ཉིན་དེར། | འཕགས་ཆེན།

ཉིན་དེར།

འཕགས་ཆེན།

འགྲོ་སའི་རི་རྒྱལ་ལྷུན་ཆགས།།

སེམས་ཀྱི་ཉིན་སྲིབ་དཀར་ནག།

ས་དེའི་སྒང་གཤོང་ཉུལ་ཞིང་།།

ཡུལ་དེའི་ཆགས་དབྱིབས་དཔྱད་དེ།།

ན་མ་སྤོ་ཐོ་གནོན་བཞིན།།

དམའ་དམའ་ཆུ་ཁའི་འགྲམ་དང་།།

མཐོ་མཐོ་རྫ་རི་དཀར་པོ།།

དེ་བཞིན་སྤང་སྒང་མཐོན་པོ།།

དྲན་ཤེས་ནམ་མཁར་བསྟེན་ཏེ།།

གོམ་པ་ཐགས་སུ་ཚུད་དེ།།

ལུས་པོ་རི་ལ་འགོས་ཏེ།།

རྔུལ་ཆུ་ས་ལ་ཟགས་ཏེ།།

དབུགས་ནི་ཧ་ཅང་ཧར་ཏེ།།

མགོ་བོ་ཡོམ་ཡོམ་འཁོར་ཏེ།།

མས་ནས་ཡར་ལ་འཛེགས་ཏེ།།

གྱེན་ནས་འོག་ཏུ་བབས་ཏེ།།

གཡས་ནས་གཡོན་དུ་བསྐྱོད་དེ།།

ཟུར་ནས་ལུགས་སུ་བསྒྱུར་ཏེ།།

ཉིན་མོ་དེ་ཡི་འགྲོ་འོང་།།

ཚེ་ཡི་མཐའ་ལ་ཐུག་ཀྱང་།།

སུས་ཀྱང་ཐེག་ཚོད་མ་རེད།།

དེ་འདྲའི་རི་བོའི་ཏོག་ནས།།

མིག་གཉིས་འཛུམ་ཙམ་བྱས་པས།།

སྨུག་པའི་རྒྱ་མཚོ་ལྟེམས་པ།།

རླུང་གི་དཀྱིལ་འཁོར་གཡོ་བ།།

ཉི་མའི་འོད་ཟེར་འབར་བ།།

སྤྲིན་པའི་ཁ་ཆུ་ཟགས་པ།།

རི་རྩེའི་པྲོག་ཞུ་མངོན་པ།།

སེམས་ཀྱི་འཆར་སྒོ་ཡན་པ།།

འཇིག་རྟེན་མིག་ལ་བབས་པ།།

དེ་ལྟའི་ས་མཐོ་གནམ་མཐོའི།།

ངོ་མཚར་མེ་ལོང་དེ་ག།

ཡིད་ཀྱི་གཞུ་ལ་བཀུག་ནས།།

སེམས་ཀྱི་མཐིལ་ན་ལྷུང་ཤིང་།།

དྲན་པའི་ངོགས་སུ་ཆགས་ཏེ།།

རྡོ་རྗེའི་གཤིས་ལ་འཕོས་སོང་།།

འཕགས་ཆེན།

(ཡུལ་ཤུལ)

ཡོངས་ཁུངས། འཕགས་ཆེན་འཕྲིན་སྟེགས།

རྩོམ་སྒྲིག་པ།：འཕགས་ཆེན།

公众号！©Pagchen杷青

འཕྲིན་སྟེགས་ལ་དོ་ཁུར་བྱོས།

བརྩམས་ཆོས་གསར་པ།

1 མི་ལ་ཐོས་པ་དགའ། | འཕགས་ཆེན།

2 ང་ཡི་བླ་མ་རྡོ་རྗེ་འཆང་དངོས་ཡིན། | འཕགས་ཆེན།

3ལྷ་ས། ངའི་མིག་གི་རྒྱལ་མོ། | དབྱངས་ཅན་ལྷ་མོའི་གྱེར་འདོན།

4དགུན་ཁའི་མགྱོགས་བྲིས། | བཀྲ་ཤིས་ཟླ་བ།

5སྙན་ངག་པའི་རྒྱལ་ཁམས། | འཇུ་སྐལ་བཟང་།

ཕ་འབྲོག་པའི་ཕ་ས་དར་བར་ཤོག | ཡོན་ཏན་ཤེས་རབ།