༄༅། །སྨྲ་བའི་ལྷ་མོ་དབྱངས་ཅན་མར་ཅུང་ཟད་བསྟོད་པ་ངག་གི་ཟློས་གར་བཞུགས་སོ། །
འཇིག་རྟེན་དབང་པོའི་འཛུམ་ཞལ་གྱི། །མཚོ་རྫིང་ལས་སྤྲུལ་སྒེག་ལྡན་མ། །ངག་ལ་དབང་ཕྱུག་དབྱངས་ཅན་ལྷ། །བདག་བློའི་མཛའ་ན་མོར་སྦྲོན་སླད། །ངག་གི་ཡོན་ཏན་ཡོངས་འདུའི་དཔལ། །ཚིག་རྒྱན་སྤེལ་ལེགས་མནྡ་རས། །དད་པའི་སྙིམ་པ་ཡོངས་གང་བ། །མཆོད་སྤྲིན་ཕུང་པོར་ཅི་ཡང་སྤྲོ། །རྒྱལ་ཀུན་རྣམ་མཁྱེན་ཡེ་ཤེས་མཐུ། །ཧྲཱིཿཡིག་བདུད་རྩིའི་འོད་ཟེར་ཅན། །འཕྲོ་འདུའི་གར་གྱི་རྣམ་འཕྲུལ་གཟུགས། །མཚར་སྡུག་འདོད་པའི་དཔྱིད་ཀུན་འཇོ། །ཡེ་ཤེས་ཟླ་ཞལ་དག་པའི་མཚོར། །ཤེས་བྱར་ཆགས་བཅས་མཆུ་སྒྲོས་འཛུམ། །ཚེམས་དཀར་འོད་འཕྲོའི་ཆབ་གཙང་མས། །གཞན་ཡིད་རྟོག་པ་ཀུན་སེལ་བཞིན། །ཆོས་ཀུན་གཟིགས་པ་པུཏྤ་ལའི། །སྤྱན་ཟུར་རིན་ཆེན་ཀརྣི་ཀར། །རྗེས་སུ་ཆགས་པས་འཁྱུད་རིངས་པས། །སྨིན་འཁྱོག་གཞོན་ནུས་ལེགས་མཚམས་སྦྱོར། །ཕྱག་ཟུང་དཀར་འཇམ་བཻཌཱུརྱའི། །རྒྱུད་མངས་མཛའ་བོར་སེན་འབེབས་པས། །རྟག་པར་དམ་པའི་ཆོས་མ་ལུས། །གཞོམ་མེད་ནཱ་དའི་རང་སྒྲས་འདོམས། །ཡེ་ཤེས་སྒྱུ་མའི་མེ་ལོང་དུ། །མཚན་དཔེའི་འོད་རིས་དཔལ་རྫོགས་སྐུ། །སྒྲིབ་ཕྱིར་ལྷ་རྫས་གོས་དང་རྒྱན། །ཚར་དུ་དངར་ཏེ་ལྷག་པར་མཛེས། །པུཎྜ་རི་ཀའི་གེ་སར་སྟེང་། །བསིལ་ཟེར་པ་ཏྲར་འཁྱིལ་དབུས་སུ། །ཙོག་པུར་འགྱིང་བ་རྒྱལ་བའི་ཡུམ། །རྡོ་རྗེ་དབྱིངས་ཀྱི་དབང་ཕྱུག་མར། །བདག་སོགས་འགྲོ་བ་མ་ལུས་པ། །དད་པས་ཕྱག་འཚལ་སྐྱབས་གསོལ་ན། །མ་རིག་མུན་སྟུག་མཐར་བྱེད་པའི། །སྤོབས་པའི་མེ་ཆེན་སྦར་དུ་གསོལ། །བགྲང་ཡས་ཆོས་ཀྱི་ཚིག་དང་དོན། །སྐད་ཅིག་མངོན་པར་བྱང་ཆུབ་པའི། །མི་བརྗེད་གཟུངས་ཀྱི་སྒོ་བྱིན་ལ། །སྨྲ་བའི་དབང་པོར་བདག་གྲུབ་མཛོད། །ཉམས་དང་འགྱུར་བག་རྒྱུད་སྟོང་ལས། །སྙན་པའི་ཚིག་སྦྱོར་འདོད་འཇོའི་དཔལ། །མཁས་ཀུན་ཡིད་ཀྱི་བཅུད་ལེན་ཆེར། །བསྙེངས་མེད་སྦྱིན་ལ་དཔའ་བར་གསོལ།།
ཞེས་བྱ་བ་ནི་ཤངས་རྩ་རྗེ་དྲུང་གི་གསུང་ནན་གྱིས་བསྐུལ་ངོར། སྙན་ངག་སྨྲ་བ་མི་ཕམ་དགེ་ལེགས་རྣམ་པར་རྒྱལ་བའི་སྡེས། ཐུན་གསེང་གཅིག་གི་སུག་ལས་སུ་བསྟར་བ་མངྒ་ལཾ་ཀུརྺནྟུ། །
མཛད་པ་པོ།
བོད་མཁས་པ་མི་ཕམ་དགེ་ལེགས་རྣམ་རྒྱལ།
ཡོངས་ཁུངས། པདྨ་དཀར་པོ་འཕྲིན་སྟེགས།
རྩོམ་སྒྲིག་པ། འཕགས་ཆེན།
公众号！©Pagchen杷青