抄火表卖洋线团渳小老酒献身崇明围垦——伊就是上海爷叔炳根▸上海独白◂
上海男人的称呼
一再变迁
★
★
★
★
爷叔
师傅
朋友
先生
同志
听音频点这里
↓ ↓ ↓
0
1
上海男人的称呼，随着历史发展一再变迁。以前称“先生”，后来叫“同志”；“文革”一来，“工人阶级领导一切”叫“师傅”；前两年改了喊“朋友”；现在普遍叫声“爷叔”。
叫爷叔既是客气、尊敬，也显得热络。上海人叫爷叔并勿是啥个新发明，少讲讲可以从当年上海爷叔身浪(上)着的迭(这)件长衫算起。
世事沧桑，辣辣(在)历史长河里，上海爷叔侪(全,都)有一个共同秉性，就热心为人，无论公事、私事、大事、小事，喊一声或者甚至用勿着侬喊，总归会得主动帮忙，勿计回报。
钱家塘里就有实梗(这样)一位爷叔，迭辰光已经呒没(没有)人着长衫了，伊着套蓝颜色的解放装，年纪三四十岁横里(左右)。弄堂里点人还加了两个字，叫伊一声“百家爷叔”，因为伊要管一百家人家的事体得来。
钱家塘虽然辣辣霞飞路南面地块，房子大推扳(相差,差劲)了，不过也勿是一片草棚棚滚地笼介(这么)难看相，里向(里面)是老式里弄，还有点简房陋屋。早浪向(早晨)赛过定时钟一样——“马桶拎出来”一声喊，家家人家就起来了，然后一片烟雾腾腾生煤球炉子……
大部分人家水龙头、小火表呒没入室进户，交关人是买筹子到公用大龙头去接自来水拎到屋里来用的。有点是整条大弄堂合用一只大火表，只大火表有点年头了，是解放前就装辣海(在那儿)，介许多份人家每个号头(月)的用电量，统统计辣迭只大火表里，还专门有间小房间摆迭只大火表，间房间就叫做电灯间，啥体勿叫电表间、火表间，就勿晓得啥原因了。
后来就是迭位“百家爷叔”住辣迭间电灯间里，小虽然小，房租便宜，伊一家头呒亲呒眷，“枯庙旗杆独一根”，蹲蹲(住住)也蛮好。
●厨房
灶披间
通常是多户公用的●
●相差·差劲
推扳
为人不地道●
0
2
当年里弄里开过趟居民代表大会，搭着大火表界的人家，一家来一个人开会。会浪大家约定：每幢房子照门牌号头算，一户一家，房间里一盏电灯用四十支光，灶披间(厨房)各家公摊用只廿五支光电灯泡，楼梯公摊十五支光，用收音机的人家也算十五支光。迭辰光呒没电视机电冰箱空调洗衣机，有只收音机听听，左右隔壁邻居侪听得见，用勿着囥囥(藏)瞒瞒。热天开电风扇的再临时加只四十支光灯头算，大家公平交易，有只灯头算一只灯头。
葛末(那么)每到月底，“百家爷叔”就根据大火表用电数公摊，各家人家房间里有几只灯头，灶披间楼梯灯几家分分，还要加上整条弄堂一共几盏路灯摊着几钿，一家一家算好，张白报纸浪毛笔字写好，清清爽爽张榜公示。钞票平摊，四舍五入，轧(核账)拢来还有几块几角几分节余，留辣下个号头冲账，真是一分一厘煞辣清。
三日天以后“百家爷叔”还要抱只空饼干箱子装钞票，上门一家一家收钞票、找钞票，收齐了点清总数，出钱家塘朝北，走过淮海路，交到对过马路襄阳公园边浪间银行里去。实梗琐碎的事体“百家爷叔”每个号头总归要做一趟，完全是公益性的，勿辞辛苦，勿计报酬。
老早就有人提出来，要拿“百家爷叔”蹲的电灯间盏灯头费摊辣总账浪，讲起来全弄堂每份人家真是摊勿到一分洋钿。“百家爷叔”每个号头家家人家楼梯浪奔上奔落尽义务，阿拉大家哪能过意得去？
但是爷叔随便哪能勿肯，伊讲：“桥归桥路归路，纸头、墨汁、毛笔、浆糊……样样侪是居委会领得来，勿花我一分洋钿，我不过算盘珠笃笃，收一收钞票，邻居道里相信我，我的电费哪能好摊辣大家头浪厢？”
一条弄堂约摸算算十只八只门牌号头，一幢房子里起码算伊五六家人家，几条弄堂合拢来一条大弄堂，一只大火表里加加拢来，论百家人家也勿止。实梗一圈兜转落来有多少人叫伊“爷叔爷叔”，外加叫得来得个起劲，因此迭个“百家爷叔”也是名符其实，实至名归。
“百家爷叔”大名叫周炳根，江南水乡农业发达，名字里叫啥个“根”是希望自家儿子能够“把根留住”，茁壮成长。直白点叫宝根福根贵根长根、妙根关根龙根多根；讲究点的时辰八字看一看，金木水火土缺啥补啥，葛末叫金根鑫根水根火根泉根土根。
可以叫森根，勿好叫木根，因为上海闲话里木头木脑勿是好闲话。过去有句勿文明的闲话，叫人家“阿木林”，讲迭个人有点戆头戆脑容易上当受骗，听人家调排(指使,捉弄)去做勿应该做的事体，葛末阿是勿好拿“木根”做名字。
炳根爷叔一径(一直)临时工做做，呒没长生活(工作)，有啥做啥，做做停停。好在伊是“一人吃饱全家不饿”，日脚过得落去。记得伊还同人家搭档卖过洋线团(木芯的绕线团)，“卖洋线团”上海有一抢(一段时间)时有所见。一般是三个人，有男有女，扛两只长凳，背只布包，到了弄堂里拉开场面：一张长凳浪立的一男一女唱，炳根爷叔坐张长凳浪拉胡琴伴奏，布包摊辣地上，一堆五颜六色洋线团。
勿要小看一把胡琴两个人唱，场面蛮闹猛，会得唱大家侪熟悉的绍兴戏《梁山伯与祝英台》、沪剧《罗汉钱》、锡剧《双推磨》、甬剧《半把剪刀》，还有评弹开篇《第一列社会主义飞快車》等等，内容新新旧旧倒侪蛮健康，呒没勿二勿三的黄段子。
一到胡琴响，搿(这)点女同胞就会得放落手里的家务，出来听伊拉唱，有两个还会得跟了哼：“天上掉下个林妹妹……”一面就挑两只洋线团买转去。
钱家塘里点人对迭种又卖又唱的做生意勿陌生，再早点的辰光总归有个罗宋白俄做了兰花肥皂来买。兰花肥皂是白颜色的，里向夹了一片片雪花大小的蓝颜色，迭种肥皂汏物什交关清爽，现在是看勿见了。
罗宋白俄用两个中国帮工，拿部劳动车推了肥皂来弄堂里卖。车子停落来帮工会得拿起两只洋喇叭来吹，有外国曲子《溜冰圆舞曲》，中国歌曲《夜上海》，还会得吹宁波《马灯调》。吹到过门辰光边浪围了点小囡就会得用宁波闲话齐声唱：“哎个伦敦哟呀，肥皂大家买两块……”大家哈哈哈哈笑着买肥皂。
●义：谜语
谜谜子
音：妹妹子●
●常常
常庄
经常●
0
3
弄堂里大家侪晓得，炳根爷叔没别的爱好，就是喜欢渳渳(小口饮)小老酒。天气好的日脚，黄昏头伊端只骨牌凳，摆了自家门口头做台子，小菜老酒就摆了方凳浪，自家坐只小矮凳。过酒小菜勿多的，常庄(常常)两条梅子鱼几棍龙头烤，一点油氽果肉或者兰花豆就够了。老酒也勿高档，一般是善酿加饭酒。渳一小口，放落酒杯，拿双筷子搛点小菜，勿匆勿忙摆进嘴里，慢慢较细细嚼嚼小菜回味着老酒，享受一个仔(独自)渳小老酒的乐趣，笃悠悠消磨一个黄昏头。
中国人拿吃老酒视为人生最重要的事体之一，阿拉几千年的灿烂文化，几乎就是一条由酒流淌而成的璀璨长河。古诗文里有句讲“壶中日月长”。我勿好随便讲炳根爷叔像古代文人骚客，酒后吟赏烟霞直抒胸臆；也勿敢讲爷叔像《水浒传》里的武松醉打蒋门神，看到路浪酒家耸出的酒招上头写了“壶中日月长”迭句闲话，伊吃了老酒是豪气万丈。
炳根爷叔呢，渳渳小老酒是一种享受，恐怕是品味人生的一种境界。选辰光我还小，只会得猜“壶中日月长”迭只谜谜子(谜语)，谜底是“胆大包天”。
讲到炳根爷叔，伊个胆子交关大，大到可以勿顾自家的生命！事体是上世纪六十年代初，伊响应号召去参加崇明围垦，当年要辣辣长江口围一道大堤向大海要土地，有了土地好种粮食，毛主席讲个嘛，“手中有粮，遇事不慌”。
炳根爷叔休假回上海来讲，伊拉负责筑堤的迭段海涂是顶难触祭(义见下文)的生活！侬想想看，鸭子到了此地侪浮勿起来，要窝下去，所以迭个地方叫做鸭窝少。
“触祭”两个字是蛮有意思的一句上海闲话。老法人讲屋里向祭祖宗的辰光，过世的人回转来，看到介许多鸡鸭鱼肉又勿好开口吃，屏勿牢嘛，只好伸只指头出来触一记供品，算是吃过了。所以死人吃物什就叫做“触祭”，用了活人身浪就勿大文明了嘛。不过爷叔迭句闲话翻成功普通话，是指“这个活太难啃了”！阿是来得个生动。
●伸手不见五指
黑漆墨通
形容黑暗●
●锅子
镬子
半圆底的锅子●
0
4
炳根爷叔辣崇明围垦是做后勤，伙房里忙进忙出一日三顿饭。有日天半夜里，突然有股子午怪潮袭来，大家听了气象预报老早就作好准备。只听得前两天刚刚围出的大堤上是一片人声嘈杂，还有风声雨声，夹着一阵高过一阵的海涛声。风越刮越凶，潮水越涨越高，黑漆墨通(形容黑暗)的天空浪还莫明其妙一道接一道霍险(闪电)，亮得叫人眼睛睁勿开！
突然一记霍险亮过，大家看到大堤豁开了一个缺口，海水开河一样涌进来！众人齐心协力，连忙拿准备好个烂泥草包统统填进去，但是根本因头(效果)也勿起，眼看缺口越冲越大，海水一阵阵涌进来！
正好迭个辰光炳根爷叔同另外一位厨工用根扛捧两个人抬了一镬子(锅子)热饭过来，现场指挥员发急了，就叫：“快把这大铁锅丢进去堵缺口！”炳根爷叔还有点舍勿得：“让大家吃两口热饭好接接力……”指挥员急叫了：“大堤保不住大家都没命了还吃个鸟饭！丢！赶快丢！”只见炳根爷叔勿知啥地方来的介大力气，一家头就端起搿只两个人扛个饭镬子，连饭带镬子一记头厾(丢)进缺口里去！
前头讲过迭处海涂是出了名的鸭窝沙，连得鸭子都浮勿起来要窝下去个地方，论百斤重的连饭带铁镬子一道下去，只看见只镬盖头氽(漂浮)起来，打个转就没了踪影，潮水涌得更加急！
又一个霍险亮过，大家看见炳根爷叔一记头就朝缺口里跳落去了！但见伊头顶心的头发辣水里漂了漂，整个人就马上没脱了。只听得指挥员大声命令：“我们手拉手大家一齐跳下去，一二三！跳！”后头马上又有一批人跟了跳落来、跳落来……潮水终于畀(给)道人墙挡牢了！
第二天一清早，旭日东升，金光万道，蓝天白云，风平浪静，东海上好像啥个事体也呒没发生过一样。浸辣水里一夜天的围垦战士，个个满身泥水、精疲力尽，回到芦席棚搭的宿舍里，但见炳根爷叔床门口双干干净净的圆口布鞋端端正正摆辣海，指挥员就讲：“同志们，毛主席教导我们‘人定胜天’！烈士永垂不朽，让我们大家向他学习，我们人在大堤在……”一边熬勿牢眼泪水就落下来。
搿日天，钱家塘里两个上了年纪的讲：“炳根名字里的炳，火字旁边一个丙字，五行里讲‘甲乙木，丙丁火’，炳字是火上加火；根字是木字旁，木助火旺，伊八字缺火。爹娘帮伊起迭个名字，水火不相容啊。本身缺火呆呆调(恰巧,偏偏)钻到水里去，条命就犯难呒交做了。”
边浪年纪轻的就批评伊拉：“倷(你们)两个是老封建老迷信，啥个辰光了还辣讲甲乙丙丁金木水火土！碰着保护国家财产的大事体，哪怕水里火里伊侪会跳落去，闲话也呒没一句，炳根爷叔的脾气倷又勿是勿晓得！”
我想，迭个也就是上海爷叔的脾气。
●恰巧·正好
呆呆调
偏偏·偏巧●
●闪电
霍险
霍险娘娘●
本文部分字词注释参考自钱乃荣编著的《上海话大词典 (第二版) 》（上海辞书出版社2018.11版）。
撰文/播读/杨仲文
编辑/排版/LÉI