吴语三门话《荷塘月色》| 有为推荐

就在前两天，我们突然发现了一个很有意思的公众号，这个公众号会用吴语三门话朗读一些著名的文学作品，也会发布现在少见的三门童谣。

“随着普通话的普及，本地人的下一代会说吴语本地话的越来越少。我的不少同学、朋友，两夫妻都是当地人，彼此沟通、或与祖辈沟通都用本地话，但一与孩子沟通就立即切换成普通话。难道本地话就不如普通话吗？本地话也有其魅力......我希望在工作之余做这样一件事情——记录方言土话，守望吴语乡音。传承历史文化，留住乡愁记忆。”

有为也将陆续采集关于三门风俗和三门的方言小品，与大家分享。

传承历史文化，记忆吾乡吾土。

今日与大家分享三门话朗读朱自清《荷塘月色》：

三门话翻译《荷塘月色》：

“

箇两日心事重重。晚头夜满月，坐道地头乘凉时节，蓦丁头箇一记忖着，日加日走来过去个荷塘，晚头望来是不是不样点？月亮慢慢似爬高爻，墙头外马路得小人顽顽个声响也听不着爻。老孺在屋里畀儿搿牢定搭搭，嘴巴带得轻轻似嘤嘤。我偷来畔披件长衫，门带把得便出去爻。

荷塘岸脚个煤渣小路弯弯曲曲。条路死冷清，日得也无人走猛，夜得便越发断人种爻。荷塘头圈树出满爻，树蕻密密稠稠。路横边寔两株杨柳对几株名字也讴不出个树。无月亮个夜得，条路阴森森，有点㦜人相。晚头且蛮好，讲转来箇月光也还只淡淡个。

路得便只我独个，手背得荡荡。箇一片世界装来寔我记样，我也恰对超出自我，得各个世界爻样。我中意闹热，也中意冷静。中意对人家住解得，也中意独个人。对晚头样，独个人在箇白刮刮个月亮下，何物都好忖，何物也都好不去忖，自由得猛。日得刻板要做个事干、刻板要讲个说话，且都好甮恤渠。箇便是独个人个妙处，我且要好好个享受享受箇无边无限个荷香月色。

弯弯曲曲个荷塘上头，满眼望去都寔密密稠稠个荷花叶。荷花梗望水得出出来高猛高，对亭亭玉立个跳舞小姐个裙样。层加层个荷花叶中央心，两朵白花朗花花嵌得，有袅袅动开得，也有花蕊斜吤得，望来倒霉相样。恰对粒加粒夜明珠样，亦像碧空里向个星星，亦像澡对洗出来个美人。小风拂面，丝加丝清香送来，便对远猛远高楼上头缥缈个歌声样。箇时节叶对花也轻轻似一记抖，触电样，一刹时工夫便传得荷塘吤头去爻。荷花叶本来是肩搭肩敀来紧猛紧，箇一记装，便恰对一道碧绿个水波样。叶下头寔不声不响个流水，遮牢定，望不着猛。荷花叶倒转越望越有味道。

月光对流水样，轻轻似泻荷塘上头。薄菲菲个青雾浮在荷塘里向。叶对花恰对在牛奶里向洗过样，亦恰对用轻纱笼得个梦样。虽然讲寔满月，天得还一层淡云在得，为之望来不亮猛。我忖忖还算箇子顶好——酣睡固不可少，小睡也别有风味。月亮隔树照落来，墈头上向个矮树，畀箇搭加搭黑黜黜个影留落来，不动动望来对鬼样。杨柳树弯曲个树影，像画箇荷花叶得样。塘里向月色不介调匀，但是光、影搭配蛮协调，便对小提琴解出来个名曲样。

塘个头圈，远远近近、高高低低都寔树，算杨柳顶多，畀只塘圈加圈围牢定，只在小路脚得剩两段空当，不识是不是特特意为月亮留得。树色全部黑黜黜，蓦丁头一眼望去对烟雾样。便算箇子，杨柳个风姿也会分得出。树梢脑头上向望过去，是远猛远个一垛山，隐隐约约，便只一只轮廓。树蕻里向还有一两点路灯个光漏出来，无精打采，懵懂懂个眼样。箇时节顶闹热个，寔树得箇沙甲铃对塘得箇虾蟆个声音。当然，箇物都寔人家个闹热，我何物也没有。

箇一记忖着摘莲蓬个事干。摘莲蓬寔江南个旧俗，老早便有爻，六朝时节顶兴。诗歌里向也有记得。摘莲蓬个小大娘，小船划划，小歌唱唱。有人摘，有人望，场面闹热，后生大娘还趁箇时节谈情说爱。梁元帝《采莲赋》里向讲来蛮好：

于是妖童媛女，荡舟心许；鷁首徐回，兼传羽杯；欋将移而藻挂，船欲动而萍开。尔其纤腰束素，迁延顾步；夏始春余，叶嫩花初，恐沾裳而浅笑，畏倾船而敛裾。

可见当时个场面，确实是蛮有意思。且我伲老早也无法消受爻。

 亦忖着《西洲曲》里向个话：

采莲南塘秋，莲花过人头；低头弄莲子，莲子清如水。晚头夜得讲有人摘莲蓬，箇得个荷花也算讲过人头爻。只不过连水影也望不着，寔无较用个。讲来讲去，还寔江南好。

扣箇子忖，头一记窍，几时得门口头爻。轻轻个攮进去，何物声响也无，老孺困去一界爻。

”

记录方言土话，守望吴语乡音。

传承历史文化，留住乡愁记忆。

转载自-- 三门县有为图书馆