འཆི་བའི་སྡུག་བསྔལ་ལ་སངས་རྒྱས་གྲོགས་སུ་སྦྲན་དགོས།

༡༠  འཆི་བ་ལ་སྡུག་བསྔལ་ཆེན་པོ་ཡོད་པས་སངས་རྒྱས་གྲོགས་སུ་སྦྲན་ནས་ཐར་པ་དོན་དུ་གཉེར་དགོས།

གལ་སྲིད་ཆོས་ལ་བསླབས་ཏེ་ཉམས་ལེན་གྱི་གདེང་དང་ལྡན་ན་ཉིན་ཞིག་འཆི་བ་མགོ་ཐོག་ཏུ་བབས་ཀྱང་ནང་ཆོས་ཀྱི་འཆི་ཁའི་གདམས་ངག་ཡིད་ལ་དྲན་ཞིང་དེ་ལ་བརྟེན་ནས་གོ་སྐབས་དམ་དུ་ཟིན་ན་ཐར་བའི་ལམ་སྣ་ཟིན་ཤིན་ཏུ་སླ་བ་ཡིན་ནོ། །

ངས་སྔོན་རྩོམ་ཡིག་ཅིག་གློག་མྱོང་ཞིང་དེ་ནི་སློབ་སྡོད་ཞིབ་འཇུག་སློབ་མ་ཞིག་གིས་བྲིས་པ་རེད་འདུག་

ཁོ་ན་རེ། སྔར་ཁོ་རང་སྤྲོ་སྣང་རིང་ལུགས་པ་ཞིག་ཡིན་ཡང་ཕྱིས་སུ་གློ་བུར་དུ་འཆི་བའི་གནད་དོན་ཡིད་ལ་དྲན་ཏེ་ཤི་རྗེས་རང་ཉིད་ནམ་ཡང་རྗེས་མེད་དུ་ཡལ་འགྲོ་བར་སྙམ་ནས་ད་ལྟ་རང་ལ་དབང་བའི་དགའ་བ་དག་ཀྱང་རླུང་གིས་སྤྲིན་བདས་པ་བཞིན་དུ་མེད་པར་འགྱུར་འགྲོ་བས་འཇིགས་སྣང་ཆེན་པོ་ཞིག་གིས་ནོན་ཞིང་ཉིན་མཚན་མེད་པར་བག་འཁུམས་པར་གྱུར་པ་དང་། དེ་དང་མཉམ་དུ་སྤོ་བོ་དང་རྨོ་མོ། ཨ་ཕ། ཨ་མ་སོགས་ཀྱང་སྔ་ཕྱི་མེད་པར་ནམ་ཞིག་འཆི་རྒྱུ་ཡིན་ཞིང་སུ་ཡང་ཆོས་ཉིད་འདི་ལས་ཐར་ཐབས་མེད་པ་ཡིད་ལ་དྲན་ཐེངས་

རེར་སྐྱོ་བ་ཆེན་པོས་གདུང་བཞིན་འདུག འོན་ཀྱང་འདི་འདྲའི་བསམ་བློ་མཚམས་ཀྱང་འཇོག་མི་ཐུབ་པས་ཡིད་ལ་ངང་གིས་དྲན་བཞིན་འདུག་སྐད་སྨྲས། དེ་ནས་ཁོས་འཇིག་རྟེན་འདིར་སུ་ཞིག་གིས་ངའི་རེ་དོགས་འདི་སེལ་བར་བྱེད་ནུས་ཞེས་གང་སར་འདྲི་རྩད་བྱས་འདུག

  ཡིན་ཡང་ངས་ཁོ་ལ་འདི་སྐད་དེ། གལ་སྲིད་ཁྱོད་ཀྱིས་ནང་ཆོས་ལ་བསླབས་ན་མི་ཤི་རྗེས་རྣམ་ཤེས་མི་འཆི་བར་ད་དུང་རང་གིས་བསགས་པའི་ལས་དཀར་ནག་གི་རྗེས་སུ་འབྲངས་ཏེ་འཁོར་བ་རུ་བར་མ་ཆད་པར་འཁོར་དགོས་པའི་གནས་ལུགས་འདི་ངོས་ཟིན་པར་འགྱུར་རོ་ཞེས་སྨྲ་བར་འདོད་དོ། །དེ་ཡང་ལོས་ཡིན་ཏེ་ཁོ་ལ་འདི་འདྲའི་བསམ་བློ་ལྡན་པ་ནི་ཅུང་བཟང་བ་ཞིག་རེད། ཅིའི་ཕྱིར་ཞེ་ན། ཁོ་ནི་ད་ལྟའི་མི་རྣམས་དང་འདྲ་བར་འཆི་བ་གླེང་སྐབས་རྣམ་རྟོག་ཆེན་པོ་ལངས་ནས་གཏམ་གྱི་གླེང་གཞི་གཞན་ཞིག་ལ་བརྗེ་བ་ལྟ་བུ་མི་བྱེད་པར་མ་མཐའ་ཡང་འཆི་བ་ལ་གདོང་གཏོད་བྱེད་ཕོད་པའི་སྙིང་སྟོབས་ཡོད་པ་རེད། འོན་ཀྱང་ཡིད་ཕངས་པ་ཞིག་ལ་ཁོ་རང་ནང་ཆོས་ལ་སློབ་མ་མྱོང་བའི་རྐྱེན་གྱིས་ཉིན་ཞིག་འཆི་བ་ལ་དངོས་སུ་གདོང་ལེན་བྱེད་སྐབས་འདི་འདྲའི་འཇིགས་པ་ལས་ཐར་བའི་ནུས་པ་མེད། མི་འཆི་ཁར་སླེབས་སྐབས་ལྡང་མི་ནུས་པར་མལ་སར་ལྷུང་བ་དང་རོ་བརྒྱ་ལྡན་པའི་བཟའ་བ་མཐོང་ཡང་ཅི་མི་སྙམ་ཞིང་ཡིད་དུ་འོང་བའི་གཟུགས་མཐོང་རུང་ཡིད་མི་འཁྲེང་། ཐ་ན་གཞན་གྱི་ཀུ་རེའི་གཏམ་ཐོས་ཀྱང་རྣམ་འགྱུར་གང་ཡང་མི་སྟོན། གཉེན་ཉེ་དགའ་གྲོགས་རྣམས་ཀྱིས་ཧྲིལ་གྱིས་བསྐོར་ཀྱང་རང་ཉིད་ཀྱི་འཆི་དུས་ལ་སྐད་ཅིག་ཀྱང་འགྱང་བར་བྱེད་མི་ནུས་པས་འདིའི་སྐབས་ཀྱི་སྡུག་བསྔལ་ནི་རང་ཉིད་ཁོ་ནས་མྱོང་དགོས།

དེའི་ཚེ་མི་སྤྱིར་བཏང་བ་དག་སྨྲ་མི་དགོས་པར་སློབ་མ་སྟོང་ཕྲག་འགའ་ཞིག་ཡོད་པའི་བླ་མའམ་འཁོར་འབངས་དུང་ཕྱུར་འགའ་ཞིག་དབང་བའི་རྒྱལ་ཁབ་ཀྱི་དབུ་ཁྲིད་ཡིན་ཡང་འདི་སྣང་དང་ཁ་འབྲལ་སྐབས་རང་ཉིད་ཁོ་ནས་འཆི་བའི་སྡུག་བསྔལ་དང་དུ་ལེན་དགོས་པ་ལས་གཞན་གྱིས་རྩ་བ་ནས་ཚབ་བྱེད་མི་ནུས། ཇི་སྐད་དུ་བདེ་བ་ཅན་གྱི་བཀོད་པ་ཞེས་བྱ་བའི་མདོ་ལས། མི་རྣམས་འཇིག་རྟེན་གྱི་འདོད་སྲེད་དུ་ལྷུང་ནས་གཅིག་པུར་སྐྱེ་ཞིང་གཅིག་པུར་འཆི་ལ་གཅིག་པུར་འགྲོ་ཞིང་གཅིག་པུར་འོང་ངོ་ཞེས་གསུངས།

འཆི་བ་མ་ཟད་ན་བ་ཡིན་རུང་གཞན་གྱིས་དེའི་ཚབ་བྱེད་མི་ནུས། ངས་སྔོན་སྨན་ཁང་དུ་མགོ་ཁྲིད་འགའ་ཞིག་མཐོང་ཞིང་ཁོ་ཚོར་ཆ་རྐྱེན་ཧ་ཅང་བཟང་ལ་བཅོས་སྡོད་བྱེད་སྐབས་ཕེབ་འཁོར་རྒྱས་སྤྲོས་ཅན་གྱིས་སྐྱེལ་མ་བྱེད། ཡིན་ཡང་སྨན་ཁང་དུ་ཐོན་པ་ན་གཉེན་ཉེ་འགའ་ཞིག་གིས་ཁོ་ལ་ལམ་ཆས་དང་ཁུག་མ། རྩིས་འཕྲུལ་སོགས་ཁུར་བའི་གྲོགས་བྱེད་ནུས་པ་ལས་སྡུག་བསྔལ་མྱོང་བའི་ཚབ་བྱེད་མི་ནུས། ན་བ་ཙམ་ལ་འདི་ལྟར་ཡིན་ན་འཆི་བའི་སྐབས་སུ་ནི་སྨོས་ཅི་དགོས། རིན་ཐང་གཞལ་དུ་མེད་པའི་རྒྱུ་ནོར་དང་འཁོར་འབངས་སོགས་ལ་དབང་རུང་སྐར་རྡོག་གཅིག་དང་བྲན་མོ་གཅིག་ཀྱང་འཁྱེར་དབང་མེད་ལ་སེམས་པ་ཇི་ལྟར་འཁྲེང་ཡང་ཐམས་ཅད་ཤུལ་དུ་བསྐྱུར་ནས་འགྲོ་དགོས།

ལྷག་པར་སྡིག་པ་ཆེན་པོ་བསགས་པའི་མི་རྣམས་དབུགས་འཆད་ཁར་སྔར་བྱས་ཀྱི་ལས་ངན་ཡིད་ལ་དྲན་ཏེ་ངན་སོང་ལ་སྐྱེ་རྒྱུ་རེད་སྙམ་ནས་ཤིན་ཏུ་འཇིགས།  རང་ཉིད་ལ་རང་དབང་ལྡན་ཞིང་ལོང་ཡོད་དུས་སུ་འཆི་ཁར་ཕན་ཤིན་ཏུ་ཆེ་བའི་དམ་ཆོས་ཉམས་སུ་མ་བླངས་པས་བློ་འགྱོད་ཆེན་པོས་མནར་བཞིན་བྲང་སེན་མོས་འབྲད་དེ་སེན་རྗེས་ཤུར་རེར་བཏོད་ནས་ཕྱི་མའི་ཡུལ་དུ་འགྲོ་བ་རེད།

སྔོན་བོད་དུ་ངས་འདི་འདྲའི་མི་ཞིག་མཐོང་མྱོང་། ཁོ་གསོན་སྐབས་རི་དྭགས་རྔོན་རྒྱུར་ཧ་ཅང་དགའ་བས་སྲོག་བཅད་པའི་རི་དྭགས་བགྲང་གིས་མི་ལང་། ཁོ་རང་འཆི་ཁར་འཇིགས་པ་ཤིན་ཏུ་ཆེ་ཞིང་དབུགས་མ་ཆད་གོང་ནས་ཤྭ་བ་དང་རྒོ་བ་ཤིན་ཏུ་མང་པོས་ཁོའི་རྗེས་འདེད་པ་མཐོང་སྟེ་ཁ་ནས་ངས་རི་དྭགས་ཧ་ཅང་མང་པོ་གསོད་མྱོང་། ཁོ་ཚོ་ད་ལྟ་སྲོག་ལན་སྙོག་ཏུ་ཕྱིན་འདུག་ཅེས་བར་མ་ཆད་དུ་བོས་པས་འགྲམ་དུ་ཡོད་པའི་ང་ཚོས་འདི་དག་ཐོས་སྐབས་སྐྱི་གཡའ་བ་བྱུང་།

འཆི་བ་ནི་ང་ཚོ་ཡོད་ཚད་ཀྱིས་གདོང་ལེན་བྱ་དགོས་པའི་སྡུག་བསྔལ་ཆེན་པོ་ཞིག་ཡིན།

ཇི་སྐད་དུ་མདོ་སྡེ་དྲན་པ་ཉེར་བཞག་ལས། 

མི་ནི་འཆི་བས་ཀུན་ཏུ་འཆིང་། །

འདི་ནས་ཕྱི་མའི་ཕ་རོལ་འགྲོ། །

འཆི་བ་སྡུག་བསྔལ་ཆེན་པོ་ཉིད། །ཅེས་གསུངས་སོ། །གལ་སྲིད་ཆོས་ལ་བསླབས་ཏེ་ཉམས་ལེན་གྱི་གདེང་དང་ལྡན་ན་ཉིན་ཞིག་འཆི་བ་མགོ་ཐོག་ཏུ་བབས་ཀྱང་ནང་ཆོས་ཀྱི་འཆི་ཁའི་གདམས་ངག་ཡིད་ལ་དྲན་ཞིང་དེ་ལ་བརྟེན་ནས་གོ་སྐབས་དམ་དུ་ཟིན་ན་ཐར་པའི་ལམ་སྣ་ཟིན་ཤིན་ཏུ་སླ་བ་ཡིན་ནོ། །

  དེ་ནི་མེ་འཁོར་དུ་སྡོད་མ་མྱོང་བའི་མི་ཞིག་མེ་འཁོར་ལ་བསྡད་ནས་ཡུལ་གཞན་དུ་འགྲོ་བ་དང་མཚུངས་ཏེ། དེའི་ཕ་མས་ཁོ་ལ་མེ་འཁོར་ས་ཚུགས་སུ་སླེབས་རྗེས་འཛིན་བྱང་ཇི་ལྟར་ཉོ་དགོས་པ་དང་མེ་འཁོར་དུ་ཇི་ལྟར་འཛེགས་དགོས་པ། འདུག་སྟེགས་ཇི་ལྟར་འཚོལ་དགོས་པ་སོགས་སྔ་ནས་གསལ་བོར་བསླབས་ཟིན་པ་ན་མི་དེ་ཁོར་ཡུག་དེ་དང་དེ་རུ་རིམ་གྱིས་ཐོན་སྐབས་དེས་ཀྱང་ཕ་མས་བསྒོས་པ་རྣམས་ཡིད་ལ་དྲན་ནུས་པ་ལྟ་བུ་ཡིན། ང་ཚོ་གསོན་སྐབས་གལ་སྲིད་དགེ་བའི་བཤེས་གཉེན་གྱི་མདུན་ནས་བསླབས་པའི་བར་དོའི་གདམས་ངག་རྣམས་མ་བརྗེད་པར་ཡིད་ལ་བཟུང་ན་ཉིན་ཞིག་བར་དོའི་སྣང་བ་མངོན་དུ་འགྱུར་སྐབས་རེ་རེ་བཞིན་ངོས་ཟིན་ཏེ་དེ་མཐུན་གྱི་གདམས་ངག་རེ་བསྒོམས་ཏེ་ལག་ཏུ་ལེན་ནུས་པ་ཡིན་ནོ། །

ནང་པའི་གྲུབ་པ་ཆེན་པོའི་སར་གཤེགས་པའི་དམ་པ་རྣམས་འཆི་བ་ལ་གདོང་ལེན་བྱེད་སྐབས་ཤིན་ཏུ་བློ་བག་ཕེབ་པོ་ཡིན།

ཐང་ཕྱི་མའི་དུས་སུ་པོ་ཧྥོས་བྱ་བའི་སྒོམ་ཆེན་ཞིག་ཡོད། ཉིན་ཞིག་ཁོང་གིས་སློབ་མ་དག་ལ་ཉེ་ཆར་ང་རང་དབུགས་འབྱིན་རྔུབ་མི་བདེ་བར་གྱུར་འདུག་པས་ཕལ་ཆེར་འགྲོ་བའི་དུས་ལ་སླེབས་ཟིན་པ་འདྲ་ཞེས་གསུངས།

   སློབ་མ་དག་གིས་ཐོས་རྗེས་འཕྲལ་དུ་ལང་ལོང་དུ་གྱུར་ཅིང་ལ་ལས་བླ་མའི་སྐུ་གཟུགས་ད་དུང་ཤིན་ཏུ་བདེ་ཞིང་ཐང་བས་ཐུགས་ཁྲལ་མང་པོ་མ་མཛད་ཅེས་ཞུས་ཤིང་ལ་ལས་ངེད་ཅག་གདུལ་བྱ་འདི་དག་གི་ཆེད་དུ་སྐུ་ཚེ་ཡུན་རིང་འཚོ་གཞེས་གསོལ་ཞེས་ཞུས། ལ་ལས་ནི་ཁྱེད་ཀྱིས་སྐུ་ལུས་ལ་བདག་སྐྱོང་བཟང་པོ་མཛད་ཅིང་སྐུ་ཚེ་ཡུན་རིང་དུ་བརྟན་ནས་སེམས་ཅན་ལ་འགྲོ་དོན་མཛད་དགོས་ཞེས་ཞུས།

  དེ་ལྟར་སྐབས་ཤིག་ཏུ་དགོན་པའི་ནང་དུ་འདུ་འཛིས་ཁེངས།

  ཀུན་གྱིས་བསམ་ཚུལ་སྣ་ཚོགས་བརྗོད་སྐབས་གློ་བུར་དུ་སློབ་མ་ཞིག་གིས་གསོན་ཡང་ཆོག་ལ་ཤི་ན་ཡང་ཆོག་པས་ཐམས་ཅད་སྔར་བསགས་ལས་ཀྱི་རྗེས་སུ་འབྲང་དགོས་པས། ཅི་དགར་གྱིས་ཞེས་སྨྲས། སྒོམ་ཆེན་དེས་ཐོས་རྗེས་ཧ་ཧ་ཞེས་བཞད་མོ་ཆེན་པོ་མཛད་དེ་ཐུགས་དགྱེས་པའི་ངང་ནས་ངའི་སེམས་ནས་བཤད་བསམས་པའི་སྐད་ཆ་ནམ་ཞིག་ཏུ་ཁྱོས་སྐུ་ཉིན་བྱས་པ་ཡིན་ཞེས་གསུངས་རྗེས་སྐུ་ཉི་བར་གཤེགས། དེའི་ཕྱིར། གྲུབ་པ་ཆེན་པོའི་སར་གཤེགས་པའི་དམ་པ་རྣམས་ནི་སྐྱེ་འཆིའི་འཆིང་བ་ལས་གྲོལ་བས་ནམ་ཞིག་ཏུ་འཆི་བ་མགོ་ཐོག་ཏུ་བབས་ཀྱང་བསྙེངས་པ་མི་མངའ་བ་ཡིན་ནོ། །

ང་ཚོས་ཤེས་དགོས་པ་ཞིག་ནི་འཆི་བ་ཐོག་ཏུ་འབབ་སྐབས་འཇིག་རྟེན་གྱི་དངོས་པོ་གང་ཞིག་གིས་ཀྱང་ཕན་མི་ཐོགས་པས་རང་ཉིད་ཀྱིས་བསགས་པའི་དགེ་བའི་ལས་ཁོ་ནས་རང་ཉིད་སྐྱོབ་ནུས། 

ཇི་སྐད་དུ་སློབ་དཔོན་ཞི་བ་ལྷས། 

གཤིན་རྗེའི་ཕོ་ཉས་ཟིན་པ་ལ། །

གཉེན་གྱིས་ཅི་ཕན་བཤེས་ཅི་ཕན། །

དེ་ཚེ་བསོད་ནམས་གཅིག་སྐྱབས་ན། །

དེ་ཡང་བདག་གིས་མ་བསྟེན་ཏོ། །ཞེས་གསུངས་སོ། །

འདི་དག་ནི་འཇིག་རྟེན་གྱི་མི་ཧ་ཅང་མང་པོས་དངོས་གནས་ཤེས་ཀྱིན་མི་འདུག ལྷག་པར་གྲོང་ཁྱེར་ཆེན་པོའི་ནང་དུ་སྡོད་པའི་མི་རྣམས་ནི་ཉིན་རྟག་པར་དོན་སྙིང་མེད་པའི་བྱ་བ་ཆུང་ཆུང་དག་གི་སྟེང་དུ་གཡེངས་ནས་ཚེ་གཅིག་ཏུ་ཆེས་ཤིན་ཏུ་གལ་ཆེ་བའི་དོན་ཆེན་པོ་སྣང་མེད་དུ་བཞག་པ་ཁོ་ན་རེད།

དཔལ་མགོན་འཕགས་པ་ཀླུ་སྒྲུབ་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པ་རྒྱས་པ་ལས། 

གཉིད་མི་ཁུག་རྣམས་མཚན་མོ་རིང་། །

ངལ་བས་དུབ་རྣམས་བགྲོད་ལམ་རིང་། །

བླུན་པོ་དག་ནི་སྐྱེ་འཆི་རིང་། །

དམ་ཆོས་ཡང་དག་དོན་མ་རྟོགས། །ཞེས་གསུངས་སོ། །དེ་ཡང་གཉིད་མི་ཁུག་པའི་མི་རྣམས་ཀྱིས་ནི་མཚན་མོའི་དུས་ཚོད་ཧ་ཅང་རིང་བར་བརྟགས་ནས་གདུང་བ་ཆེན་པོས་མནར་ལ། ངལ་བས་ཤིན་ཏུ་དུབ་པའི་འགྲུལ་པ་རྣམས་ཀྱིས་ནི་བགྲོད་ལམ་ལ་མུ་དང་མཐའ་མེད་པར་ཧ་ཅང་རིང་བ་ཡིན་ནོ་བསམས། སེམས་ཅན་བླུན་པོ་རྣམས་ཀྱིས་ནི་སྐྱེ་དང་འཆི་བའི་འཁོར་བའི་མྱ་ངམ་ཐང་ཆེན་ལས་གྲོལ་བའི་དུས་མེད་པ་རེད་ཅེས་བསམས་པ་རེད།ཅིའི་ཕྱིར་ཞེ་ན། དེ་ནི་ཐར་པ་འཐོབ་པར་བྱེད་པའི་བགྲོད་ལམ་གཅིག་པུ་སྟེ་ཡང་དག་པའི་དམ་པའི་ཆོས་མ་རྟོགས་པའི་རྐྱེན་གྱིས་ཡིན་ཞེས་པའི་དོན་ནོ། །

ཁ་བྱང་ལྟར་ནང་དོན་རེ་རེ་བཞིན་གཟིགས་ཐུབ།

 
འདི་ནས་ལན་གཅིག་གནོན་རོགས།👇