༄༅། །མཁས་གྲུབ་ཀརྨ་ཆགས་མེད་ཀྱི་རང་རྣམ་ལས།
ལོ་གྲངས་བཅུ་གསུམ་གྲོང་ཆོག་བྱས་པའི་ཚེ། །བསྐང་བ་ཟློག་པ་མདོས་དང་གཏོར་ཁ་སྟོན། །བསངས་དང་གསས་མཁར་ཀླུ་ཡི་མཆོད་པ་སོགས། །དྲག་ཞན་ཀུན་གྱི་རྐྱེན་ཟློག་རིམ་གྲོ་བྱས། །གཟའ་ནད་རྒྱལ་ནད་ཅན་འགའི་སྲོག་མགོ་ཐོན། །ནད་པ་གདོན་ཅན་འགའ་ཡི་གདོན་ནད་བསལ། །ཤི་སྲི་ཞུགས་པ་འགའ་ཡི་ཤི་འཕྲོ་བཅད། །བྱད་ཁས་ཕུང་བ་འགའ་ཡི་བྱད་ཟློག་བྱས། །དེ་དག་ཚེ་ཡང་ཟས་ནོར་ཁོ་ནའི་དོན། །ཨེ་རྙེད་ཨེ་སྦྱིན་བསམ་པའི་རློམ་སེམས་སྤངས། །འབུལ་བ་ཆེ་ཆུང་མཉམ་པའི་ལེགས་སོ་བརྗོད། །མ་བྱིན་པ་ལ་འཁང་དང་བརྡ་བསྙག་སྤངས། །སྔོན་ལ་མ་བྱིན་པ་ལ་མི་འགྲོ་སོགས། །རྗེས་ནས་ཞེ་བཞག་ཁ་དྲིན་བརྩི་བ་སྤངས། །རང་ཁྱིམ་འདུག་གམ་གྲོང་ཆོག་བྱས་ཀྱང་རུང་། །མི་ཡིས་བྱིན་པ་མ་གཏོགས་ཁམ་གང་མེད། །ཚེ་འདས་དོན་ནམ་རིམ་གྲོ་ཡིན་ཀྱང་རུང་། །ཐུགས་དམ་དགེ་སྦྱོར་མ་གཏོགས་བྱ་རྒྱུ་མེད། །འབུལ་བ་བྱུང་ན་ཁོ་རང་རྐྱེན་རྣམས་འགྱུར། །གཤིན་དོན་ཡིན་ཀྱང་ཚེ་འདས་དེ་ཡིས་ཐོབ། །འབུལ་བ་མེད་ཀྱང་དགེ་བ་ཐུན་མོང་ཡིན། །བསམ་སྟེ་རྙེད་དང་མ་རྙེད་རོ་མཉམ་བྱེད། །དེ་ཕྱིར་དགའ་མགུ་སླ་ཟེར་འབྲེལ་སྒོ་ཚ། །ལ་ལས་བཟང་མེད་ངན་མེད་དགའ་ཕོར་མཐོང་། །འགྲས་རྒྱུ་དགྲ་རུ་སྔར་དུས་ཡིན་པ་འགའ། །ཡིད་བཞག་མ་བྱས་གར་བོས་དེ་རུ་སོང་། །འདི་ཕྱི་གང་ཕན་ཁ་ཞེ་མེད་པར་བྱས། །འཇིག་རྟེན་འདི་ན་དགྲ་གཉེན་ངེས་པ་མེད། །དགྲ་ནི་གཉེན་འགྱུར་གཉེན་ཡང་དགྲ་རུ་ལྡང་། །སེམས་ཅན་ཐམས་ཅད་ཕ་མར་མ་གྱུར་མེད། །ངེས་པར་ཡིད་ལ་བཞག་ཕྱིར་ཁོག་སྲན་སྤངས། །གྲོང་ཆོག་ལུགས་ཀྱི་འགྲོ་དོན་བྱེད་ལུགས་འདི། །ངེས་པར་འདི་ལྟར་བྱས་ན་སྒྲིབ་པ་ཆུང་། །ཕྱུག་པོ་དབང་ཡོད་རྣམས་དང་གཉོམ་ཆུང་ནི། །དབུལ་པོ་རྣམས་ལས་དབུལ་པོ་གལ་ཆེ་སྟེ། །ཕྱུག་པོ་བཙན་པོས་བླ་མ་སུ་ཡང་རྙེད། །གཉོམ་ཆུང་དབུལ་པོས་མི་རྙེད་སྙིང་རྗེ་བསམ། །མི་ལུས་ཐོབ་ནས་དམ་ཆོས་མ་བྱས་པར། །མི་ཚེ་སྐྱིད་འདོད་ངང་ལ་སྡུག་གིས་ཟད། །ཤི་ནད་ཕོག་ནས་ཆོས་ཤིག་ད་གཟོད་དྲན། །ཕུ་རྒྱུག་མདའ་རྒྱུག་ཉོ་སྐྱི་ཚོལ་གསུམ་བྱེད། །དབང་སྡེར་གང་ཙམ་མགོ་ལ་ཨེ་ཕྱིན་ཟེར། །ནད་དེ་ཨེ་ཕན་གལ་ཏེ་མ་ཕན་ནའང། །བླ་མ་ཕེབས་ན་འགྱོད་པ་མེད་དོ་ཟེར། །ཚེ་འདིའི་སྲོག་དང་ཕྱི་མའི་འགྲོ་ས་གཉིས། །རྗེས་གནང་གཅིག་གཉིས་ཙམ་ལ་རེ་ནས་གདའ། །འདི་ཚོ་བས་ནི་སྙིང་རྗེ་མི་གདའ་བསམ། །དཀའ་དཀའ་དཀོན་དཀོན་ཆེ་འགྱིང་ངས་མ་བྱས། །མྱུར་དུ་སོང་ནས་ཁྱིམ་དེར་སླེབས་ཞོར་ནས། །བྱིན་རླབས་ཆ་གསུམ་བྱབ་ཁྲུས་ལུས་སྦྱིན་དང་། །དབང་སྣ་གང་མང་ནས་ཕུལ་འཇལ་འཇལ་བྱེད། །ཉིན་རེ་དབང་སྣ་བཅུ་བཞི་ཙམ་རེ་འགྲོ། །ཞག་གཉིས་སོང་ནས་ནད་པ་དབང་གིས་བླུས། །དབང་ལ་རྩིས་མེད་བྱེད་པ་མ་ཡིན་ཏེ། །གྲོང་ཆོག་ལུགས་ཀྱི་འགྲོ་དོན་འདི་ཡིན་ཏེ། །ཡི་དམ་རེ་རེའི་མཚན་སྔགས་ཐོས་ནའང་། །འབུ་སྲིན་ཡིན་ཀྱང་ངན་སོང་སྒོ་ཆོད་གསུངས། །དབང་རེ་ཐོབ་ན་ཕན་ཡོན་མུ་མཐའ་མེད། །འཕྲལ་རྐྱེན་ཡིན་ན་ཚེ་ཡང་རིང་བར་ནུས། །དབང་གིས་ནད་པར་ཕན་པ་དུ་མ་བྱུང་། །ཚེ་ཟད་ཡིན་ན་ངན་སོང་སྒོ་ཆོད་བསམ། །དབང་ཡོན་ཆེ་ཆུང་བཟང་ངན་བསམ་མ་མྱོང་། །སྨྱོན་པ་ལ་སོགས་གདོན་རྒོད་འགའ་བཏུལ་བས། །རང་ཡང་གོད་ཁ་ལ་སོགས་གདོན་ཆེ་ཡང་། །རྣམ་རྟོག་སྤངས་ནས་གཞན་ལ་གང་ཕན་བྱས། །ནད་ངན་དམར་བཤལ་ལོང་བ་གཟེར་ཐུང་སོགས། །མེ་ལྟར་མཆེད་པའི་དལ་ཡམས་མང་པོ་ལ། །འཛེམ་བག་མ་བྱས་གར་བོས་དེ་རུ་སོང་། །སྔོན་ལས་གཏུག་པ་མ་ཡིན་གདམས་ངག་དང་། །དམིགས་པ་སྲུང་འཁོར་གཟབ་པས་སྐྱོན་མ་བྱུང་། །དེ་ལྟར་སྲོག་དང་བསྡོས་ནས་ཕན་བཏགས་པས། །མང་པོ་འགའ་ཡིས་དྲིན་དེ་མི་ཤེས་ཤིང་། །འོས་ཚོད་ཙམ་གྱི་བཀུར་བཅག་མི་བྱེད་ཀྱང་། །དེ་ལ་དྲིན་རྩི་གོ་ལོང་ཟུར་མ་སྨྲས། །བཟང་ངན་རོ་སྙོམས་བྱས་པའི་རྣམ་ཐར་ཡིན། །དེ་ལྟར་གྲོང་ཆོག་ལོ་གྲངས་བཅུ་གསུམ་བྱས། །རྩ་བ་བཞི་པོ་མ་འཆུག་སྲོག་ལྟར་བསྲུང་། །གྲོ་གར་གདན་གཅིག་མཐའ་རུ་ཐོན་པར་བྱས། །གྲོང་ཡུལ་རྣམས་སུ་རྒྱུན་དུ་འདུག་དགོས་ཀྱང་། །གྲོང་པའི་ཆོས་ཀྱིས་མ་གོས་འདུལ་ཁྲིམས་གཙང་། །བདག་གི་རྗེས་སུ་འཇུག་པའི་གྲྭ་པ་རྣམས། །གྲོང་ཆོག་བྱེད་ཀྱང་ཚུལ་ཁྲིམས་སྐྱོན་མེད་ཅིང་། །ཐུགས་དམ་འཕེལ་ཞིང་དགའ་མགུ་སླ་བ་དང་། །ཡོན་ལ་འཁོང་དང་བསྡ་བརྙག་མེད་པ་ཡི། །ང་ཡི་རྣམ་ཐར་འདི་ག་སྐྱོང་བར་མཛོད། །
ཁ་བྱང་ལྟར་ནང་དོན་རེ་རེ་བཞིན་གཟིགས་ཐུབ།
、、、、、、
文章有问题？点此查看未经处理的缓存