【港话】一个会化妆的男同事！

新同事成日有，但今次呢位新同事，引发一个唔细嘅风暴，真系不得不提啊！

呢位新同事佢化嘅妆，十分完美，所有女同事都惊为天人，但男同事就有惊无喜，因为呢位同事，佢系一个男同事，一个会化妆嘅男同事！

性别话题啊，男女平权之类嘅我就唔讲喇！今次只讲化妆，Welcome Lunch明显就系一个开场。

其中一个男同事忍唔住问：“Vincent你之前都系化妆返工啊？”佢语气将成件事好轻描淡写咁。

Vincent用一个几迷人嘅笑容答：“系啊，都化咗好几年喇。”坦白讲，佢本来都算几靓仔，化完之后将几个男神同事比下去。

“我哋都系第一次见男同事化妆，今朝真系有少少吓亲。”“唔紧要，好快就习惯，之前我几间公司都系咁。”

男同事想搵位去留难Vincent但又搵唔到，反而我哋成班女同事就好多话题同佢倾，例如男仔同女仔用嘅品牌有乜唔同，佢会化边几样之类，谈笑风生嘅佢好快就成功打入女同事圈子。

班小器男同事更睇唔过眼，有人终于忍唔住讲：“其实我觉得男人最紧要都系男人味，化妆都系唔太合符我嘅Style。”

我哋即时不留情面咁讲：“你咁嘅样真系唔化好过化喇，我怕你化完出街俾人打啊！仲有呢，有冇男人味唔关化唔化妆事，系关你个人事。”

正常我哋男女同事进行日常嘅互串之时，Vincent佢突然讲：“今时唔同往日，好似以前男人连剃须同护肤都无做，但今日你哋屋企唔多唔少都会有洗脸同护肤之类啦。

化妆其实都系礼貌，无论男女都系，试谂吓有日你哋见客无剃须都系唔礼貌表现，而化妆会令对方对你印象更好，对人对自己都有好处，又何乐而不为呢？

同埋愈老会愈有男人味，但化少少妆的话，就好似美食上面加上调味料，令食物得以升华。

其实化少少妆，只系花好少时间同金钱，或者你哋都试吓，就会领略到当中好处喇。”

Vincent呢番自白，作为女人听，当然好受乐，我哋日日化妆落妆都系因为咁，只不过，班男人都系当耳边风。

有时心态就系咁，你明知样野系好，你驳唔到，但习惯、观念等等规限咗自己，仲要觉得自己好啱，仲要去歧视咁做嘅人，将佢归纳做异类。

无耐之后，Vincent佢因为同班同事夹唔到而离开，系工作原因？嘿，定系因为化妆？心照。

 往期好文：