= །སྤྲང་མོས་གུས་ཀྱི་ངང་ནས་འབྲལ་མེད་ཀྱང་། །བླ་མ་སྙིང་ནས་དྲན་པ་ཡི། །འདོད་པའི་གདུངས་ནས་བཟོད་བླག་མེད། །དབུགས་སྟོད་དུ་འཚངས་ནས་སྐད་མ་ཐོན། །བུ་ཡི་གདུང་བ་སེལ་ཅིག་བཀའ་དྲིན་ཅན། །
འདི་ནས་ཡར་བརྩིས་པའི་མི་ཐོག་གསུམ་ཙམ་གྱི་སྔོན་དེ་སྤྱི་ལོ ༡༨༠༠ ཡི་སྨད་ཙམ་ལ་གསེར་རྟའི་སྟོད་ཀྱི་རོགས་བཟའ་སྡེ་བ་རུ་དབལ་ཤུལ་བླ་མ་སྒྲུབ་བརྒྱུད་ཟེར་བ་གསུང་སྐད་སྙན་པའི་ཚད་དུ་འཇོག་པ་ཞིག་འཁྲུངས། ཁོང་དགུང་གྲངས་ཉི་ཤུ་ལྷག་གི་དུས་སུ་དབུས་གཙང་ཕྱོགས་སུ་གནས་སྐོར་ལ་བྱོན་སྐབས་སྒྲ་བསྒྱུར་མར་པ་དང་། རྗེ་བཙུན་མི་ལ་སོགས་ཀྱི་མགུར་རྟ་མང་པོ་ཞིག་སྦྱངས་འོངས་བ་རེད་ཅེས་ངའི་ཕ་སྐུ་རྒྱབ་ཐོ་ལོ་ལགས་ཀྱིས་གསུངས་ཡང་ཁོང་གི་འཁྲུངས་འདས་ཀྱི་ལོ་ཚིག་ཞིབ་ཏུ་ཤེས་མཁན་མི་འདུག
དེ་ནས་བླ་མ་སྒྲུབ་བརྒྱུད་ལགས་ཀྱིས་གསེར་རྟའི་སྟོད་ཕྱོགས་སུ་མགུར་རྟ་མི་འདྲ་བ་མང་པོ་ཞིག་སློབ་ཁྲིད་གནང་ཞིང་། སྐབས་དེར་ངའི་ཕ་སྐུ་རྒྱབ་ཐོ་ལོ་ལགས་དང་། ལྷོ་བ་པད་ལོ་ཞུ་བ་གཉིས་ཀྱིས་ཁོང་གི་དྲུང་ནས་མགུར་རྟ་མང་པོ་ཞིག་སྦྱངས་གནང་མཛད་པ་རྗེས་སུ་ང་ལོ་བཞི་ལྔ་ཞིག་ཡིན་དུས་ནས་བཟུང་ངའི་ཕ་ལགས་ཀྱིས་སྔ་ཕྱིར་ང་ལ་རྗེ་བཙུན་མི་ལ་རས་པའི་མགུར་རྟ་སུམ་ཅུ་ལྷག་བསླབས།
ཡང་ན་ནིང་ཟླ་བ་གཅིག་ལྷག་ལ་བོད་ལྗོངས་ས་ཁུལ་གྱི་ལྷོ་བྲག་དང་། རོང་ཤར། སྐྱིད་རོང་སོགས་མི་ལ་རས་པ་དང་འབྲེལ་ཡོད་ཀྱི་ས་ཆ་མང་པོ་ཞིག་ལ་ཆེད་དུ་བསྐྱོད་ནས་མགུར་རྟ་རེ་ཟུང་ཤེས་མཁན་གྱི་མི་མང་པོ་ཞིག་ལ་བཅར་ཡང་དེ་དག་གི་མགུར་རྟའི་ཉམས་དང་འགྱུར་ཁུགས་སོགས་ནི་སྔོན་ཆད་ངས་སྦྱངས་མྱོང་བ་རྣམས་དང་གཏན་ནས་མི་འདྲ་བར་འདུག་པས། གནད་དོན་འདི་ལ་བསམ་ན་བོད་ཀྱི་གླུ་དང་རོལ་དབྱངས་ཀྱི་རིག་གནས་འདི་ཡང་སྣུམ་ཟད་ཀྱི་མར་མེ་ལྟ་བུར་གྱུར་དང་འགྱུར་བཞིན་ཡོད་པ་ཤེས་ཐུབ་པོ།།
སྤྱིར་ངས་དུས་ཡུན་རིང་པོ་ཞིག་ལ་རྗེ་བཙུན་མི་ལའི་མགུར་གཙོ་བོ་བྱས་པའི་མགུར་རྟ་མི་འདྲ་བ་མང་པོ་ཞིག་སྦྱངས་པའི་ཁྲོད་ནས། བླ་མ་དྲན་དྲུག་གི་མགུར་གཅིག་པུ་ལའང་ཡུལ་དབུས་ལྷ་ས་དང་། གཙང་གི་རོང་ཤར། དབལ་ཤུལ་གསེར་རྟ་བཅས་སུ་མགུར་རྟ་མི་འདྲ་བ་གསུམ་ཙམ་ཡོད་པ་ལས། ངས་སྐབས་འདིར་གྱེར་བའི་བླ་མ་དྲན་དྲུག་གི་མགུར་དབྱངས་འདི་གསེར་རྟའི་ཕྱོགས་ཀྱི་བླ་མ་སྒྲུབ་བརྒྱུད་ཀྱི་ལུགས་ལྟར་གྱེར་བ་ཡིན་ཅིང་། མགུར་རྟ་འདིའི་མིང་ལ་བུ་ཆུང་ཨ་མ་དྲན་པའི་གདུང་དབྱངས་ཞེས་ཟེར་བར་བཤད།
འདི་དང་འབྲེལ་ནས་ཚང་མའི་ཤེས་དགོས་པ་ཞིག་ནི། མགུར་རྟའི་གདངས་གཤིས་དང་འགྱུར་ཁུགས་ནི་དགོན་སྡེའི་ཆོས་སྤྱོད་ཀྱི་འདོན་དབྱངས་དག་དང་མི་འདྲ་ཞིང་། དམངས་ཁྲོད་ཀྱི་གླུ་དང་གཞས་ཀྱི་འགྱུར་ཁུགས་དང་དེ་ལས་ཀྱང་མི་འདྲ་བས། མགུར་དབྱངས་ལ་དེ་གཉིས་ལས་ཁྱད་དུ་འཕགས་པའི་སྙན་དང་འཇེབས་ཀྱི་བྲོ་བ་དམིགས་བསལ་ཞིག་ཡོད་པ་ཤེས་དགོས་པར་མ་ཟད། མགུར་གྱི་དགོས་ཆེད་ལྟ་བུ་ཞིག་ལ་མཚོན་ནའང་ཕྱི་གདོན་གྱི་བར་ཆད། ནང་འབྱུང་བ་ལུས་འཁྲུགས་ཀྱི་བར་ཆད། ཏིང་ངེ་འཛིན་སེམས་ཀྱི་བར་ཆད་དེ་མི་འདོད་པའི་རྐྱེན་ངན་དེ་དག་ཞི་བའི་ནུས་པ་ཡོད་པར་གསུངས་པ་སོགས་དམིགས་བསལ་ཚང་དགོས་པ་དང་། དེ་དག་གི་ཁྱད་ཆོས་སྐོར་གྱི་གནད་དོན་མང་པོ་ཞིག་ཡོད་ཀྱང་འདིར་བཤད་ན་མི་ཚར་བས་རེ་ཞིག་དེ་ཙམ་གྱིས་འཐུས་པར་བྱའོ།།
དེ་དང་སྐབས་བསྟུན་དབྱངས་རྟ་འདི་ལ་འཇམ་སྙན་གྱི་རོལ་དབྱངས་སྒྲིག་བཟོ་བྱེད་པ་པོ་རྒྱལ་སྤྱིའི་བོད་གྱི་རོལ་མོ་བ་གྲགས་ཅན་ཨ་མཆོག་མགོན་པོ་དོན་གྲུབ་ལགས་ཡིན་ལ། འདི་སྙན་ཞིང་ཡིད་དུ་འོང་བ་ཙམ་མ་ཡིན་པར་འགྲོ་བ་མིའི་སེམས་ཁམས་དང་འཚམ་པའི་རོལ་མོའི་གསང་གནད་རེ་འགའ་རྩལ་དུ་ཐོན་ཡོད་པས། རོལ་དབྱངས་སྒྱུ་རྩལ་ལ་མྱོང་རོལ་བྱེད་ཤེས་མཁན་ཞིག་ཡིན་ཚེ་དེར་ཐུན་མིན་གྱི་བྲོ་བ་གསོན་མཉམ་ལྡན་པ་རེ་མྱོང་རྒྱུ་ཡོད་དོ།།
འདིའང་བོད་ཀྱི་སྲོལ་རྒྱུན་རོལ་དབྱངས་ལ་ཆ་རྒྱུས་ཅུང་ཙམ་ཡོད་པའི་ཁར་མགྲིན་པའི་འགྱུར་ཁུགས་ཀྱི་གསང་གནད་ལ་བློ་རྒྱ་ཡངས་པ་སྐུ་རྒྱབ་ཚུལ་ཁྲིམས་སྙིང་པོའམ། བརྡ་སྤྲོད་ཀ་ལཱ་པའི་མིང་གཞན་བློ་ལྡན་རིག་པའི་དབང་ཕྱུག་ཏུ་འབོད་པ་དེས་ས་སྤྱོད་ཀྱི་ཞིང་སྤོས་ངད་ལྡན་པའི་གྲོང་ནས་སྤེལ་བ་དགེ་བར་གྱུར་ཅིག །།
1
མགུར་གྱེར་མཁན།
སྐུ་རྒྱབ་ཚུལ་ཁྲིམས་སྙིང་པོ།
长按二维码
关注我们