【沪语悦读】侬是阿里一届个？

转载自公众号：上海老底子

侬是阿里一届个？

作者：陈党耀

沪语改写：边秦翌

沪语讲述：沈柳宜

推荐：丁迪蒙

点击下方收听音频，时长6分05秒。

阿拉迭一代生勒上海个50后，包括文革之前出生个60后，还有年长个40后，大多数侪退休了，开始享受人生个夕阳红。

好像有只约定俗成个现象，阿拉搿一辈人见了面，一眼看过去像煞是差勿多年龄个人，勒勒介绍自家或者问询对方，一般侪勿问年记属相，先来一句“侬是阿里一届个”？

问阿里一届，简单明了，以我为轴心，往上头或者往下头推算，熟了叫老兄老弟；长得急一眼个，也就是比较老气眼个，北方人会得问伊贵庚、南方人则问伊高寿，人家心里向当然是勿适意个咾，发飙还勿好露勒面孔浪，倒是“阿里一届”比较中性；假使碰着人家回答68、69届，就直接好问年纪轻个辰光下乡到阿里搭去个啊？

借用一段名言：无论侬是啥个肤色，无论侬是勒啥个异国他乡，侬侪可以凭《国际歌》熟悉个曲调，为自家寻到同志搭仔朋友——葛末，无论侬走到阿里搭，也侪可以凭句“侬是阿里一届个”寻到同乡同龄个人。

老同事、老同学久别重逢，大家讲起某个人，记勿起伊姓啥叫啥了，就来句：伊是阿里一届个？出门勒外头，做为旅伴个散客也会得问“侬是阿里一届个？”只要晓得是阿里一届，长幼就清爽，挨下来，就有好茄茄山河话题。

有一趟，一个北方旅伴勒饭桌浪向旁听阿拉上海人讲闲话，伊讲：㑚一歇歇“阿里阿里”，一歇歇“几介几介”，我还当是搿个是上海人专门发个一种声音呢。

迭个“阿里”，勿是马云个阿里，声调勿同，要读成功普通闲话个第二声，是普通闲话里“哪”个意思。

进学堂读书个搿年，称之为“级”，毕业埃年再算“届”。譬如“78级”大学生，必定是“82届”，当然咾，少数医科类专业除外个。但是，82届个学生仔年龄跨度相当大，有得十几岁个差距，勿像中学阶段个老三届搭仔新三届，同届年龄差距基本浪就一年之间伐。

“文革结束之后个几年，“级”搭仔“届”就勿大好推算，因为上世纪80年代之前基础教育呒没步入正规，上海个中学有得两年制个，也有得三年制个。

我中学是“72届”，埃个辰光勿讲“级”，连得小学毕业证书也呒没。因为阿拉搿届进中学糊里糊涂，小学读了七年多。我是杨浦区许昌路第五小学七（二）班个，搿中情况作兴是勒中国小学教育史浪向从来呒没过个。

上海交关年轻人可能勿晓得啥个老三届、新三届。“老三届”是1966、67、68年毕业个三届初、高中生，往后头，“新三届”是指挨勒老三届之后个69、70、72届初中生。

我算是新三届当中个最后一届。上海呒没71届，当时辰光因为“文革”，造成所有学堂毕业生堆积，到1968年出现了从来也没个三届初、高中，六只年级学生同年毕业分配个邪气荒谬个事体，形成了巨大个就业危机，老三届离开学堂之后，一半以上当知青到农村去了，68、69两届还是“一片红”，一律下乡去，除脱仔极少数因为生重毛病勿出去。1971年“一片红”政策结束，70届毕业生分配又是“四个面向”了，就是面向农村、工厂、边疆、基层。因为前头几届还有交关还呒没安置好。阿拉搿届71年肯定没办法分配工作，到1972年底再陆陆续续走出校门。勿晓得是啥人下了啥个文件，拿阿拉直接叫作72届，革命年代嘛，就是搿能介个荒诞、荒唐。

搿歇，只有同学聚会勿会得问人家“阿里一届”个，但是会得问伊是阿里一年个，是大月生还是小月生。72届，1954年生个是小月生、1955年生个是大月生。

“阿里一届”个叫法，可能延续到82届伐，83、84届以后搿能介个称呼就慢慢叫淡化了。

（本文作者）

（本文朗读者）

来源：“吳越小豬”公众号

.