རྒྱན་ན་དུ་ཆེ་བ་བདུན་གྱི་མགུར་འདི་གསུངས་སོ། །
རྗེ་སྒྲ་སྒྱུར་མར་པའི་ཞབས་ལ་འདུད། ། ང་གནས་ལུགས་རྟོགས་པའི་རྣལ་འབྱོར་པ། ། རྒྱན་དུ་ཆེ་བའི་གླུ་ཞིག་ལེན། ། ཁྱེད་འདིར་ཚོགས་གནོད་སྦྱིན་ཕོ་མོ་རྣམས། ། ཡིད་མ་ཡེངས་རྣ་བའི་དབང་བོ་གཏོད། ། དབུས་རི་བོ་མཆོག་རབ་མཆོད་རྟེན་ལ། ། ལྷོ་བཻདཱུརྻའི་འོད་གསལ་བ། ། འཛམ་གླིང་ནམ་མཁའི་རྒྱན་དུ་ཆེ། ། རི་གཉའ་ཤིང་འཛིན་གྱི་གོང་རོལ་ན། ། ཉི་ཟླ་ཟུང་ཅིག་འོད་གསལ་བ། ། གླིང་བཞི་ཡོངས་ཀྱི་རྒྱན་དུ་ཆེ། ། ཀླུ་བྱང་ཆུབ་སེམས་ཀྱི་རྫུ་འཕྲུལ་གྱིས། ། ནམ་མཁའི་མཐོངས་ནས་ཆར་བབས་པ། ། དོག་མོ་ས་ཡི་རྒྱན་དུ་ཆེ། ། ཕྱི་རྒྱ་མཚོ་ཆུ་ཡི་རླངས་པ་ལས། ། བར་སྣང་ཡོངས་ལ་སྷོ་སྤྲིན་བྱུང༌། ། ལྷོ་སྤྲིན་བར་སྣང་གི་རྒྱན་དུ་ཆེ། ། འབྱུང་བ་དྲོད་གཤེར་གྱི་རྟེན་འབྲེལ་གྱིས། ། དབྱར་སྤང་རིའི་ལོགས་ལ་འཇའ་ཚོན་བཀྲ། ། འཇའ་ཚོན་སྤང་རིའི་རྒྱན་དུ་ཆེ། ། ནུབ་མ་དྲོས་མཚོ་ལས་ཆབ་བབས་པས། ། ལྷོ་འཛམ་བུ་གླིང་གི་རྩི་ཤིང་རྒྱས། ། སྐྱེ་འགྲོ་ཡོངས་ཀྱི་རྒྱན་དུ་ཆེ། ། ང་རྣལ་འབྱོར་རི་ཁྲོད་འཛིན་པ་ལ། ། སེམས་སྟོང་ཉིད་བསྒོམས་པའི་ནུས་མཐུ་ཡིས། ། འདྲེ་གནོད་སྦྱིན་ཕོ་མོའི་ཆོ་འཕྲུལ་བྱུང༌། ། ཆོ་འཕྲུལ་རྣལ་འབྱོར་གྱི་རྒྱན་དུ་ཆེ། ། ཁྱེད་ལེགས་པར་ཉོན་དང་མི་མ་ཡིན། ། མི་ང་ངོ་ཁྱོད་ཀྱིས་ཤེས་སམ་ཅི། ། ང་ངོ་ཁྱོད་ཀྱིས་མ་ཤེས་ན། ། ང་རྣལ་འབྱོར་མི་ལ་རས་པ་ཡིན། ། བྱམས་སེམས་ཀྱི་མེ་ཏོག་གཏིང་ནས་འཁྲུངས། ། གླུ་སྙན་པའི་དབྱངས་ཀྱིས་བརྡ་སྦྱར་ནས། ། ངག་བདེན་པའི་ཚིག་གིས་ཆོས་བཤད་དེ། ། ཕན་པའི་སེམས་ཀྱིས་གྲོས་ཤིག་འདེབས། ། ཁྱོད་བྱང་ཆུབ་མཆོག་ཏུ་སེམས་བསྐྱེད་ནས། ། འགྲོ་བ་གཞན་དོན་མ་བྱུང་ཡང༌། ། མི་དགེ་བཅུ་བོ་སྤངས་ནས་ནི། ། རང་ཞི་བདེ་ཐར་པ་ཅིས་མི་སྒྲུབ། ། མི་ང་ཟེར་ཉན་ན་དོན་ཆེན་འགྲུབ། ། འཕྲལ་དམ་ཆོས་བྱས་ན་ཡུན་དུ་བདེ། ། ཞེས་གསུངས།
©རྗེ་བཙུན་མི་ལའི་རྣམ་མགུར་ལས་བཤུས།རྩོམ་སྒྲིག་པ།：འཕགས་ཆེན།
公众号！©Pagchen杷青