༡ རང་ཉིད་ཀྱི་སྟེང་དུ་ཅི་ཞིག་བྱུང་ཡང་བསོད་ཟད་ཅིག་ཏུ་བསམ་མི་རུང་།
ལེའུ་གསུམ་པ།
མི་རྟག་པ་ནི་མི་ཚེའི་ནུས་པ་ཡང་དག་པ་ཞིག་ལ་སྒྱུར་དགོས།
ད་སྐབས་མི་ཧ་ཅང་མང་པོས་ད་ལྟའི་གནས་བབས་ལ་ཡི་མ་རངས་ནས་སྲོག་བསྡོས་ཀྱིས་གོ་ས་དང་མཚན་སྙན་སྒྲུབ། འོན་ཀྱང་འདི་དག་ཐམས་ཅད་བདག་གིར་དབང་དུ་བྱས་རུང་ནང་སེམས་ནི་ནམ་ཡང་ཡིད་ཚིམས་པའི་ཐབས་མེད་པས་འདི་འདྲའི་ཟད་དུ་མེད་པའི་འཚོལ་སྙེག་གིས་ནམ་ཞིག་རང་ཉིད་བརླག་པར་འགྱུར་རོ། དེ་ནི་གདམས་ངག་འགའ་ཞིག་ལས་འདོད་སྲེད་ཀྱིས་རེ་བ་བརླག་ཅེས་གསུངས་པ་དང་མཚུངས་སོ།།
འཇིག་རྟེན་འདིའི་སྟེང་གི་སྐྱེ་བོ་ལ་ལ་ཞིག་ནི་གོ་ས་ཤིན་ཏུ་མཐོ་བ་ལ་དབང་སྟེ་མཉམ་འབྲེལ་རྒྱལ་ཚོགས་ཀྱི་དྲུང་ཡིག་ཆེན་མོ་དང་།རྒྱལ་ཁབ་སོ་སོའི་དབུ་འཛིན་ལྟ་བུ་སོགས་ཡིན་པས་མིའི་གཙོ་བོའམ་ཡང་ན་དབང་ཐང་གིས་ས་གཞི་ཁེབས་པ་ཞེས་བཤད་ཀྱང་ཆོག ཡིན་ཡང་ཁོ་ཚོ་འདི་སྣང་ལས་འབྲལ་སྐབས་མི་ཕལ་བ་དང་ཁྱད་པར་གང་ཡང་མེད།
འཆི་སྐབས་མ་ཟད་གོ་ས་ལས་བབས་རྗེས་ཀྱང་མི་ཕལ་བ་དང་ཁྱད་མེད།དཔེར་ན་ཨ་རིའི་སྲིད་འཛིན་ཐོག་མ་ཝ་ཧྲིང་ཐོན་སྲིད་ཁྲི་ལས་བབས་རྗེས་ཕ་ཡུལ་དུ་ལོག་སྟེ་ཞིང་གྲོང་བསྐྱངས།
རེས་གྷན་གྱིས་སྲིད་དབང་དོར་རྗེས་ཀྱང་ཞིང་པ་བྱས། འདི་འདྲའི་མཇུག་འབྲས་ནི་མི་སེམས་སྐྱོ་བར་འོས་པ་ཞིག་རེད། ཁོ་ཚོ་སྲིད་ཁྲིར་དབང་སྐབས་ལྷ་ཀླུ་ལྟར་མཆོད་མཆོད་བསྟོད་བསྟོད་བྱེད་ཅིང་མི་ནུས་པ་གཅིག་ཀྱང་མེད། མཐར་དེ་འདྲ་ཞིག་ཏུ་གྱུར་པས་དངོས་གནས་མི་རྟག་པ་ཆེན་པོ་རེད།
ད་དུང་ཀྲུང་གོའི་ཆིང་ཧྲི་ཧོང་དང་ཇིང་གིར་རྒྱལ་པོ་སོགས་ཀྱང་སྔོན་དགྲ་སྡེ་མ་ལུས་པ་གཞོམ་པའི་སེང་ཆེན་ཡིན་པས་འཇིག་རྟེན་འདིར་འགྲན་པའི་ཟླ་དང་བྲལ། ཆིང་ཧྲི་ཧོང་ལྟ་བུར་མཚོན་ན་རྒྱལ་ཁམས་འཐབ་འཁྲུག་སྐབས་ཀྱི་སིལ་བུར་གནས་པའི་གནས་བབས་ལ་རྫོགས་ཚིག་བཀོད་དེ་གནམ་འོག་གཅིག་གྱུར་ཡང་དག་པ་བྱས། ཁོ་ནི་ཀྲུང་གོའི་གོང་མ་ཐོག་མ་ཡིན་པ་མ་ཟད་རང་ཉིད་ཀྱི་བྱས་རྗེས་རྒྱལ་གསུམ་བཙན་ལྔ་ལས་ཀྱང་ཆེ་བར་རློམ་ནས་ད་དུང་ཁོའི་སྲིད་ཁྲིར་དབང་བའི་བུ་རབས་ཚ་བརྒྱུད་རྣམས་ཀྱིས་རིམ་པ་བཞིན་ཕྲེང་དུ་བསྟར་ཏེ་རྒྱལ་རབས་གཉིས་པར་གོང་མ་རབས་གཉིས་པ་དང་རྒྱལ་རབས་གསུམ་པར་གོང་མ་རབས་གསུམ་པ་ཞེས་བཏགས་ཏེ་རྒྱལ་རབས་ཐམས་ཅད་མི་ལོ་ཁྲི་ཕྲག་འབུམ་ཕྲག་ཏུ་དབང་བསྐུར་དགོས་པར་གཏན་ལ་ཕབ། འོན་ཀྱང་མཐར་རྒྱལ་རབས་གཉིས་པ་ལ་ཐོན་པ་ན་ཆིང་རྒྱལ་རབས་སྟབས་ཉེས་ཏེ་མཇུག་རྫོགས་པ་རེད།
ལོ་རྒྱུས་ཀྱི་ནང་དུ་འཁྲབ་པའི་མི་རྟག་པའི་ཟློས་གར་ལས་གཞན་ང་ཚོའི་ཉེ་འཁོར་དུ་ཡང་མི་རྟག་པའི་གནས་ཚུལ་ཤིན་ཏུ་མང་།ན་ནིང་གཞན་ལ་ཁྲིམས་གཅོད་པའི་ཁྲིམས་དཔོན་དང་དབང་ཆེན་སོགས་ད་ལོ་ནི་ལྐོག་ཟ་རུལ་སུངས་ཀྱི་རྐྱེན་གྱིས་བཙོན་ཁང་དུ་འཕངས་ནས་ཁྲི་མུན་གྱི་བྲན་མོར་འགྱུར་སྲིད།དཔེར་ན་ཧྲང་ཧེ་གྲོང་ཁྱེར་གྱི་བསྐོས་མི་༼ཨུ་ཡོན།༽ཧྲུས་ཅི་སྔོན་མ་ཁྲིན་ལང་ཡོས་ཏེ་༢༠༠༨ལོའི་ཟླ་བཞི་པར་ལྐོག་ཟ་དང་དབང་ཆ་གྱ་ཚོམས་སུ་སྤྱོད་པ་སོགས་ཀྱི་ཉེས་མིང་གིས་མི་ལོ་བཅོ་བརྒྱད་ཀྱི་དུས་ཅན་བཙོན་འཇུག་བྱས། ད་དུང་ཀང་ཏོང་ཀྲོང་རིགས་རང་སྐྱོང་ལྗོངས་ཀྱི་གཙོ་གནས་པ་ཞིང་ཁི་ཅེ་དང་ཁྲེང་ཏུའུ་དྲིལ་བསྒྲགས་ཁང་གི་དབུ་ཁྲིད་ཀོ་ཡོང་སོགས་སྔོན་གྱི་ལག་པས་ཉི་མ་སྒྲིབ་པའི་གཟི་བྱིན་ཅན་ནས་མཐར་དོན་རྐྱེན་བྱུང་སྟེ་མཐའ་རུ་ལྷུང་བས། ཁོ་ཚོ་ཚང་མས་མི་རྟག་པ་ཞེས་པ་ལ་འགྲེལ་བརྗོད་ཡང་དག་པ་ཞིག་བྱས་འདུག
གོང་གི་དཔེར་བརྗོད་འདི་དག་གིས་དབང་ཆ་དང་མཚན་སྙན།རྒྱུ་ནོར།ལོངས་སྤྱོད་སོགས་རྟག་བརྟན་དུ་མི་གནས་པར་དབྱར་ཁའི་ཟིལ་པའམ་སྟོན་ཁའི་སྤྲིན་དཀར་དང་འདྲ་བར་མྱུར་དུ་འཇིག་པའི་ཆོས་ཅན་ཡིན་པ་ལ་གསལ་བཤད་འདང་ངེས་བྱས་སོ།།མི་རྟག་པ་ཡིན་པར་མི་ཤེས་པའི་མི་དག་གིས་འདི་དག་གི་ཆེད་དུ་ཐབས་བརྒྱ་ཇུས་སྟོང་གིས་འཚོལ་སྙེག་བྱེད་ཅིང་ལག་ཏུ་ཐོབ་རྗེས་བསམ་བློ་གཏིང་སྤྲུག་བྱས་ཏེ་སྲུང་བ་རེད།ཡིན་ཡང་ཇི་ལྟར་འབད་ཀྱང་མཇུག་མཐར་འདི་དག་ནི་རང་ཉིད་དང་ཁ་འབྲལ་བ་ལས་འོས་མེད།
དངོས་པོ་ཐམས་ཅད་མི་རྟག་པ་ཡིན་པས་རང་ཉིད་ཀྱི་སྟེང་དུ་གནས་ཚུལ་ཅི་ཞིག་བྱུང་ཡང་བསོད་ཟད་ཅན་ཞིག་གམ་སྡུག་བསྔལ་ཅན་ཞིག་ཏུ་བསམ་མི་རུང་།དེ་དང་མཉམ་དུ་གཞན་ལ་བྱུང་བའི་གནས་ཚུལ་དག་ལ་ཡང་གོ་བ་ལོན་པར་བྱེད་དགོས་སོ།།