མངའ་བདག་མར་པ་ལོ་ཙཱའི་མགུར་ཆེན་ལམ་གླུ་རིང་མོ།
མར་པས་བོད་ལ་འབྱོན་པར་ཐུགས་ཆས་པའི་ཚེ། པུཥྤ་ཧ་རིའི་ནུབ་ཕྱོགས་ཨ་མྲའི་ཚལ་གྱི་ཤིང་དྲུང་ཞིག་ཏུ་གཟིམས་པའི་ཐོ་རངས་ཤིག་གི་ཐུགས་དགོངས་ལ། ངས་ཚེ་འདིར་བོད་ནས་རྒྱ་གར་ལ་ལན་གསུམ་ཡོང་བའི་སྔ་མ་ལ་ལོ་བཅུ་གཉིས། བར་པ་ལ་ལོ་དྲུག །ད་ལན་ལོ་གསུམ་སྟེ་ཉེར་གཅིག་སོང་བ་ལས། དཔལ་ནཱ་རོ་པ་རང་གི་དྲུང་དུ་ལོ་བཅུ་དྲུག་དང༌། ཟླ་བ་བདུན་བསྡད་འདུག །ཆོས་བྱས་པ་ལ་གྲུབ་ཐོབ་ཀྱི་བླ་མ་རྣམས་དང་མཇལ། སྒྲ་སྐད་དང་སློབ་གཉེར་ནི་མཐར་ཕྱིན་པ་ཤེས་དགོངས་ཏེ་དགྱེས་བཞིན་བོད་དུ་འབྱོན་པ་ལ། བླ་མ་དང་མཆེད་གྲོགས་རྣམས་ཤུལ་དུ་ལུས་པ་ནི་ཐུགས་འཕྲེང༌། ལམ་བར་གྱི་ཆུ་འཕྲང་ཨར་ཇག་ལ་སོགས་པ་རྣམས་ལ་ནི་འཚེར། སློབ་གཉེར་རྗེས་གདམས་ངག་ཁྱད་པར་ཅན་རྣམས་ཐོབ་ནས། བོད་དུ་འབྱོན་པ་ལ་ནི་བྲོད་པའི་ཐུགས་ཉམས་དྲག་པོ་ཞིག་ཤར་བ། པཎ་ཆེན་ནཱ་རོ་པ་ལ་ཕྱི་ཕྱག་གི་ཚུལ་དུ་ཚོགས་མཆོད་ཅིག་ཕུལ་བའི་གྲལ་དུ་ལོ་རྒྱུས་དང་བཀའ་གནང་ཞུས་ནས། བུང་བ་རྒྱང་རིང་དུ་འཕུར་འགྲོ་བའི་སྒྲ་ལ་རྟ་དྲངས་ནས་ཡོངས་སུ་གྲགས་པའི་མགུར་ཆེན་ལམ་གླུ་རིང་མོ་འདི་བླ་མ་དང་མཆེད་ལྕམ་རྣམས་ལ་ཕུལ་ལོ། །
རྗེ་འགྲོ་བ་འདྲེན་མཛད་སྐུ་དྲིན་ཅན། །
གྲུབ་ཐོབ་བརྒྱུད་པའི་བླ་མ་རྣམས། །
མི་ཁོ་བོའི་སྤྱི་གཙུག་རྒྱན་དུ་བཞུགས། །
རྒྱ་གར་གྱི་ནཱ་རོ་པཎ་ཆེན་དང༌། །
བོད་ཡུལ་གྱི་མར་པ་ལོ་ཙཱ་གཉིས། །
སྔར་སྦྱངས་སྨོན་ལམ་གཅིག་པས་མཇལ། །
ལོ་བཅུ་དྲུག་ཟླ་བ་བདུན་དུ་བསྟེན། །
དུས་སྐད་ཅིག་མ་བྲལ་འགྲོགས་པའི་ཕྱིར། །
ཐུགས་ལ་མི་འདོགས་སྐབས་མ་མཆིས། །
དཔལ་མེ་ཏོག་མདངས་འཕྲོག་གི་དགོན་པ་འདིར། །
དབང་བཞིའི་ཆུ་བོ་རྫོགས་པར་བསྐུར། །
སྙན་བརྒྱུད་ཀྱི་གདམས་ངག་མཐར་ཐུག་གནང༌། །
གཉིས་མེད་རྩེ་གཅིག་གཞིར་བཞག་ནས། །
སེམས་སྟོང་པ་ཉིད་ལ་སྦར་ཟིན་བྱས། །
ལུང་བསྟན་རྒྱལ་ཚབ་བཀོད་པའི་ཕྱིར། །
གླུ་འདིའི་རྗེས་ཟློས་མ་བཤད་ན། །
རྗེ་ནཱ་རོ་དང་མཻ་ཏྲིས་དབུ་མཛད་ནས། །
གྲུབ་ཐོབ་ཀྱི་བླ་མ་བརྒྱ་རྩ་གཅིག །
དཔལ་འཇིགས་མེད་གྲགས་པས་དབུ་མཛད་ནས། །
མཆེད་དང་ལྕམ་དྲལ་བརྒྱ་རྩ་གཅིག །
གྲུབ་ཐོབ་གནས་ཆེན་བརྒྱ་རྩ་གཅིག །
བྲམ་ཟེའི་ཁྱེའུ་གསེར་ཕྲེང་ཅན། །
ཤི་སྲོག་གིས་འཐུད་པའི་གྲོགས་པོ་བྱས། །
དེད་དཔོན་གྱི་བུ་མོ་སྔོ་སངས་མ། །
མཚན་ལྡན་དེ་རིག་མར་བསྟེན་བསྟེན་ནས། །
མཚོ་དུག་མཚོ་ཁོལ་མས་སྣ་དྲངས་ནས། །
དེ་མ་མཐོང་གོང་ནས་ང་རེ་འཇིགས། །
འདི་མ་མཐོང་གོང་ན་ང་རེ་འཇིགས། །
ཁྲེལ་མེད་ཤོ་གམ་ཆར་ལྟར་འབེབས། །
འདི་མ་མཐོང་གོང་ནས་ང་རེ་འཇིགས། །
སྐད་སྣ་བརྒྱ་དང་རྩ་བརྒྱད་ཤེས། །
གྲོགས་ལོ་ཙཱ་ཚོགས་ན་ང་རེ་བྲོད། །
དགྱེས་རྡོར་གདན་བཞིས་སྣ་དྲངས་ནས། །
རྒྱུད་འབྲེལ་བརྒྱ་དང་རྩ་བརྒྱད་ཤེས། །
གྲོགས་སྟོན་ཆེན་ཚོགས་ན་ང་རེ་བྲོད། །
བཀའ་གཞིའི་གདམས་པས་སྣ་དྲངས་ནས། །
སྙན་བརྒྱུད་བརྒྱ་དང་རྩ་བརྒྱད་ཤེས། །
གྲོགས་སྒོམ་ཆེན་ཚོགས་ན་ང་རེ་བྲོད། །
ཁྱད་ཆོས་བརྒྱ་དང་རྩ་བརྒྱད་ཤེས། །
བསྟན་སྲུང་བརྒྱ་དང་རྩ་བརྒྱད་ཤེས། །
རིམ་ལྔའི་དམར་ཁྲིད་མ་གཏོགས་པ། །
རྫོགས་རིམ་བརྒྱ་དང་རྩ་བརྒྱད་ཤེས། །
འབངས་དྲིན་ལན་གཞལ་གྱིས་མི་འཁོར་བས། །
རྗེ་མི་འབྲལ་སྤྱི་གཙུག་རྒྱན་དུ་བཞུགས། །
དེ་འོག་མཆེད་དང་ལྕམ་དྲལ་རྣམས། །
རྐྱེན་བར་ཆད་མེད་པའི་བྱིན་རླབས་ཞུ། །
དཔལ་ཨོ་རྒྱན་ཡུལ་ལམ་མཁའ་སྤྱོད་དུ། །
ཞེས་བླ་མ་ལོ་ཙཱ་བས་མགུར་དེ་བཞེངས་པས། མཆེད་གྲོགས་གོང་མར་གྱུར་པ། བྲམ་ཟེ་མུ་ཏ་ཀ་ཀརྟི་དང༌། རྣལ་འབྱོར་མ་སུ་ཀ་དྷ་རི་ལ་སོགས་པ་བརྒྱད་ཀྱིས་སྤྱན་ཆབ་ཤོར་རོ། །དེ་ནས་བླ་མ་མར་པས། བླ་མའི་སྐུའི་དཀྱིལ་འཁོར་ལ་དབང་བཞི་ཞུས། སྨོན་ལམ་བཏབ་ནས་བྱོན་པ་ལ། མཆེད་ལྕམ་གཤེགས་སྐྱེལ་བ་རྣམས་ཀྱིས་སྐུ་ཆས་ཀུན་བསྣམས། རྗེ་མར་པ་རང་གིས་པུཥྤ་ཧ་རིའི་རྡོ་སྐས་ཀྱི་རྩ་བར་མ་ཕེབས་བར་ཕྱི་འགྲོས་ཀྱིས། བླ་མ་ལ་གོམ་པ་རེ་ལ་ཕྱག་རེ་དང་ཐེམ་རེའི་སྟེང་ནས་ཕྱག་རེ་འབུལ་ཞིང༌། རྡོ་སྐས་རྫོགས་མཚམས་སུ། བླ་མ་ལ་གདུང་ཤུགས་དྲག་པོས་ཕྱག་མང་པོ་བཙལ་བའི་ས་དེར་ཡང༌། རྡོ་ལ་རྗེ་མར་པའི་ཞབས་རྗེས་ཤིག་བྱུང་བ་ད་ལྟ་ཡང་ཡོད་དོ། །དཔལ་ནཱ་རོ་པ་ཡང་སྐུ་ཚེ་འདི་ཉིད་ལ་མཁའ་འགྲོས་མཁའ་སྤྱོད་དུ་སྤྱན་དྲངས་པར་གདའ། རྗེ་མར་པ་ལ། བླ་མ་དང་མཆེད་ལྕམ་རྣམས་ཀྱིས་བྱིན་གྱིས་བརླབས་པར་མཛད་པས། བར་ཆད་མེད་པར་བོད་ཡུལ་ལྷོ་བྲག་ཏུ་ཕེབས་སོ། །
1
མགུར་གྱེར་མཁན།
སྐུ་རྒྱབ་ཚུལ་ཁྲིམས་སྙིང་པོ།
སྐུ་རྒྱབ་ཚུལ་ཁྲིམས་ལགས་ཀྱིས་གྱེར་བའི་མགུར་སྐོར་ཞིག
1 རྗེ་མི་ལའི་རྣམ་མགུར་ལས༼བསམ་པ་རྫོགས་པའི་མགུར༽ 米拉日巴道歌（古嘉慈诚唱）
长按二维码
关注我们
གཤམ་གྱི་རི་མོ་དང་མེ་ཏོག་སྟེང་ལན་རེ་ནོན་མཛོད།