[申情申音]接到喜酒请帖之后
内容来源：夜光杯
作者: 宋跃辉
上海话改编：郭莉
上海话朗读：胡运皎
推荐：丁迪蒙
图片来自网络
[由于公众号平台赞赏功能规则有变化，如想打赏，可长按打赏码（页面下方倒数第2个二维码），多谢朋友们对“麦唐作”的支持！]
搿两天，有个同事又接到吃喜酒个请帖，伊嘴巴浪是呒没讲啥，但是看得出来，伊个心里向是邪气勿开心个。
阿拉大家倒侪勒心里讲，当初侬个小囡结婚，侬为啥发介许多请帖？侬发拨人家，人家当然也要发拨侬，迭个就叫“击鼓传花”，来而不往非礼也。
小囡结婚，到底要勿要办喜酒？照传统观念嘛，是一定要办个。呒没吃过侬个喜酒，呒没哀份闹哄哄、热烘烘个气氛，算啥个结婚啊？所以，酒水是必须要办个。
但是，现在个喜酒是越来越勿好吃了——礼金红包是水涨船高。所以，交关人接到请帖，看上去好像是老开心个样子，心里向可能会得搿能想，侬为啥发拨我请帖啊，还是婚事简办吧。再讲，平常辰光大家已经蛮吃力了，还要跑介远个路来吃喜酒，实在呒没啥性价比。
搿个真叫是死要面子活受罪。现在参加一场婚礼，一份礼金两三千块已经是邪气平常个事体了，根本勿算啥个。乃末，心里有眼肉麻，嘴巴里向就会得叽里咕噜，还要常庄跑老远个路，到饭店里去吃迭份喜酒，心情嘛，也就勿会好到啥地方去了。
有个朋友前枪把去参加了一场婚礼，但是伊心里老勿开心个。伊呢，住勒浦东，婚礼地点却跑到宝山去了。伊面又呒没地铁，伊是真个勿想去，犹犹豫豫了好几天，想寻只像样个借口好覅去。但是横想竖想，好像随便啥个借口侪讲勿过去。乃末，为了面子，只好一路浪向咬紧牙关，调了3部公交车，用了两个多钟头，紧赶慢赶总算是赶到了。面对牢一台子个好小菜，搿位仁兄实在是忒衰瘏了，啥地方还有胃口吃物事啊。
勒陌生头看，每一场婚礼侪是邪气闹猛个。呶，又是拍视频、拍照片，又是邪气欢快个音乐，又是出仔铜钿请来主持人；来参加婚礼个人客呢，一只只面孔浪向侪是笑咪咪个。不过，伊拉心里向到底勒想个是啥物事，心里向究竟是啥个滋味，搿个是只有天晓得了。勿晓得办喜事个东家，阿曾想到过迭个一点？
其实，东家侪是聪明个，哪能会得勿晓得别人家个心思呢？交关人也并勿想收啥个礼金红包个。但是侬假使勿收，葛末，侬自家从前送拨人家个就等于是白送了，搿个勿是忒亏了吗？当然咾，侬现在先收了，将来也是要还个，可能还要多还一眼。
住勒我楼下个文主任，伊拉女儿结婚辰光，伊就收了交关人送个礼。乃末迭个几年，伊是一直勒海还人情。就是昨日，伊还搭人家讲，当初伊收了一个朋友5000块，现在朋友个小囡结婚了，他就要送6000块。为啥要多出1000块呢，因为欸歇辰光个5000，就等于是现在个6000了。假使还是送拨人家5000块，搿就等于少送了。
我个一眼同事们侪勒讲，有种事体是勿好打开窗门讲个，讲得忒清爽了，就会得让人家觉着邪气没意思。譬如，发请帖、吃喜酒，本来是桩蛮开心个事体，要是对礼金红包个多少耿耿于怀，搿趟喜酒肯定是吃勿好了；假使侬一想到要赶搿能介远个路去吃喜酒，葛末，侬个黄鱼肚皮就会得发紧，两只脚就会变得邪气个沉重。要是酒水浪向个菜也呒没啥特色，或者是邪气普通个，葛末，弄得勿好心里就会得有得怨气。讲勿定心里向勒问自家：搿个算啥个名堂啦？！
呵呵，是勿是打算发婚礼请帖个朋友，要注意注意我个言话呢？请帖要发，也只好发拨侬顶要好个朋友，千万勿好“天女散花”“广种薄收”哦。当然，最好是勿收啥个礼金红包，态度也必须要坚定，坚决拒绝送上来个红通通个礼金袋袋，千万勿要勒红包面前，动摇了“勿收”个信念，迭个就是对侬意志个考验。礼金红包勿收，大家就侪轻松，就算是饭店路远，台面浪个小菜勿好，大家心里也勿会得叽里咕噜。搿个辰光大家面孔浪向个笑，大概就是真心个了。对新人个祝福，也是发自肺腑个了。
要是勿收礼金出席婚礼，恐怕大家侪是开心个。但是，侬真个勿收礼金就侪来参加婚礼，大家又会得觉着勿大好意思个。所以讲，心里向再勿开心、再有想法，也只好拿自家省吃俭用存下来个铜钿，装勒只红封袋里，硬仔头皮去吃喜酒。新人搿搭，看见仔侬个红包侪会搿能讲：哪能介客气啦，谢谢侬，谢谢侬！
迭个辰光，大家又只好装出一副老开心个样子回答：“是个呀，人生只有一次嘛，应该个呀！”
朗读者胡运皎
阿拉最近还发过：
【麦唐作】即“麦小姐”和“唐厂长”的作品，是以沪语（语音口音偏上海市区音；文本表达参照钱乃荣《上海话大词典》及《上海话小词典》）为主打的原创方言专栏。文体、形式自由不羁，力求“做得开心，听得满意”。
“麦唐作”又取“卖糖粥”之谐音，愿为众友献上一份带着生活回甘的“地气美食”。
【申情申音】本栏目以沪语朗读为主打，文字来源可原创，也可选取其他老师的优秀文章进行适度改编（尽量取得原作者的授意，如暂未能及时联络得上，也将尊重其原文著作）。
申音悠悠，好文共赏。
本公众号发布内容（包括音频及未注明“来源”的文字、图片）皆为原创，作者保留对作品的著作权。未经授权允许，不得擅自转载。
非常感谢何东先生和何予西同学、陶嵩飞同学，为“麦唐作”公众号制作、演唱片尾曲。
如有需要转载或其他工作邀约：
可添加微信号：Leslie_0207
或邮件：leslie_0207@163.com
多谢您的支持和欢喜！