查看原文
其他

[嘉人嘉音]公勺公筷用起来

木姿 麦唐作 2019-03-29

作者、朗读:木姿

文字编辑:麦小姐

图片来自网络


    听众朋友大家好,木姿又脱大家见面了,上两日讲到了戴口罩个方面,葛末今朝脱大家一道来讲讲餐桌浪向要注意眼啥。

 

    一听今朝啥人啥人请客吃饭,肯定心里向蛮高兴个呀,包括我也是。大家平常辰光工作繁忙,压力蛮大个,呒没空联系,难得碰着末一道吃吃聊聊,覅忒开心噢!再加上菜水味道好末,迭个辰光,迭种感觉,再幸福也呒没了!现在特色小吃街、网红饭店,一家一家侪冒出来了,实在是吊人家胃口啊!有排饭店还要提前预约的了,一到夜里向特别是周末,生意是好透好透,有常时停车位也寻勿着,葛叫急煞人啊!

 

    讲到吃,南方人特别是香港人,饭店里向用公勺公筷个地方是比较多个,伲此地大部分地方还呒没做到。中国现在乙肝病毒携带个人比例勒辣8-10%,约1亿4千万个人,也就是10个人当中有1个。交关人是体检个辰光才发现个,自家并勿晓得,有一部分人是家族遗传过来个。大部分人可能认为是覅紧个,也就一道吃了。一般情况下头,小三阳传染个几率比较小个,但如果口唇粘膜有溃疡或者破损,共餐辰光就增加了相互传染个可能性。


 

    另外,现在大家侪晓得幽门螺旋杆菌是吃进去个细菌,携带者个比例勒辣50%以上,在慢性胃炎个人当中90-95%显示幽门螺旋杆菌阳性,也是胃溃疡个主要致病菌。而经常外头应酬,聚餐比较多个人最容易感染到搿只菌,虽然将来并勿一定会得得胃癌,但一定要引起重视。因为一家人家只要有一个人是带菌个,屋里向相当容易过着。乃末到医院里向看病、吃药、做胃镜啊,感觉实在是苦恼透苦恼透!做出来呒没啥末呒没啥,有啥末,心理总归会得疙疙瘩瘩个。

 

    我有个辰光经常会得碰着瘦透瘦透个朋友,会得问伊搭:“阿有胃病?”结果大部分人回答我“有个”,或者吃过药或者杀过菌。胃是身体第一道保护屏障,大部分胃病个人,消化吸收是勿良个,长期下去,人就会得消瘦(伲经常讲个吃煞勿胖)。再下去呢,抵抗力、免疫力就会得差了,毛病呢,逐眼逐眼就出来了,(对身体)影响还是蛮大个,所以提倡用公勺公筷还是蛮有必要个。

 

新年又勒浪眼门前了,哪能吃得健康,吃得放心,吃得开心,也是一门学问。最后木姿祝大家健康多一眼,笑声响一眼,幸福快乐多一眼!希望大家关注嘉人嘉音,多讲嘉定方言,谢谢大家收听,我伲下趟再会!

 


 作者简介:嘉定60后,懂生活,重趣味,不奢侈,求品质,现居日本。




我们最近还发过:

[申情申音]上海永远精致优雅

[申情申音]老酒渳渳,味道嗒嗒

[嘉人嘉音][古诗]笠翁对韵•七虞

[申情申音]虾仁•欢迎——谈谐音文化

[嘉人嘉音]戴口罩

[麦唐作]“油而不腻”

[麦唐作][麦唐白话]微信投票



【嘉人嘉音】本栏目以嘉定地区方言朗读为主打,文字来源可原创,也可选取其他老师的优秀文章进行适度改编(尽量取得原作者的授意,如暂未能及时联络得上,也将尊重其原文著作)。母语是地缘文化之乳,让我们一道留住乡音,为保护嘉定方言尽一份小小的力。

地灵人嘉,文博气定。




本公众号发布内容(包括音频及未注明“来源”的文字、图片)皆为原创,作者保留对作品的著作权。未经授权允许,不得擅自转载。

 

如有需要转载或其他工作邀约:

可添加微信号:Leslie_0207 

或邮件:leslie_0207@163.com

 

多谢您的支持和欢喜!









    您可能也对以下帖子感兴趣

    文章有问题?点此查看未经处理的缓存