江湖已老

头一埭发现江湖老，是勒海哼仔《随遇而安》而无不人晓得个辰光。

第二埭发现江湖老，是勒海拨学生子看古天乐个杨过剧照，收获一片惊叹个辰光。

第三埭发现江湖老，是勒海孛相电脑游戏，无人看过原作，答曰“觉着有距离感，是爷娘搿个年代个小说”个辰光。

最后一埭承认江湖老，是勒海看见金大侠个过世个新闻个辰光。

江湖已老，武侠已往。

昨日半夜里听歌听到三点，夜不能寐。

还记得三四岁辰光跟仔好婆一淘看83版个《射雕英雄传》，字还朆认全个辰光，就朦胧知晓仔一个词“大侠”。然后日逐掮仔根棒梗头勒院子里哼哼哈，梦想有朝一日能碰着武林高手，练就绝世武功。

还记得两三年级个暑假，为仔看《倚天屠龙记》，顶仔雷响霍显坚决弗关电视。矮模样一个霹雳下来，电视机报废，拨爷娘骂得狗血淋头。

还记得初中辰光，拿金梁温古黄下勒仔mp3里，天天看日日看，一查视力50、500，翘脚结棍只好戴眼镜。

还记得高中辰光，偷偷伴伴囥仔个光盘打《笑傲江湖》，还顺带便拿伲妹子个成绩带豁边。

然后呐？

然后就无不哉。

曾经当仔武侠会是全中国人个群体记忆，义薄云天个乔峰、痴情不悔个杨过、浪荡潇洒个令狐冲、古灵精怪个俏黄蓉、英姿飒爽个霍青桐、滑头滑脑个韦小宝，该点人物串起仔一个鲜活个武侠世界，也交织勒中国个历史之中。

朆壳张伲竟然是有武侠情节个阿末一代人。

飞雪连天射白鹿，笑书神侠倚碧鸳。

对伲来讲是心领神会个默契，对过后十年出生个人来讲却是两眼茫然。

伲经历过武侠最辉煌个九十年代，也经历仔武侠迅速退潮个新千年。曾经梦想能够成为大侠个小倌，侪勒海生活里磨成仔芸芸众生。

金大侠走脱个夜里，重新掀开仔曾经最欢喜个《笑傲江湖》。

搿一年，福威镖局个金字招牌还锃锃发亮，林家个小少爷鲜衣怒马，带仔家丁端正出门打猎……

文 | 予安

音 | 予安

图片来自网络 

  往期导读