（文學）周星馳電影《食神》《濟公》《賭俠》《九品芝麻官》《算死草》《逃學威龍》《家有喜事》粵語對白
閱讀往期：（文學）唐詩宋詞元曲經典句
【粵語《食神》對白】
（劇情）：史提芬周喺火雞姐嘅面檔叫咗碗嗱喳面之後開始狂踩。
史提芬周：堿水面冇過冷河①，所以成碗湯有堿水味。魚蛋亦都冇魚味，但系你為咗掩飾，專登加啲咖喱汁將佢做成咖喱魚蛋，但系噉做太天真嘞，因為你煮嘅時間唔夠，咖喱味根本只系喺表面，而冇入到裏便，掂到湯之後重要沖走埋。好好地一粒咖喱魚蛋，畀你整到冇魚味亦都冇咖喱味，失敗！蘿蔔冇揀過啦，太多渣，失敗！豬皮又煮得太腍，冇咬口呀，失敗！啲豬紅松泡泡，一夾就散，失敗中嘅失敗！最慘系啲大腸，裏面都未通幹凈，重有嚿屎，你有冇搞錯呀？（火雞埋頭做嘢）史提芬周：餵！屎呀餵！……（一連嗌咗三次火雞先理佢）火雞：攞去抆咗佢吖②！（遞廁紙畀史提芬周）史提芬周：唔好咁幽默好喎！我四圍唱你有屎架喎！火雞：唱乜鬼嘢呀！話明嗱喳面③有兩嚿屎有幾咁奇呀？廿三文呀！史提芬周：你畀我呀？火雞：噓！史提芬周：畀下面啦！話曬都食神呀！火雞：食神？史提芬周：食神！（兩人對望良久）
【註】：
①將煮過嘅食物用冷水或冰水略沖洗一下，再繼續炒煮，令其更爽口。過冷河系一種常見煮食方法，特別適合於煮面。②“抆”通常同“屎”搭配，只限用於人身上。戲中火雞叫史提芬抆條豬腸，系對佢最大嘅諷刺。“屎尿屁”用得適當，都可以搞笑而唔俗。③嗱喳面即雜碎面，包括魚蛋、豬紅、豬皮、蘿蔔和豬大腸等配料，睇上去納納集集，顯得好“嗱喳（唔幹凈）”。
【粵語《濟公》對白】
（劇情）：遭群神告禦狀後，降龍羅漢逐個反駁。其中以痛斥王母同月老兩段對白最為精彩。
王母：區區一個羅漢，咩事你都要理過，豈有此理，你偷咗我蟠桃你好賠嘞噃。降龍：王母，分啲畀人冇乜大不了呀。你年年生日喫蟠桃都喫到腬①啦，今年轉下口味喫條蕉吖！（二郎神只狗吠，降龍轉身）降龍：咩呀？條氣唔順當面同我講，唔好揾只狗吠吠貢②，咪以為換咗斑點，我照摷（「趙」音），講你聽呀。到邊個？伏虎：到邊個？（指月老）就系你喇！降龍：你呢個月老，恃住有幾條紅線就將下便啲凡人玩到謝！好似嗰個梁山伯同祝英臺噉咋嘛，你做咩系都唔肯將人綁埋一齊啫，搞到人撞曬墳嘔曬血噉呀③，人哋咩對你唔住吖？你老喇，你好退休啦，唔系啲紅繩遲啲呀實綁到亂曬龍，就搞到呢，男同男、女同女，再搞落去呢就人同豬，曱甴同牛，噉你話喇？
【註】：①：天上咁多蟠桃，當然會吃到滯曬，揾肥胖嘅盧海鵬反串飾演物質生活豐盛嘅王母，就知道真系好「腬」。②：「××貢」系廣州話一種常用嘅表達方式，表示疊詞中嘅動作不停反復發生住。例如「喐喐貢」、「岌岌貢」、「搞搞貢」。③：將梁祝嘅愛情悲劇作為控訴月老嘅證據，最合適不過，但妙就妙在，「撞墳嘔血」呢啲咁悲嘅典故由星爺把口講出嚟，都會變成笑位。
【粵語《賭俠》對白】
片段一：決定跟賭神學賭術
劇情：星仔同阿叔不甘貧窮，商量決定跟賭神高俊學賭術。
達：嗱，衰仔，話時話吖，以我哋兩叔侄噉嘅人才，有咩理由喺處捱公仔面吖①？系，雖然你贏返嚟啲錢唔可以攞嚟使呀，既然系噉，你不如真真正正學賭術，到時咯喎，贏盡天下嘅黃金美女，靚車靚屋。97之後啲大佬走曬，阿叔實行做李嘉誠！星：好啊好啊！我做鄭裕玲！達：鄭裕彤啊，哼！星：吖，系。噉我跟邊個學好呢？（望到墻上賭神張相）賭——神——！？達：冇錯喇，就系賭神。只要你做咗賭神嘅徒弟，到時就可以贏到飛，贏到開巷②。以後養埋阿叔過世都得啦！星（攬住阿叔）：阿叔！我冇話過養你噃！③
【註】：①：「捱公仔面」常被用於形容生活窮困潦倒。其實公仔面都幾好食，不過冇益，都系少食為妙。②：「贏到開巷」重有另一近義詞「贏成條街」，即系大獲全勝嘅意思。③：當星仔深情抱住三叔，觀眾以為佢準備講啲感動三叔嘅「肉麻話」，誰不知突然講句噉嘢，真系畀佢吹脹。
片段二：拍Video拜師
劇情：星仔想拜賭神為師，但又怕遭拒絕，於是決定用另類方法——用好竄嘅態度拍Video，引起人註意。
（用腳艱難轉動轉椅，轉到鏡頭面前）昨日，我個菲律賓工人行過街市，聽到有個賣魚佬講話有條友仔叫做賭神，系你。（大笑）我當堂嚇咗一跳，然後得啖笑。（王晶姐姐餵星仔食面，啲面跌曬落件衫度）呢個世界居然有人自稱為賭神，噉即系分明當我流啫。嗱，我叫賭聖，你睇牌都用隱形液晶體眼鏡吖，我就睬你都嘥氣，直程睇穿牌嘅。呢啲就叫特異功能。（王晶姐姐取出一只A遞畀星仔）呢度有只煙士，只要我輕輕一捽——就即刻變為一只「巢」咗嘅煙士①，因為我未發功吖嘛，我發咗功呀變副麻雀出嚟都得。你話我果然無厘頭啊我夠話你瞓醒昂糾糾咯②。望咩啊？條氣唔順呀發個輪過嚟大家研究下，當然你要補返一百幾十萬過我就唔在講㗎啦。睥咩啊？學嘢唔使錢呀？抄低我聯絡電話，系香港3345678，我再重復一次，系香港3345678。你唔揾我我冇所謂，因為呢啲系你嘅損失。十點後鐘唔好打嚟，因為我瞓咗③。（繼續食面）
【註】：①：當所有人都以為星仔會捽啲咩神奇嘢出嚟嘅時候，得到嘅答案系「一只搓皺咗嘅煙士」——意料之外，卻情理之中，令人捧腹。絕對系星爺無厘頭嘅經典例子。②：「昂糾糾」表面形容精神奕奕，實際上諧音廣州話粗口，做到既喺尺度之內，又令人會心一笑。③：本來只有「十點鐘後」，但星爺往往鐘意改變某啲講法，改成「十點後鐘」並冇人覺得唔妥，反而更加顯出拍Video拍到後段佢已經得意忘形。
【粵語《九品芝麻官》對白】
片段一：窮阿爹與失憶娘親
劇情：星同阿爹捉棋，此時其侄仔有為嚟到，引發一連串無厘頭對話。
包不同：餵，有冇記得我同你講過，做官呢要清如水，廉如鏡。包龍星：阿爹，聽講你以前都系……包不同：系吖，我以前系貪官呀。我個花名呢就叫做“攣都拗得直，死都詏返生” ①，因為我陰功事做得多，你嗰十二個大佬我一個都養唔到呀，搞到我年年白頭人去送黑頭人。真系冇法子喇，我告老歸田，將啲家產送曬出嚟做善事，噉樣呀，至保返你一條命仔。（轉身回屋）所以我而家寫咗個字畀你掛中堂。呢，就系廉潔嘅“廉”。包龍星：橫睇掂睇都分明系一個窮字嚟口架喎。②有為：十三叔啊！十三叔啊！大件事呀！大件事呀！十三叔！阿爺！包龍星：咩嘢事幹③？包老媽：嚟嚟嚟，食糖水，番薯糖水呀。嚟呀，好靚口架煲得④！九仔呀，食啦。包龍星：我系十三呀，阿媽。包老媽：乜我有生咁多個咩？（對住包不同）餵，細路啊，你揾邊個呀？包不同：我系你老公呀。包老媽：哦哦，噉你呢？有為：我系你個孫呀，阿嫲。包老媽：哦……哎唷……咁大個女嘞喎。（對包龍星）老公呀，快啲食啦，唔係凍喇。包龍星：我系十三呀，阿媽。
【註】：①呢兩個俗語形容口才了得，精於辯駁，貼切不過，亦系成齣電影嘅中心思想，後續內容多次呼應包不同呢句話。註意“拗”、“詏”之別。②“窮”、“廉”草書確實有幾分相似。星爺比較呢兩個字，一方面起到搞笑效果，另一方面亦令人反思中國“廉字得個貧”嘅官場黑暗。③“事”、“事情”舊時講“事幹”。唔知系咪受佛山話影響，最近時興講“樹幹”。④補語前置系粵語特有嘅現象，類似例子有“好好呀（佢）演得”、“癲曬呀（佢哋）玩到”。
片斷二：趕返戚家食幹燒伊面
劇情：包龍星用計收服豹頭後，同有為急步趕返戚家嘅婚宴。
包龍星：行快步啦，幹燒伊面肯定冇，希望食返碗紅豆沙嘅啫。有為：就快天光喇，有個橙聽偷笑啦。眾人：包大人，包大人……（圍上嚟）包龍星（以為眾人過嚟尋仇）：餵！我唔系，我唔系，大佬，我唔系！帶頭人：包大人，咪行住啦。包大人，我哋知道你神威蓋世，兩三下手勢①就收服咗豹頭，救咗戚家上下，我哋系代表戚家出嚟歡迎包大人你口架，大家畀啲掌聲！眾人（鼓掌）：包大人好嘢！帶頭人：包大人，不如同咁多位街坊講幾句說話咧。有為（耳語）：講句有水準啲嘅。包龍星（沈思片刻）：幹燒伊面食咗未？②帶頭人：哎！？包大人呀，我哋連乳豬都未食口架，特登留返只豬等包大人你返去慢慢食口架。③（包龍星喺眾人嘅鼓掌中嚟到戚家）
【註】：①做個手勢何其簡單。所以形容輕而易舉搞掂某件事，通常都用“幾下手勢就×××”。②無厘頭就系“估唔到會噉”，觀眾勢估唔到星爺會講句咁“有水準”嘅說話，睇嚟呢個芝麻官睇得最重嘅都系“食”。③粵式婚宴嘅上菜次序系：乳豬（頭盤）、其它菜肴、伊面、包點、甜品（紅豆沙）、水果。以上對白系圍繞呢啲食物展開嘅，飲過喜酒嘅人好易理解對白嘅含義。
【粵語《算死草》對白】
（劇情）：陳夢吉為博水姑娘懵而布置復雜機關，並吩咐阿仁協助。
陳夢吉：請企喺此房間，切勿離開，將會有一大水柱由此竉射向你面之際，請將此豬脷塞向此竉。明解冇？（攞出豬脷交畀阿仁）阿仁：明解。陳夢吉：講次聽下。（阿仁粒聲唔出，面懵懵）陳夢吉：吆！陣間有條老練咁大嘅水柱，喺呢個竉度射到你個冚××一面都系嘅時候呢，你就將呢條仆街豬脷塞落去你老×呢個竉度呀。阿仁：哦！早講呀你！①陳夢吉：賤格。②陳夢吉（想象惜水蓮花嘅情景……）：順一次先。順一次先。阿歡喺隔籬房惜（音「錫」）阿仁摣住嗰條豬脷，我就喺呢間房惜阿水蓮花條脷。萬一追究起上嚟咯噃，阿歡就會自認嘴咗水蓮花。水蓮花大巴大巴扇③阿歡，我再上前揼多佢兩腳。水蓮花撲向我懷抱，我即刻安慰佢，承機再灌醉佢。然後我就——哈哈哈——！當今世上橋王之王舍我其誰！之乎者也！哈哈哈——！
【註】：①：廣州話典型嘅倒裝句式，置於最後嘅主語通常可以省略。②：文縐縐嘅講法聽到一頭霧水，改用粗俗而無厘頭嘅方式再講一次先明解，用「賤格」兩字形容阿仁，貼切不過！③：此處「扇」字形象突出巴掌面積之大。廣州話詞匯豐富，可以同「巴掌」搭配嘅動作，重有「摑」、「冚」、「打」、「星」等，表意各有側重。
【粵語《逃學威龍》對白】
（劇情）：王Sir唔見咗支「善良之槍」，想周星星混入學校做臥底幫佢查失槍下落。
王Sir：冇人叫你扮教師，扮學生啫。周星星：扮學生？！我當年就系因為最憎讀書所以先加入警隊㗎（口架）咋。我唔可以扮學生呀！Sir，你噉做，就即系等於帶我上去一個充滿毒蛇猛獸嘅火山口上便，唔理我嘅哭叫，唔理我嘅哀號，狠狠地，毫無憐憫地，將我用腳一伸，伸落去火紅嘅巖漿裏頭。①你噉做又於心何忍呢？王Sir：噉咪好啰，等你活得豐富，死得精彩。你唔使講㗎（口架）喇，吟詩吟唔甩②架喇。（扐出call機）嗱，呢度有個call機表，你帶住佢，見到666，即系我call你。
【註】：①：以連珠炮式嘅一系列狀語同埋動作，以及兩個誇張嘅比喻，講出做臥底學生嘅極度痛苦。正由於比喻同動作嘅誇張而顯得唔協調，所以產生搞笑效果。②：「吟詩都吟唔甩」系粵語嘅一句常用俗語，意思即系無論如何都擺脫唔到。
【粵語《家有喜事》對白】
片段一：初次邂逅荷裏玉
背景：常歡剛收工行出錄音室，見到荷裏玉撞上嚟。
常歡：小姐，有咩可以幫到你？荷裏玉：我想搵嗰個常歡。常歡：你一定系荷裏玉小姐喇，做乜咁夜先上嚟攞獎品呀？荷裏玉：我都知道最美麗嘅嘢一定發生喺夜晚黑嗰度。難道①你就系常歡？常歡：在下正是。（望住荷裏玉胸部）荷裏玉：實在令人太失望喇。我聽你把聲，我以為你系一個有感性，有電影夢想嘅人。一睇你呢身嘅造型，實在太冇內涵喇。常歡：（笑）終於都畀我搵到一個認為我系冇內涵嘅人喇。何小姐，介唔介意望住我雙眼？荷裏玉：噉又點呢？常歡：似邊個？荷裏玉：E.T.？常歡：多謝，但可唔可以再望真啲，睇下發覺到啲乜嘢？荷裏玉：好大對眼袋呀。常歡：對唔住，呢牌比較夜瞓咗啲。介唔介意再仔細啲睇下？睇下裏便……荷裏玉：噢，好大粒眼屎呀！②常歡：啊，對唔住，呢牌比較燥熱咗啲。唔通你真系一啲都唔覺得，我嘅眼神好似湯告魯斯嘅咩？荷裏玉：妖！③常歡：何小姐，我哋今次嘅邂逅只不過系電影嘅畫頭，如果繼續發展落去必定系一個偉大嘅愛情故事（荷裏玉冷笑，並離去）常歡：相信重會系三級嘅添！
【註】：①“難道”，粵語往往講“唔通”，以上對白同時出現呢兩個詞，不妨比較一下。②常歡指嘅系眼神，而荷裏玉講緊嘅卻系生物上嘅眼睛，呢個就系俄國戲劇理論大師史坦斯拉夫斯基所講嘅利用事物嘅雙重內涵交錯所產生嘅喜劇效果。③某個粗口字嘅諧音，表達一種鄙視態度。
片段二：男人嘅責任
劇情：三兄弟一路食早餐一路討論常滿對老婆不忠嘅問題。
常歡（周星馳）：雖然大嫂系越嚟越豬兜，但你都冇理由喺出面整件二廠①咁過份！常滿（黃百鳴）：老婆如衣服②，我都系多件替換下咋。好似你噉呀？當啲女朋友系臭襪，日日換。常歡：你亂講！（擺只腳上臺）我經常性都唔著襪口架噃。但系我講你聽，女人呢，其實就好似呢只荷包蛋，溝完，要即刻食，食得呢，就唔好嘥。常騷（張國榮）：哼！唔使負責任口架呵？常歡：（笑）溝女其實唔系講負責任嘅，系講戰術，即系好似打仗噉，我win就win硬，但絕不能收留任何戰俘。常騷：阿歡！男人系要落葉歸根要結婚口架。常歡：我百分之一百支持婚姻制度，我認為一個男人結咗婚之後，應該死心塌地噉做個好老公。常騷（對常滿）：聽到未呀？常歡：所以我死都唔肯結婚就系噉解。常騷：賤格！常歡：系淫蕩。常騷：你慌你唔系呀！一個有住家飯唔食要食外賣。你重衰，乜嘢狗屎垃圾你都質落個口，你睇下你吖，成個雞蟲噉樣，你顧住發雞瘟呀你！我都唔明點解你哋一啲道德觀念都冇。唔使守貞操嘅咩嚇？常滿：噉你又唔結婚？常騷：生仔好痛口架！③（阿滿同阿騷即時嚇到跌杯）
【註】：①“二廠”，即系“二奶”、“第三者”，呢個講法而家比較少人用。②廣東有句話系“兄弟如手足，老婆如衣服”，實際上系貶低女人嘅地位。③喺電影入面，Leslie飾演一個基基地嘅角色，講呢句嘢嘅時候已經當咗自己系女人，難怪兩位兄弟畀佢嚇親。
閱讀往期：（文學）唐詩宋詞元曲經典句