༢ མཚན་སྙན་ནི་གདོན་འདྲེས་ཁྱོད་ལ་ཕུལ་བའི་ལག་རྟགས་ཤིག་ཡིན།
ལེའུ་བཞི་པ།
རྒྱུ་འབྲས་ལ་བླང་དོར་ཤེས་པའི་མི་ནི་བསོད་ནམས་ཆེ།
གལ་སྲིད་ཁྱོད་སེང་གེ་ཡིན་ན་གཞན་གྱིས་ཀྱི་རེད་ཅེས་དམོད་ཀྱང་ཁྱི་རུ་དངོས་སུ་འགྱུར་མི་སྲིད་པས་དེའི་ཆེད་དུ་སེམས་གཅོང་ཞུགས་དགོས་དོན་མེད།གལ་སྲིད་ཁྱི་ཡིན་ན་གཞན་གྱིས་ཁྱེད་ནི་སེང་གེ་ཞིག་ཡིན་ཞེས་བསྟོད་བསྔགས་ཕུལ་ཡང་དངོས་སུ་སེང་གེ་རུ་འགྱུར་མི་སྲིད་པས་དེའི་ཆེད་དུ་དགའ་བ་བྱེད་དགོས་དོན་ཡང་མེད།
ཨ་རིའི་བློ་སི་ཐོན་གྱི་སློབ་དཔོན་ཆེན་མོ་ཞིག་གིས་འདས་པའི་དུས་ན་ཕ་མ་དང་དགེ་རྒན།ན་མཉམ་དག་གིས་དོ་ཁུར་བྱས་པ་ཙམ་གྱིས་ཆོག་པར་རྩི་ཡང་ད་ལྟ་ནི་དེ་ཙམ་གྱིས་མི་ཆོག་པར་ཀུན་གྱིས་འཛམ་གླིང་ཧྲིལ་བོའི་འཕྲིན་སྦྱོར་གྱི་དོ་ཁུར་སློང་བསམ་བཞིན་འདུག་ཅེས་སྨྲས།
དཔེར་ན་༢༠༠༡ལོར་པེན་ལ་ཏེན་གྱིས་༩-༡༡དོན་རྐྱེན་བསླངས་རྗེས་ཧེ་ནན་ཞིང་ཆེན་གྱི་སྐྱེས་པ་དར་མ་ཞིག་གིས་མཚན་སྙན་ཤིན་ཏུ་འདོད་ཀྱང་ཐབས་ཟད་དེ་པེན་ལ་ཏེན་གྱི་ནུ་བོ་ཡིན་སྐད་དུ་བསྒྲགས་ཤིང་མིང་ལ་ན་ལ་ཐོས་ཟེར་ཞེས་སྨྲས།
འདི་འདྲའི་མི་དག་གིས་ཡིད་སྨོན་ཅན་ཞིག་གམ་བརྙས་བཅོས་ཅན་ཞིག་གམ་ཟུར་ཟ་ཅན་ཞིག་སོགས་གང་ལ་ཡང་མི་འཛེམས་པར་སྨྱོས་པ་ལྟ་བུས་གཞན་གྱི་མིག་ཟུང་འགུགས་པར་རྩོམ་ཞིང་དེ་ཁུགས་པ་ན་དམིགས་ཡུལ་མངོན་དུ་གྱུར་པར་འདོད་པ་རེད།
ཡིན་ཡང་མཚན་སྙན་གྱིས་མི་རྣམས་ལ་ཅི་ཞིག་སྟེར་ནུས།
གལ་སྲིད་དེས་བསོད་ནམས་དབྱར་མཚོ་ལྟ་བུར་རྒྱས་པར་བྱེད་ཅིང་ཚེ་སྲོག་རི་རབ་བས་ཀྱང་སྲ་བར་བྱེད་ནུས་པའམ་ཡང་ན་གཟུགས་ཕུང་ཐང་ཞིང་སྟོབས་ཤུགས་རྒྱས་པར་བྱེད་པ་དང་ནད་གདོན་བར་ཆད་སོགས་མེད་པར་བྱེད་ནུས་ན་མཚན་སྙན་འཚོལ་སྙེག་བྱས་ཀྱང་མི་ཆོག་པ་ག་ལ་ཡོད།འོན་ཀྱང་དོན་དུ་མཚན་སྙན་ཇི་ལྟར་ཆེ་རུང་བདེ་བ་ནི་ཁྱོད་དང་གྲིབ་མ་བཞིན་འགྲོགས་མི་སྲིད་ཅིང་ཐ་ན་མཇུག་མཐར་མི་ཡུལ་ལས་ཁ་འབྲལ་སྐབས་ཚེ་ཐག་ཉིན་བྱེད་ཙམ་དུ་ཡང་སྲིང་མི་ནུས།
གུང་ཐང་བསྟན་པའི་སྒྲོན་མེའི་ཞལ་ནས།
མཚན་སྙན་གྱི་འབྲུག་སྒྲ་མཐོན་པོར་གྲགས་ཚེ། །
བསོད་ནམས་ཀྱི་ཆུ་འཛིན་རིམ་གྱིས་ཡལ་འགྲོ། །ཞེས་གསུངས།
དགེ་བཤེས་ཁ་རག་པས་ཀྱང་མཚན་སྙན་ནི་གདོན་འདྲེས་ཁྱོད་ལ་ཕུལ་བའི་ལག་རྟགས་ཤིག་ཡིན་ཞེས་གསུངས།
ད་ལྟ་མི་ཧ་ཅང་མང་པོས་དེ་མ་རྟོགས་ནས་མཚན་སྙན་ལ་ཞེན་པ་ཆེན་པོས་བཅིངས།
གས་སྲིད་གཞན་གྱིས་སྐུར་འདེབས་བྱས་ན་འཚོ་བ་དང་ལས་དོན་ལ་དེའི་ཤུགས་གྱེན་ཐེབས་ནས་སྡུག་བསྔལ་ཆེན་པོ་བྱེད་ཅིང་ཐ་ན་ལ་ལ་རང་གསོད་བྱེད།སྦྱོར་བ་འདི་དག་མཁས་པའི་མིག་ནང་དུ་བྱིས་པས་མཚོ་འགྲམ་དུ་བྱེ་མའི་ཁང་བུ་སྐྲུན་པ་ཞིག་ཚེ་སྐྱོ་གདུང་གིས་ངུ་བ་དང་མཚུངས་པར་དགོད་བྲོ་བའི་གནས་ཤིག་ཡིན་ནོ།།
དོན་དུ་མཚན་སྙན་ནི་ཐ་སྙད་འགའ་ཙམ་ཡིན་ཞིང་བྲག་ཅ་དང་མཚུངས་པས་དོན་སྙིང་གང་ཡང་མེད།གལ་སྲིད་ཁྱོད་སེང་གེ་ཡིན་ན་གཞན་གྱིས་ཁྱི་རེད་ཅེས་དམོད་ཀྱང་ཁྱི་རུ་དངོས་སུ་འགྱུར་མི་སྲིད་པས་དེའི་ཆེད་དུ་སེམས་གཅོང་ཞུགས་དགོས་དོན་མེད།གལ་སྲིད་ཁྱི་ཡིན་ན་གཞན་གྱིས་ཁྱེད་ནི་སེང་གེ་ཞིག་ཡིན་ཞེས་བསྟོད་བསྔགས་ཕུལ་ཡང་དངོས་སུ་སེང་གེ་རུ་འགྱུར་མི་སྲིད་པས་དེའི་ཆེད་དུ་དགའ་བ་བྱེད་དགོས་དོན་ཡང་མེད།
གཞན་གྱི་བསྟོད་བསྔགས་ཀྱིས་བཟང་པོ་རུ་མི་འགྱུར་ལ་གཞན་གྱི་སྨྲ་འབེབས་ཀྱིས་མི་ལེགས་པར་ཡང་མི་འགྱུར་བས་ཞེན་ཐག་གིས་འཆིང་རྒྱུ་ཞིག་གང་ཡང་མེད།
ཇི་སྐད་དུ་མན་ངག་རིན་པོ་ཆེའི་མཛོད་ལས།
བསྟོད་སྨད་ཐམས་ཅད་བྲག་ཅའི་སྒྲ་རུ་ཤེས།།ཞེས་གསུངས་སོ།།
དེའི་ཕྱིར།དུས་དང་རྣམ་པ་ཀུན་ཏུ་གཞན་གྱི་གདེང་འཇོག་ལ་གདོང་ལེན་བྱེད་སྐབས་རང་རེས་འདི་འདྲའི་བསམ་པ་ཞིག་རྒྱུད་ལ་འཆང་དགོས་སོ།།