【崇明记忆】方言中的“粽”情端午
↑↑↑点击关注崇明旅游，发现更美的崇明
如今吃着粽子的你，是否还记得小时候看着姆妈灵巧的双手裹粽子时的心急，可曾忘记见到粽子冒着热气刚出锅时的欣喜？让我们细读崇明方言，走进儿时的端午记忆……
勿论老早革歇还是即歇，家家人家过端阳孩要裹粽子，革是崇明个传统风俗，四百年前刻印个《万历崇明县志》里，就有记载个特。崇明人一向用芦叶裹粽子，芦叶有一种特别个清香，裹个粽子好吃。
上下八沙横一条竖一条沟沿浪、河沿浪，爱有江边滩涂浪，孩长个芦青，青蹦茏茏真个喜见人。住勒边头个人家近水楼台先得月，拣又阔又长个芦叶采，“叭叭叭叭”手脚快来，勿多一歇揪子一大把，扎成一扎塞勒系腰里。个个拎子一系腰兜转来，自己派点用场，还送送镇浪个亲眷朋友，收算勿值何钞票，因为是绿色纯天然个，交关受欢迎。
城镇居民也合子道队去乡下采芦叶，一头采一头讲讲笑笑，还相互叮嘱，当心踏脱空跌勒民沟里。好多人采出子门槛特：早点采个芦叶芦虱少，香味好，勿老勿嫩软熟有韧头，好裹。伊特话，自家采芦叶省着铜钿，又是休闲，看看四景，吸吸新鲜空气，听听鸡啼鸭叫，斜气适意，交关捂爽。
好汛市区居民到崇明孛相，蛮多人拎子碧蹦爽青个芦叶转去。有个网友话：以前只当崇明芦叶脱菜场里买个呒得何差别，今趟裹子勒晓得，崇明芦叶又软又长，也勿会得鄺个，我同样用三叶裹一只，裹出来个粽子就是大，隔壁头看见子话，崇明芦叶是灵光。
崇明人一般勒端阳前一天裹粽子。革孩是女当家人个事体，伊特勿晓得裹子多奥个特，手里活络来眼睛一眨老母鸡变鸭，一歇歇一只粽子裹好特，勿多一歇，耸子长煞一排。只只紧缚笼笼，随便哪能煠也勿会漏，吃出来香勒有咬嚼。
小囡晓得有粽子吃，麻来拗去话伊，孛相也呒得心相，守勒边头一步也勿脱离。看见煠粽子特，歇歇跑勒灶边头闻闻，一歇问“多奥辰光有处吃特”，一歇问“熟特吗”，真叫煠蟹等勿得红。
烧开勒闷，催子好几趟，一屋里孩是香味，姆妈宣布“粽子熟特”。小囡快活来跳出来，一眼勿眨看着姆妈揭开镬盖，拎出一只粽子，发脱线，剥开粽叶，筷头拨一拨话：“胎生熟透个特。”
姆妈搛了一块送到小囡嘴里，勿多一歇，大煞一只粽子到子肚皮里，嫌吃勒勿煞念，连话“好吃来，爱弄一只”。
崇明粽子品种多来勒些，以式样分，有长粽子、三角粽、斧头粽、背包粽。端阳革天还专门裹几只关门粽，看上去像两扇合拢个门，老代里话，关门粽挂勒门边头或者帐钩浪，拿蚊子关勒外头勿来咬人特。
照粽子里个料来分，有糯米粽子、白米粽子，赤豆粽子、果子粽子，以及肉粽、蛋粽。爱有杂粮裹个勒，像黄稷粽子、高粱粽子、麦面粽子。
近期崇明旅游热门资讯
崇明旅游
一段心灵邂逅自然的旅程