མངའ་རིས། | འཕགས་ཆེན།
མངའ་རིས།
ང་ཡི་མིག་གི་ཆུ་རླབས་གཡོ་བ་ན།།
མངའ་རིས་ཉི་མ་བཞིན་དུ་གསལ་ཞིང་འཚེར།།
མཐོན་པོ་ནམ་མཁའ་ཟེར་ཡང་རྐང་པའི་འོག།
དམའ་མོ་ས་གཞི་ཟེར་ཡང་མགོ་བོའི་ལྟག།
ང་ཡི་སེམས་ཀྱི་ཡོལ་བ་ཕྱེས་པ་ན།།
གངས་རི་ཟླ་བ་བཞིན་དུ་དཀར་ཞིང་གཙང་།།
རྩེ་མོ་དགུང་ལ་ཟུག་པ་ཉི་ཟླའི་ཡན།།
རྩ་བ་ཆུ་ལ་ནུབ་པ་ཟམ་པའི་མན།།
ང་ཡི་རྐང་པའི་ཡལ་འདབ་བརྐྱངས་པ་ན།།
ས་ཐང་ནམ་མཁའ་བཞིན་དུ་ཡངས་ཤིང་ཆེ།།
ཡ་མཐའ་སྤྲིན་ལ་འདྲེས་ཏེ་ར་བེ་རོབ།།
མ་མཐའ་མཚོ་ལ་ཐིམ་ནས་ནག་མ་ནོག།
ང་ཡི་ལག་པའི་སྨྱུ་གུ་འགུལ་བ་ན།།
མི་སེམས་ས་ཁྲ་བཞིན་དུ་དྲང་ཞིང་འཁྱོག།
འཁོར་བའི་ནགས་ལ་ཡན་པའི་ཆགས་སྡང་བཏབ།།
ཐར་པའི་ལམ་ལ་ཕྱོགས་པའི་བྱང་སེམས་བྲིས།།
ང་ཡི་གཏམ་གྱི་གློག་ཞགས་འཁྱུག་པ་ན།།
མངའ་རིས་སྐོར་གསུམ་འཛམ་གླིང་ཡང་རྩེ་འོ།།
ཆོས་བོན་སྲིད་ཀྱིས་མེས་པོའི་རྗེས་ཤུལ་བསྲུང་།།
གངས་མཚོ་གཡའ་ཡིས་སྲིད་པའི་མུ་འཁྱུད་འཛིན།།
2021/7/15ཉིན་མངའ་རིས་ནས་བྲིས།
འཕགས་ཆེན།
(ཡུལ་ཤུལ)
ཡོངས་ཁུངས། འཕགས་ཆེན་འཕྲིན་སྟེགས།
རྩོམ་སྒྲིག་པ།：འཕགས་ཆེན།
公众号！©Pagchen杷青