[麦唐作][乐评]再回首

图、文：麦小姐      音：唐厂长

歌曲：姜育恒《再回首》

《再回首》是台湾歌手姜育恒个一首经典国语歌曲，收录辣伊1989年个专辑《多年以后·再回首》里向，卢冠廷作曲，陈乐融填词。搿只歌个广东话版好像出来了稍微早一点点，叫《凭着爱》，是苏芮为电影《群龙戏凤》配唱个插曲。

姜育恒被称为“忧郁王子”，虽然后头来也出来了其他个“忧郁王子”、“情歌王子”，不过辣姜育恒最风光个80-90年代，伊个搿块“气质招牌”，还是相当有辨识度个。我印象里个伊，中等身材，中等长相，戴一副圆框个金丝边眼镜，台风斯文，音色沉稳，常常愁眉深锁，勿大笑。同样是沧桑，童安格唱出来，是一种华丽个伤感；张镐哲唱出来，是一种粗犷个漂泊，而姜育恒唱出来，是和解与释怀。

昨日辣电台里齐巧听到姜育恒个访谈，伊讲起年纪轻个辰光脱李宗盛个一段情谊。埃歇个小李虽然已经开始征战歌坛，但仍旧还要相帮屋里送瓶装液化气，就像《阿宗三件事》里写到个埃样。当时搿两家头个关系交关好，可惜一个辣飞碟，一个辣滚石，公司规定勿好串场，所以也一直呒没合作个机会。姜育恒讲，伊唱歌生涯当中，老大个一只遗憾，就是呒没唱过李宗盛写个歌。伊还开玩笑讲，前头两年有趟辣一场表演个后台，伊碰到李宗盛，乃末就问伊唻:“小李啊，侬答应帮我写个歌，啥辰光好拨我啦？”李宗盛有眼无奈又有眼勿好意思个回答:“再等等，哈哈，再等等。”“再等等啊，要等到几辰光去呢？”姜育恒成心脱伊打朋。“呃……齐秦已经等了十年，我还呒没写拨伊，呵呵，呵呵。”

姜育恒辣节目里自家也讲，可能搿首欠勒盖个歌，李宗盛是还勿出了，赛过一只永远个遗憾。老早呒没完成个，到了现在，也只好随缘了。不过，李宗盛倒是蛮多翻唱搿首《再回首》个，录音室专辑里也收过，脱卢冠廷也一道唱过，看起来，老李是交关欢喜搿首歌个啦。让阿拉来看看伊个词，粗看像啥是脱旧爱话别；再看，我觉着，歌词当中个“侬”，指个是自家个每一段“曾经”。回头看看，身后个脚印崎岖；朝前看看，前途茫茫。但就算是一家头孤立无援，仍旧愿意相信路是越走越宽，从容为真，而生活个原味，是平淡之后个回甘。

《再回首》，30岁唱伊，是唱一首歌；40岁唱伊，如梦初醒；50岁唱伊，像回敬岁月个一杯酒；60岁唱伊，如咽下人生所有个叹息；70岁以后，就覅再唱了，该回顾个侪回顾到了，该珍重个也侪交代清爽了，再唱，只剩尽头。

（20180115）

我们近期还发过：

【麦唐作】即“麦小姐”和“唐厂长”的作品，是以沪语（语音口音偏上海市区音；文本表达参照钱乃荣《上海话大词典》及《上海话小词典》）为主打的原创方言专栏。文体、形式自由不羁，力求“做得开心，听得满意”。
“麦唐作”又取“卖糖粥”之谐音，愿为众友献上一份带着生活回甘的“地气美食”。

本公众号发布内容（包括文字、音频及未注明“来自网络”的图片）皆为原创，作者保留对作品的著作权。未经授权允许，不得擅自转载。

如有需要转载或其他工作邀约：

可添加微信号：Leslie_0207 

或邮件：[e-mail]

多谢您的支持和欢喜！