​ལྷ་མོའི་གཡུ་མཚོ། | ​པདྨ་ལྷ་མཛེས།

ལྷ་མོའི་གཡུ་མཚོ།

པདྨ་ལྷ་མཛེས། (ཡུལ་ཤུལ)

གཡུ་མཚོ་ནི་གོང་མ་ལྷ་ཡིས་མི་ཡུལ་དུ་གནང་བའི་ལེགས་སྐྱེས་ཡིན་པ་འདྲ་སྟེ། དེ་རུ་རྒྱལ་ཁ་དང་ཕམ་ཁ། ང་དང་ཁྱོད། ཁོ་དང་གཞན་ཞེས་ཕྲག་དོག་དང་དོ་ཟླ་མེད་པས། སེམས་ཅན་གྱི་ལྷད་མེད་ཀྱི་རྣམ་ཤེས་གཙང་མར་རེག་ཐུབ་ལ། ཞེ་རུ་ཐོགས་པའི་འཛམ་གླིང་ཞི་བདེའི་སྨོན་ལམ་གཙང་མ་གོ་ཐུབ་ཅིང་། བསླུ་བྲིད་ཀྱིས་མ་གོས་པའི་རང་ཉིད་ཀྱི་ངོ་གདོང་གཙང་མའང་མཐོང་ཐུབ་པ་སོགས། འདི་ལས་ཁྱོད་ཀྱིས་སྙིང་ཉེ་བའི་རང་ཉིད་བཙལ་ཐུབ།

ཕྱིའི་ཁོར་ཡུག་ནི་འདི་ལྟར་མཛེས་ཤིང་ཡིད་གར་འོང་བ་ཞིག་ཡིན་ནའང་། ནང་གི་མི་སེམས་ནི་ལྟོས་བཅས་ཀྱིས་བཙོག་པ་ཡིན་པ་འདྲ་སྟེ། གྲོགས་པོ་དང་གཉེན་ཉེ། འགོ་ཁྲིད་དང་མི་དམངས་སོགས། སྒེར་གྱི་ཁེ་ཕན་དང་རང་དོན་གང་རུང་ཞིག་དང་མ་འབྲེལ་ཚེ། ཕན་ཚུན་གྱི་མཛའ་བརྩེ་དང་། ལ་རྒྱ་ཡོད་ཚད་སྣང་མེད་དུ་གཏོང་འགྲོ་བས། དོན་ངོ་མར་རང་དང་སྐྱིད་སྡུག་མཉམ་མྱོང་བྱ་མཁན་ནི་རང་ཉིད་ཁོ་ན་ལས་མེད་པ་འདྲ་བྱུང་།

འདི་ལྟར།  “རང་ལ་ཅི་ཡོང་།། ཐོད་པའི་རི་མོ།།”ཞེས་པ་བཞིན་དུ། ཡུལ་འདིར་བསླེབས་ནས་ཟླ་གཅིག་ལྷག་ཙམ་འགོར་སོང་། དེའི་རིང་། ངས་ལས་དབང་ཞེས་པའི་གཟུགས་མེད་ཀྱི་སྟོབས་ཤུགས་འདི་ལ་ཡ་མཚན་སྐྱེས་ལ། རང་ཉིད་ལ་གང་ཞིག་དགོས་པའི་ཡོན་ཏན་དང་ཅི་ཞིག་གཡུག་དགོས་པའི་བསམ་ཤེས་རྙེད་དེ། དུས་ཡུན་རིང་བོ་ཞིག་གི་འཇིག་རྟེན་གྱི་དཀའ་ཁག་སེམས་སུ་བསྟིམས་པའི་མིག་ཆུ་གང་དེ། སྟེང་ན་ཉི་འོད་དང་སྤྲིན་དཀར་གྱི་དྲྭ་བ་མཛེས་ཤིང་། བར་ན་རྫ་རི་སྤང་གསུམ་གྱི་གཟི་བྱིན་འབར་བ། འདབས་ན་དྭངས་ཤིང་འཚེར་བའི་མཚོ་མོ་དང་ཉ་མོའི་འཁྱུག་རྩལ་ངོམ་པའི་གཡུ་མཚོ་དང་ལྷན་དུ་འཇིག་རྟེན་འདིའི་ས་རུ་ཐིམ་པར་བྱས་རྗེས། ཉམས་དགའ་བའི་མེ་ཏོག་ཉག་གཅིག་སེམས་ཀྱི་གྲུ་ཟུར་ཞིག་ལ་འབུས་ཡོང་སྟེ། མེ་ཏོག་དེ་ནི་ཞི་དུལ་དང་བག་ཡོད་ཀྱིས་སྐྱོར་ལ། དྭངས་གཙང་དང་ལྷད་མེད་ཀྱིས་རྒྱན་ཡོད་པས། རང་སེམས་ནི་ཧ་ཅང་དྭངས་པར་གྱུར།

མིག་དབང་རྒྱང་དུ་གཏད་དེ། གཡུ་མཚོའི་ངང་རྒྱུན་ལ་ཡང་དུ་བལྟས་ཚེ། ངས“མ་ཤི་སེམས་པ་དཀར་དཀར།། ཤི་ན་རུས་པ་དཀར་དཀར་།།”ཞེས་པའི་གཏམ་དཔེ་ཞིག་དྲན་ཡོང་། གལ་ཏེ། མི་ལུས་ཀྱི་དལ་འབྱོར་བཅོ་བརྒྱད་ཐོབ་པའི་འུ་ཚོས་རང་སེམས་ནང་དུ་འདུལ་ཞིང་། འཚོ་བར་ལྷག་བསམ་དང་འཛུམ་མདངས་བསྟན་ན། འཚོ་བས་འུ་ཚོ་ལ་ཞེ་དཀར་བའི་ལམ་སྣ་དྲངས་སྲིད་ལ། ལས་རྒྱུ་འབྲས་ཟེར་བའི་གཏན་ཚིགས་ཤིག་གི་ཁ་དོག་ཀྱང་སྣང་བར་མཛེས་སྲིད།

མ་གཞི། བསམ་བློ་ནང་དུ་བཀུག་ཚེ། མི་ཚེའི་དཀའ་ཁག་ནི་མཚོ་མོའི་རླབས་ཕྲེང་དང་འདྲ་ཞིང་། འུ་ཚོས་ཆུ་རྐྱལ་བར་གོམས་ན་རླབས་ཕྲེང་ལ་འཇིགས་དོན་མེད་པ་བཞིན་དུ། འཚོ་བའི་ཛ་དྲག་དང་དཀའ་ཁག་སོགས་ལའང་གདོང་ལེན་དང་སློབ་སྦྱོང་བྱས་ཚེ། རིམ་བཞིན་དེ་རུ་གོམས་འགྲོ་བས་འུ་ཚོའང་འཚོ་བའི་རྒྱལ་ཁ་ཐོབ་མཁན་དེ་ཡིན་ཆོག་པ་འདྲ། གང་ལྟར། གཡུ་མཚོ་ལགས། ངས་ཁྱེད་ཀྱི་དྭངས་གཙང་། ཁྱེད་ཀྱི་ཞི་དུལ། ཁྱེད་ཀྱི་བག་ཡངས་མཐོང་འཕྲལ། སེམས་སུ་བདུད་རྩི་བབས་པ་བཞིན་དུ་ཧ་ཅང་དྭངས་ལ་ཧ་ཅང་མཛེས་རྐྱེན། ངས་ཁྱེད་ལ་ཐུགས་རྗེ་ཆེ་ཞུ་ཞིང་། དུས་ནམ་ཡང་ཁྱེད་ལྟར་བརླིངས་ཤིང་སྒམ་པའི་གསོལ་བ་ཡང་ཡང་བཏབ་ཡོད་དོ།།

ཡོངས་ཁུངས། འཕགས་ཆེན་འཕྲིན་སྟེགས།

རྩོམ་སྒྲིག་པ།：འཕགས་ཆེན།

公众号！©Pagchen杷青

འཕྲིན་སྟེགས་ལ་དོ་ཁུར་བྱོས།

སྔར་གྱི་བརྩམས་ཆོས་འོས་སྦྱོར།