སྦྲང་ཆར་ཟིལ་མ། | འཕགས་ཆེན།
སྦྲང་ཆར་ཟིལ་མ།
སྦྲང་ཆར་ཟིམ་ཟིམ་དུ་འབབ་པ་ནི
དུས་ཚོད་ཀྱི་མེ་ལོང་འགྱུར་སྟངས་ཤིག་རེད
ཉིན་མོའི་ངལ་དུབ་ཀྱི་སྣང་བ་ནུབ་རྗེས
མཚན་མོའི་ཁ་ཆུ་ས་ལ་ཟགས་སོང
མཚན་མོ་འདིར
ཆར་བ་ཤག་ཤག་ཏུ་འབབ་པའི་སྒྲས
ཐོག་མར་ངའི་སེམས་པ་འདི་བརླན
སྒོ་ལ་བུད་དེ་བལྟས་པ་ན
སྐམ་ཐག་ཆོད་པའི་ངའི་གཟུགས་ཕུང་ཡང་བརླན
ནམ་མཁར་ཕྱོགས་ཏེ་ཀི་རིང་འདེབས་འདོད་དེས
རང་གིས་རང་ལ་དྲན་གསོ་ཞིག་བཏང་སོང
ཆར་པ་ཐོག་མར་འབབ་དུས
“ནད་བཀྲུའོ གདོན་བཀྲུའོ”
རྨོ་མོའི་སྐད་ཆ་རྙིང་པ་ཞིག་བསྐྱར་ཟློས་བྱས་འདུག
“ཆར་པ་ཆུ་གྲོགས ཉི་མ་མེ་གྲོགས”
གནའ་མིའི་གཏམ་དཔེ་འདི་དྲན་སོས
“སྡིག་པ་ཆུ་ཡིས་མི་བཀྲུ”བའི་ལེགས་བཤད་དེའང་དྲན་སོང
དུས་ཐོག་ཆར་པ
ངའི་རྣམ་ཤེས་འདི་གཙང་མར་བཀྲུས་ཏེ
སྐྱོ་གདུང་གི་ཐལ་རྡུལ་འཇགས་པར་ཞུ
ངས་མིག་བཙུམས་ཏེ་ཕ་ཡུལ་སྒོམ་ཆོག
རྣ་བ་བཀབ་སྟེ་སེམས་སྒྲ་ཉན་ངེས
སྦྲང་ཆར་ཟིལ་མ
ཆར་འབེབ་བྱེད་མི་དགོས་པར
དུས་ཐོག་ཏུ་བབས་པ་ཐུགས་རྗེ་ཆེ
ས་ཆེན་པོ
ལྭ་བ་སྐྱ་ཤུར་ཤུར་འདི་རྙིང་དྲགས་སོང
དགའ་སྟོན་དུ
ལྗང་མདོག་གི་རྒྱན་གོས་གསོལ་བར་ཞུ
ངས་སྙན་ངག་གི་དབྱངས་རྟ་འཐེན་བཞིན་ཡོད།
2021.4.18ཉིན་བྲིས།
ཡོངས་ཁུངས། འཕགས་ཆེན་འཕྲིན་སྟེགས།
རྩོམ་སྒྲིག་པ།：འཕགས་ཆེན།
公众号！©Pagchen杷青