[麦唐作]逃夜（下）
音：唐厂长
文：麦小姐、唐厂长
合影由唐厂长提供，主图来自网络
“麦唐作”公众号主题音乐及歌曲，词、曲、制作：何东，演唱：何予西
末尾歌曲：张伟文《人生于世》（live）
昨日阿拉讲到，我帮同学小金“离家出走”，从嘉定乘北嘉线到了市区，预备调100路公交车到乍浦路去寻老同学邹砾。今朝我继续脱大家讲下去。
上了100路以后，又抖法抖法抖了三刻钟，乍浦路到了。因为此地阿拉侪呒没来过，一眼方向也摸勿着，只好老老实实看了门牌号头去寻。半当中，还用公共电话打了只到伊屋里去，响了交关辰光也呒没人接。也对噢，搿辰光，正常个小朋友侪应该辣学堂里向嘛。乃末只有慢慢叫寻了。还好乍浦路勿长，勿多歇，阿拉就到达了目的地。
搿是一幢木结构个老式洋房，邹砾住辣三楼。上去敲了敲门，呒没人来开。反正阿拉也勿急，干脆上上下下参观起来了。家家人家个门浪向侪是有雕花个，配黄铜把手，看上去结实可靠，还透出一种低调个华丽感。虽然房子勿算新，但保养得交关好，楼梯口个窗是彩色玻璃个，就连走廊高头个地板也拖了煞煞清，简直光可鉴人。我脱小金讲：“嗳，侬看呀，搿房子介灵，邹砾拉爸爸到底是做大领导个喏！看起来阿拉来投靠伊，算是寻对人了！”
后来，有邻居开门出来看到阿拉两个小鬼头辣走廊里，就问：“㑚来寻啥人啊？”阿拉回答是来寻邹砾个。对方讲：“葛末，㑚要等脱一歇了。”到底年纪小再加上一路颠簸劳顿（注，此处朗读者有口误，“顿”是清音，沪音同“等”，不是“钝”），两家头立了一歇就觉着吃力了，索介，坐辣地浪向打起了瞌[目充]。
正睏了迷迷糊糊个辰光，有人拿阿拉推醒了，一看，是个中年阿姨，手里向还拎只菜篮头。伊问阿拉做啥睏辣此地，阿拉讲是来寻邹砾个。乃末伊讲搿搭是邹砾屋里，不过伊辣学堂里读书，问阿拉是啥人。
“阿拉是伊嘉定个同学。”我回答伊。
“葛末，㑚哪能勿读书呢？㑚来寻同学白相，老师、爷娘晓得[口伐]？”阿姨继续问。
实话实讲是肯定勿来三了，葛末要哪能编下去呢？小金踢踢我，意思叫我来讲。我也来勿及多想，就脱口而出：“阿姨啊，是搿能个，学堂里脱阿拉放了一日天假，让阿拉来看看老同学。”
搿位阿姨尽管有眼年纪了，不过人长了蛮好看个。虽然伊一听就听出来我是辣瞎三话四，倒也呒没马上扳面孔，还开门让阿拉进去坐。阿姨一边开门，一边自我介绍。原来伊是邹砾个舅妈，因为邹砾拉爷长期蹲辣北京，所以末，只好拜托娘舅舅妈平常辰光来照顾伊个起居生活了。进门以后，舅妈交关客气个拿出饼干请阿拉边吃边等。我还记得，饼干桶是铁皮个，里向头摆个是华夫饼干。为了防止[黍刃]脱，只盖头揿了老老紧，要用钥匙挢一挢再开得开。舅妈招待好阿拉两个小鬼，就进厨房间去了。
我帮小金一面吃，一面用眼睛参观邹砾拉屋里。到底是大人家啊，沙发套是米白色个，杯子摆了整整齐齐，茶几高头还摆了一盆兰花，既清爽又高雅，搿种布置风格，我埃歇只有辣电视剧里再看到过。舅妈大概是晓得阿拉吃饼干吃了会嘴巴干，又冲了两杯高乐高拨阿拉吃，真是好人啊！伊讲邹砾下了课还要去学击剑，估计要七点钟横里再回来，假使阿拉等得吃力了，可以到书房里个钢丝床浪去休息休息。
吃过点心脱饮料，阿拉心里向基本已经拿此地当自家屋里了。我看看辰光只有一点多钟，眼睛末倒是酸了，就听言话个进去睏觉了。挨下来几个钟头个记忆是空白个。等我眼睛再张开个辰光，终于见到了老同学邹砾。辣末生头看到伊，我一记头来勿及反应，拨伊吓了一大跳。伊末，还脱阿拉寻开心，拿本杂志对牢阿拉穷扇八扇，边笑边讲：“㑚两家头哪能招呼也勿打就跑来寻我了啦！”
“我上半日打过电话个呀，㑚屋里呒没人接。”我帮伊解释。
“搿勿是废话嘛，上半日我覅读书个啊！”
就辣阿拉三个老同学忙了叙旧个辰光，勿晓得是勿是我幻听，从半开半掩个门外头，我哪能听到阿拉爷个声音了啦？！要死快唻！阿拉爷啥本事介大寻到搿搭来了啊！
老同学看我表情勿对，朝我豁了记“自家有数”个眼神，然后讲：“侬覅吓侬覅吓，㑚爷人蛮好，客气客气，一点也勿凶，搿歇正辣脱我舅妈茄山河唻……”邹砾接下来讲了眼啥，我是一句也呒没听进去，只觉着自家个脑子里向侪是浆糊，看了看边头个小金，哈哈，伊只面孔像拆污拆辣身浪一样难看。再一看手表，啥已经八点多钟啦？！我记得睏觉个埃歇只有一点多，哪能搿寣会睏了介长辰光啦……还呒没等我想清爽，舅妈就来敲门喊阿拉出去了。
唉，逃勿脱了，只有硬了头皮走出书房。阿拉爷真个坐辣客厅里，我勿好意思个走到伊旁边，侬覅讲噢，伊看到我，只表情也蛮尴尬个，也呒没多响啥，谢过邹砾舅妈，就带了我脱小金告辞了。到了楼下头，我看到车子里还坐了小金个爷娘，原来伊拉是一道来个。回去个路浪，阿拉爷开车，大家侪呒没哪能讲言话。我帮小金并呒没直接拨大人吃排头，估计伊拉也啥经验脱准备来处理搿种情况。就搿能，阿拉回到了嘉定。
阿拉爷叫我蹲了屋里向休息一天再去读书，我倒是自家坚持第二天就去读书。到了教室，觉着气氛有点怪，估计是老师关照好个，就当啥事体也呒没发生过。我自家管自家朝辣末一排个位子走，还呒没走出几步路，平常两个比较要好个同学先屏勿牢笑出来了，伊拉搿能一笑，赛过病毒性感冒一样，惹得全班同学侪发作了，笑声一片哄堂，根本停勿下来！班主任老师也呒没讲啥，一歇歇就离开了教室。可能伊是勿敢再为难阿拉了，常怕两只小鬼又想勿开自说自话跑出去了。我帮小金呢，用一种“凯旋而归”个姿态，迎接同学们带点崇拜、带点眼热个眼神，好像阿拉真个是做了桩老了勿起个事体一样。不过言话翻转来讲，事实浪向，阿拉的确做了桩伊拉勿敢做个事体，尽管搿做法是绝对勿值得提倡个，外加结果还非常戆。爷娘末急煞快（注，此处朗读者有口误，“急”是清音，沪音同“结”，不是“杰”。此处若用“极”字，略带贬义，于文意不妥），当夜天看阿拉呒没回去，就寻到学堂里，葛老师又有啥办法呢，除脱报案，也只有到东到西个寻了。后来再想想，实在是忒勿应该了。
其实呢，我辣辣讲故事个过程当中，还囥过两只小伏笔，接下去我就来脱大家拿最关键个“隐藏剧情”补充完整。搿桩事体过脱以后，我帮邹砾仍旧保持通信。从伊信里向我再晓得，原来伊舅妈一上来就轧出苗头勿对，觉着阿拉两只小鬼头可能是自说自话从屋里向跑出来个。为了勿让阿拉继续滥跑八跑，伊就拿了半粒伊拉老公平常睏觉吃个安眠药，镶辣高乐高里拨阿拉吃了，所以会得一寣睏了介长辰光。想想也是蛮吓人个啦，弄了像拍电影一样。伊看到阿拉睏着了，想办法打电话到学堂里脱老师问了问情况，然后末，学堂里再去通知我帮小金个屋里人。
除脱为啥莫名其妙睏了半日天，还有桩事体勿晓得大家还有印象[口伐]？喏，我出去前头勿是还留了封信，托同学过三天转交拨阿拉爷娘嘛。搿朋友其实是当天夜里就拨老师铆牢了，啥人叫伊平常帮我跑得近呢。毫无意外个是，我当天夜里就拨伊卖脱了，勿但拿封信自动上交，还一本正经个安慰阿拉爷娘，讲我地理课学了蛮好个，跑出去肯定寻得着路……唉，真是勿晓得讲伊啥好了！
搿就是我14岁辰光“离家出走”个经历，廿几年过脱了，勿晓得当年几个小弟兄们，伊拉是勿是还记得？不过有一点我可以肯定，搿就是我个爷娘帮小金个爷娘，是肯定勿会忘记脱个！
（20180529）
我们近期还发过：
【麦唐作】即“麦小姐”和“唐厂长”的作品，是以沪语（语音口音偏上海市区音；文本表达参照钱乃荣《上海话大词典》及《上海话小词典》）为主打的原创方言专栏。文体、形式自由不羁，力求“做得开心，听得满意”。
“麦唐作”又取“卖糖粥”之谐音，愿为众友献上一份带着生活回甘的“地气美食”。
本公众号发布内容（包括文字、音频及未注明“来自网络”的图片）皆为原创，作者保留对作品的著作权。未经授权允许，不得擅自转载。
非常感谢何东先生和何予西同学，为“麦唐作”公众号制作、演唱主题音乐。
如有需要转载或其他工作邀约：
可添加微信号：Leslie_0207
或邮件：leslie_0207@163.com
多谢您的支持和欢喜！