༡༡ མི་རྟག་པ་ནི་རྒྱུན་ལྡན་ལྟར་ཡོང་བ་ཞིག་མ་ཡིན།
ལེའུ་གསུམ་པ།
མི་རྟག་པ་ནི་མི་ཚེའི་ནུས་པ་ཡང་དག་པ་ཞིག་ལ་སྒྱུར་དགོས།
འཁོར་བགེགས་དང་གཡུལ་འགྱེད།ཆུ་རུ་ནུབ་པ་སོགས་ཀྱི་རྐྱེན་གྱིས་གློ་བུར་དུ་ཚེ་འཕོས་པའི་མི་དག་གིས་ཉིན་དེར་ཁོ་ཚོ་འཆི་རྒྱུ་རེད་ཅེས་བསམ་མྱོང་ངམ།འཆི་བ་ཐོག་ཏུ་འབབ་སྐབས་མི་སུ་དང་ཡང་དུས་མི་འདེབས་པས་སྐར་མ་ཕྱི་མའི་ནང་དུ་མི་དེ་དག་དང་འདྲ་བའི་གནས་ཚུལ་རང་ཐོག་ཏུ་ལྷགས་མིན་ནི་རང་རེས་ཀྱང་ཁག་ཐེག་བྱེད་མི་ཐུབ།
ཉིན་རེར་གསར་འགྱུར་ལ་ལྟ་སྐབས་ག་ས་གང་དུ་ཤི་བའི་གནས་ཚུལ་གྱིས་གང་འདུག་པ་མཐོང་ནུས།
ཡིན་ཡང་མི་ཧ་ཅང་མང་པོས་དེ་ལ་ཅི་མི་སྙམ་ཞིང་འཆི་བ་ནི་གཞན་གྱི་ལས་ཀར་བསམ་པ་ལས་རང་ཉིད་དང་ནམ་ཡང་འབྲེལ་བ་མེད་པ་ལྟ་བུར་བསམས་ཤིང་སྤྱོད།
ཆེད་དུ་བརྗོད་པའི་ཚོམས་རྒྱས་པ་བམ་པོ་བཞི་ཅན་ལས་འདི་སྐད་ཅིག་གསུངས་ཡོད།
སྟོན་པ་བཅོམ་ལྡན་འདས་མཉན་ཡོད་ན་བཞུགས་ཤིང་གྲོང་དེར་ལོ་ན་བརྒྱད་ཅུ་ཅན་གྱི་བྲམ་ཟེ་རྒན་པོ་ཞིག་ཡོད། ཁོ་ནི་བླུན་ཞིང་ཨུ་ཚུགས་ཆེ་ལ་སེར་སྣ་ཅན་ཞིག་ཀྱང་ཡིན་པ་དང་རྒྱུ་ནོར་གྱིས་ནི་བང་མཛོད་ཕྱུར་བོར་གང་བ་ཡོད། བྲམ་ཟེ་རྒན་པོས་རྒྱས་སྤྲོས་ཤིན་ཏུ་ཆེ་བའི་མཁར་བོ་ཆེ་ཞིག་བཞེངས་པ་དང་རང་ཉིད་དངོས་སུ་ལྟ་རྟོག་པ་བྱས་ནས་བཟོ་པ་ལ་བཀོད་འདོམས་བྱས།
བཅོམ་ལྡན་འདས་ཀྱི་ཐོགས་པ་མི་མངའ་བའི་མཁྱེན་པས་བྲམ་ཟེ་རྒན་པོ་ལ་ཚེ་ཚད་ཉིན་གཅིག་ལས་མེད་པ་གཟིགས། ཡིན་ཡང་བྲམ་ཟེ་རྒན་པོས་ནི་ཅི་ཡང་མ་ཤེས་པས་དོན་སྙིང་མེད་པའི་བྱ་བ་དེ་ལ་ཀུན་ཏུ་བྲེལ། བཅོམ་ལྡན་འདས་ཀྱིས་སྙིང་རྗེས་གཟིགས་ཏེ་དངོས་སུ་བྲམ་ཇེ་རྒན་པོའི་སར་ཕེབས།
བྲམ་ཟེ་རྒན་པོ་ལ་བཅོམ་ལྡན་འདས་ཀྱིས་ཁྱོད་ཀྱིས་འབད་པ་ཆེན་པོས་བསྒྲུབས་པས་ངལ་བས་དུབ་པར་མ་གྱུར་ཏམ། རྒྱས་སྤྲོས་ཅན་གྱི་མཁར་བོ་ཆེ་འདི་ལ་དགོས་པ་ཅི་ཞིག་ཡོད་ཅེས་དྲི་བ་མཛད།
བཅོམ་ལྡན་འདས་ལ་བྲམ་ཟེ་རྒན་པོས་ཁེངས་དྲེགས་དང་བཅས་ཏེ་མཁར་བོ་ཆེ་འདིའི་སྔོན་དེ་ནི་མགྲོན་པོའི་ཤག་ཡིན། རྒྱབ་ཕྱོགས་ཀྱི་དེ་ནི་བདག་གི་ཉལ་ཁང་ཡིན། ཤར་ནུབ་ཕྱོགས་གཉིས་ཀྱི་ཤག་དེ་དག་ནི་ཁྱིམ་མི་དང་བུ་བུ་མོ། འཁོར་གཡོག་སོགས་ཀྱི་སྡོད་ས་ཡིན། དབྱར་ཁར་ཚ་བས་གདུང་སྐབས་རབ་གསལ་དུ་ཕྱིན་ནས་བསིལ་རླུང་བསྟེན་ཆོག་ཅིང་དགུན་ཁར་དྲོད་ཤག་ཏུ་སྤོས་ནས་དྲོད་འཇམ་ལ་ལོངས་སུ་སྤྱོད་ཆོག་པས་སྐྱིད་ལྷ་ཡུལ་དང་འདྲའོ་ཞེས་ཞུས།
བཅོམ་ལྡན་འདས་ཀྱིས་ཁྱོད་ཀྱི་བསམ་ཚུལ་དེ་ཧ་ཅང་བཟང་། ཡིན་ཡང་ང་ལ་ཚིགས་སུ་བཅད་པ་གཅིག་ཡོད་པས་གནས་སྐབས་ལས་ཀ་དོར་ནས་ལེགས་པར་ཉོན་དང་གསུངས།
བྲམ་ཟེ་རྒན་པོས་ང་ལ་ད་ལྟ་ཉན་པའི་ལོང་མེད་པས་ཞག་འགའ་ཞིག་གི་རྗེས་སུ་ཁྱེད་ཀྱི་གམ་དུ་བཅར་ཡོང་། གལ་སྲིད་ཁྱེད་ལ་དོན་ཡོད་ན་མདོར་བསྡུས་ཏེ་གསུངས་དང་ཞེས་ཞུས།
བཅོམ་ལྡན་འདས་ཀྱིས་ཁྱོད་ཀྱིས་མ་འོངས་པ་ལ་བཀོད་སྒྲིག་ཤིན་ཏུ་ལེགས་པོ་བྱས་འདུག་ཀྱང་མི་རྟག་པ་ཡོང་བ་ཤིན་ཏུ་མྱུར་བས་མི་ཡུལ་ལས་འཕྲལ་དུ་ཁ་འབྲལ་བར་འགྱུར་རོ། །ད་དུང་ཡང་ཡ་མི་ང་བར་བྲེལ་ཟིང་གིས་འདི་ཁོ་ན་ལ་འབད་པར་བྱེད། འདི་ལས་གླེན་པ་ཞིག་ཅི་ཡོད་ཅེས་གསུངས།
བྲམ་ཟ་རྒན་པས་ཐོས་རྗེས་ཁྱེད་ཀྱིས་གསུངས་པ་བདེན། འོན་ཀྱང་དེ་རིང་ང་ལ་ཁོམ་ལོང་མེད་པས་རྗེས་སུ་མཇལ་ཡོང་ཞེས་ཞུས།
བཅོམ་ལྡན་འདས་ཀྱིས་ཇི་ལྟར་བསྒོས་ཀྱང་ཕན་པ་མེད་པས་འདུལ་བའི་སྐལ་བ་མེད་པར་དགོངས་ཏེ་གཤེགས།
བཅོམ་ལྡན་འདས་གཤེགས་རྗེས་ཡུན་རིང་མ་འགོར་བར་བྲམ་ཟེ་རྒན་པོ་དངོས་སུ་ཁང་པའི་ཀླད་ཀྱི་གདོང་མགོར་འཛེགས་པས་གདོང་མ་གློ་བུར་དུ་ལྷུང་སྟེ་དེས་བརྡབས་ནས་བསད་པ་རེད།
ཡུན་རིང་མ་འགོར་བའི་སྔོན་དུ་གསར་འགྱུར་འདི་སྐད་ཅིག་བརྒྱུད་བསྒྲགས་བྱས་པ་ཐོས།
ནན་ཅིང་དུ་ལོ་ན་དགུ་བཅུ་ཅན་གྱི་བགྲེས་སོང་ཞིག་མི་ཡུལ་ལས་ཁ་བྲལ།དེའི་ཁྱིམ་མི་རྣམས་ཀྱིས་ཧང་སངས་བའི་ངང་ནས་མི་ལོ་བཅུ་ཙམ་དུ་ཟོས་ན་གཟོད་འཛད་ནུས་པའི་རིན་གོང་ལ་ཁྲི་ཚོ་ཁ་ཤས་དགོས་པའི་ཁམས་སྲུང་རྫས་ལུས་འདུག་པ་མཐོང་།
རྒན་པོ་ཁོ་ན་དེ་ལྟར་མ་ཡིན་པར་ད་ལྟ་ན་གཞོན་ཧ་ཅང་མང་པོ་ཡང་དེ་ལྟར་རེད།མ་འོངས་པའི་ཆེད་དུ་བསམ་བློ་གཏིང་སྤྲུག་བྱེད་ཅིང་འཆར་གཞི་སྣ་ཚོགས་ལུ་གུ་རྒྱུད་དུ་བཀོད་སྒྲིག་བྱེད།འོན་ཀྱང་གློ་བུར་དུ་ལྷགས་པའི་མི་རྟག་པས་འདི་དག་ཡོད་ཚད་སྟེང་འོག་གི་ཕུ་མདའ་དཀྲུག་པར་བྱེད་དོ།།
དོན་དུ་ཁོ་ཚོས་དོན་དག་ཅིག་བློ་ལས་བརྗེད་པར་གྱུར་འདུག་སྟེ་དེ་ནི་འཆི་བ་ནི་ཏག་ཏག་རྒྱུན་ལྡན་ལྟར་ཡོང་བ་ཞིག་མ་ཡིན་ནོ།།