饮食文化（音频）| 予安：着一抹松花，与春天作别【转发】
The following article comes from 苏白学堂 Author 予安欢喜苏州话
学习苏州话，传承和发扬苏州文化！
松花 亦叫松黄、松华，是马尾松个花，也是一味药材。
明朝李时珍个《本草纲目》里就写着过: “松花，甘、温、无毒。润心肺，益气，除风止血，亦可酿酒。”
搿勒，苏学士赞松花叫“吃也好，浴也好，红白容颜直到老”，着实是美容养颜个圣品。
松花 也是一种颜色，是松树花勒海光影当中泛出来个一种似绿非黄个淡绿颜色，亦叫松花绿或者松绿。
《红楼梦》里有一章，贾母提着有四种叫软烟罗个纱，分别是雨过天青色，银红颜色，秋香色搭仔 松绿 颜色，该搭个松绿就是松花绿。
参考洛梅笙新浪微博专题#中国之色#
《善恶图全传》松花绿的裤子，玉色褶衣，三蓝花鞋。
《儿女英雄传》下首下坐着个美人，穿着藕色衫儿，松绿裙儿
《第一奇女》松绿衬衣西洋锦，织金绣线小龙团。
药也好，色也罢，善食个苏州人总归能拿俚笃搭吃攀上关系，搿勒，就有仔立夏时节不得不提个 松花团子。
每年清明雨过，苏州西南角个群山里个马尾松开花则，尧峰山、旺山、七子山一带个村民也就陆陆续续个上山采松花。
老年纪个人讲，清明前后是换季个辰光，人容易生毛病，也一脚春困。该阶段正好也是松花开花个日脚，松花粉能抗疲劳，调理身体，搿勒，勒海药贩收松花个同时，村民也会得留点自家用，就做成功仔松花团子。
松花粉 是松花团子个灵魂，也是苏州人“食不厌精脍不厌细”个执着。
拿采下来个鲜鲜松花均匀个摊勒报纸浪、竹匾里，晒脱几日。等到晒干仔，先拿花粉轻轻叫个拍下来，再用纱布细细叫个筛出来，该个就是松花粉哉。
称到团子，板定是糯米食，苏州人对糯米制品总归有一种特别个偏好。
相对筛松花个精细，团子做起来就更要技术哉：
首先 ，要拿芝麻打碎成粉，用差不多1：1个比例加入白砂糖，拌均匀，该个就是待用个芝麻䖆；
乃末，糯米粉加40°左右个温开水拌匀，放勒蒸笼里向，架勒土灶头浪蒸熟；
关键个关键是第三步，一定要勒海热吹潽烫个辰光，用戴好个蘸仔冷开水个棉手套，熟练个捏一把蒸烫个糯米粉，挖一只洞，望里向放芝麻䖆；
包好䖆以后，拿团子压扁，滚一层薄嚣嚣个松花粉勒上头就做好哉。
画者：次元叔叔
正宗个松花团子，其实骨仔侪是踏踏扁，像块饼一样个，搿勒，古代也叫 松花饼。
明朝王象晋个《群芳谱》里就有记载：“二三月间抽穗生长，花三四寸，开时用布铺地，击取其蕊，名松黄，除风止血，治痢，和砂糖作饼甚清香，宜速食不耐久留。”
明末个地方志《横溪录》也记录仔张雨个 松花饼 诗：
怪来粔籹作鵞黄，浑是苍髯九粒香。
甜味中边唯食蜜，苦心早晚待休粮。
仙人骐骥留看取，道士嵩阳远寄将。
笑比红绫春餤巧，齿牙根底嚼糖霜。
松花团子涓细光滑，口感软糯䵑香，芝麻醸勒海咬破皮个辰光呼之欲出，要豪燥吸食，汁味偏甜回甘，口齿留香。（勒海该搭，我要补充一下，为啥刚刚我要强调热吹潽烫，因为糯米团温度高，包进去个芝麻白糖再会得快速个焬脱，成为汤汁。）
但不过，松花团子也有个缺点：娇气，不易保存。长途运输个辰光外头一层皮不当心会得破脱，芝麻汤就流脱哉。
搿勒市区弗多见，一般只勒苏州西南角，沿太湖个横泾、越溪、木渎、东西山一带还有周边个乡镇再买得着。
勒海青团落市，炒肉馅团子朆到辰光个春夏之交，到乡下头觅松花团子，捺亨？
NO°／00
Domingo，4 de mayo，2019
词汇详解
亦「yiq8」
又。
搿勒「geq leq」
因此，所以；也可以说“实勒”。
勒海「leq he」
介词，在。
提着「di zaq」
提及。
搭仔「taeq tsy」
连词，和。
俚笃「li toq」
复数他称代词，他们。
辰光「zen kuaon」
时候。例：俚吃饭～转来个。（他吃饭的时候回来的。）
一脚「iq ciaq」
一直。
日脚「gniq ciaq」
日子，时候。
鲜鲜「sie sie」
新鲜。例：~豆。（新鲜的蚕豆。）
勒...浪「leq ... laon」
在……上。例：物事放勒台子浪。（东西放子啊桌子上。）
...叫「...ciau」
“叫”附加在单音节形容词的重叠式后面，构成“AA叫”式状态词， 描写性比形容词强，如“慢慢叫（慢慢地）”“细细叫（细细地）”
板定「pe din」
一定，肯定。
里向「li shian」
里，里面。例：房里向有啥？（卧室里有什么？）
䖆「gnian6」
馅。例：老卜丝䖆团子（萝卜丝馅的团子）
热吹潽烫「gniq thsyu phu thaon」
食物刚出锅，还冒着热气的样子。
薄嚣嚣「boq shiau shiau」
薄薄的。
其实骨仔「ji zeq kueq tsy」
其实。
踏踏扁「taeq taeq pie」
形容扁的样子。
豪燥「ghau sau」
赶快，快点。例：天勒作瀴，～着衣裳。（正在降温，快穿衣服。）
焬「yan2」
熔化、融化。
朆「fen1」
否定词，未曾。
捺亨「naeq han」
疑问词，怎样。
转自“苏白学堂”公众号
本期编辑丨周楚玲
本期审读丨王雅茜
责任编辑丨老 甘
往期精彩回顾
Go to "Discover" > "Top Stories" > "Wow"