Breaktime | 我食到老班长最后的晚餐

每条街都会有一个街霸

每个地头都会有一间“店霸”

佢哋係长达数十年时光中

统治了整整一片区域街坊的胃

就算大个咗离开咗哩片区域

间唔中都会感召到老店嘅呼唤

凭心前往重温旧时滋味

不过有一间店从此要同各位say goodbye啦

12

老班长

（1995-2017）

始创于1995年，当时租借军区部队房子，沿袭军区装修风格。2017年6月30日，农林下路老店结束最后一日营业，迁移至对面广百三楼，创始店从此关闭。

数数手指头

农林下路嘅老店已经度过22个年头

睇住东山嘅孩童从学堂踏出社会

墙上嘅木板同蒸笼

好骄傲咁话俾每个往来客人知

“哩度係上个世纪嘅老店”

係东山长大嘅人一定食过佢

身边东山嘅朋友一定对你sale过佢

*图源自网络

因为租借部队老房子

装修都跟足部队嘅怀旧风情

除咗店名取为“老班长”

店员都统一着上军服招待客人

但係依家已经换上普通嘅围裙

最多人唔舍得嘅应该就係二楼

每次行上去都会因为地面不平

行到好似晕船饮醉酒咁

殊不知

唔知几时嘅事

二楼已经变成平整嘅街砖地

只有哩层磨破皮嘅横梁提醒紧

曾经有好多人係哩度撞亲个头

好彩咁多年都冇变嘅仲有哩d架撑

部队有大锅饭，老班长有大桶小米粥

穿梭一楼到三楼之间嘅升降机

曾经帮服务员悭过几多脚骨力

作为一个非东山地区嘅人

嚟老班长嘅次数唔多

以前净係知道哩条楼梯去厕所

但係今日先知原来老班长有三楼

墙上有块“文工团食堂”嘅牌

经过无数日晒雨淋已经褪色得好明显

三楼原来仲有好多房间

係第一次见到亦都係最后一次见到

虽然讲就讲係最后一餐

不过只係属于老店嘅最后一餐

想回味老班长嘅味道

仲有好多新店可以选择

招牌壹号灌汤包

传说中嘅镇店之宝

22年每张台头都有一笼灌汤包

但係食咗咁多年

其实根本分唔清灌汤包同小笼包有咩分别

最开头嚟真係好唔习惯

平时用开嘅碗变成一只细细嘅豉油碟

超唔就手又容易走

逼住你要小心翼翼去食

点知久而久之

因为老班长

你已经开始习惯东北嘅饮食文化

小笼素馅包

用肉眼就可以分得出素馅同其他包

其他灌汤包都扁扁塌塌

只有佢特别“实净”，零舍高“包”一等

素馅嘅料有粉丝、胡萝卜丝、芹菜、鸡蛋等几样蔬菜

但係食起身係干嘅

不过佢个名又冇讲明自己係灌汤包

再干口都吹佢唔胀，饮多两啖洗胃小米粥咯

凉菜

一楼门口最当眼嘅地方就係出凉菜嘅地方

如果吸引人嚟老班长嘅係灌汤包

咁留住人係老班长嘅绝对就係凉菜

大大话话十几款凉菜任你拣

有酸有辣，全部都係开胃菜

老班长开创咗最早期嘅“触屏式”点餐

攞个铁皮托盘，对住窗口係咁督

里面嘅服务员见你督乜就攞乜俾你

几蚊一碟凉菜

攞得再多都唔觉得贵

不过碟碟都堆到山仔咁高

好多时候都食唔晒

历史交替，时代变更

有好多嘢都无可奈何要离开，被替换

但係曾经係你记忆中存在过

有你陪伴佢一齐经历过

就已经係最好嘅结果

今期嘅探店冇评分

因为佢早就唔需要任何人打分

老班长老店最后一日，

庆幸我有份见证到。

老班长

图 | Hill

   文 | Clo兒

                                                                     此文为看点广州Breaktime原创内容,特此声明