༧ མཆོད་རྟེན་སྐོར་ཚེ་སེམས་ལ་སྒོམ་རྒྱུ་ཡོད་དགོས།
ལེའུ་ལྔ་པ།
སངས་རྒྱས་བྱིན་རླབས་བསམ་མི་ཁྱབ།
མཆོད་རྟེན་ནི་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་སྐུ་གསུང་ཐུགས་ཀྱི་བྱིན་རླབས་འདུས་པའི་སྤྱི་གཟུགས་ཡིན་ཞིང་། བསྐོར་བ་བྱེད་པའི་ཚེ་དེས་འོད་ཟེར་དཔག་མེད་ཏུ་སྤྲོས་ནས་རང་ལ་ཐིམ་ཞིང་རང་ཉིད་ཀྱིས་ཐོག་མ་མེད་པ་ནས་བསགས་པའི་སྡིག་སྒྲིབ་ཐམས་ཅད་ཡོངས་སུ་འདག་པར་སྒོམ་དགོས།
ཆིང་རྒྱལ་རབས་ཀྱི་སྐབས་སུ་ཝོས་ཁྲང་པོ་ཐོང་དགོན་དུ་བཙུན་པ་ཕྱག་གིས་ནད་སེལ་བྱ་བ་ཞིག་བྱུང་། ནད་ཆེ་ཆེ་ཆུང་ཆུང་གང་ཞིག་ཡིན་རུང་ཁོང་གི་ཕྱག་གིས་རེག་ཚེ་ནད་ཐམས་ཅད་ལས་གྲོལ་ནུས། ཁོང་གི་ཕྱག་ལ་དེ་འདྲའི་ནུས་པ་མཆོག་ཏུ་གྱུར་པ་ཞིག་ཅིའི་ཕྱིར་ཡོད་ཅེ་ན། བཤད་རྒྱུན་ལྟར་ན་དགོན་པ་དེར་རིན་པོ་ཆེའི་མཆོད་རྟེན་ཞིག་ཡོད་ཅིང་ཁོང་ཉིན་རྟག་པར་མཆོད་རྟེན་སྐོར་བར་ཕེབ་ཅིང་ལག་པས་མཆོད་རྟེན་གྱི་སོ་ཕག་ལ་རེག་བཞིན་ངག་ཏུ་ཐུགས་རྗེ་ཆེན་པོའི་གཟུངས་རིང་བཟླ་ཞིང་། མི་ལོ་བཅུ་ཕྲག་འགའ་ཞིག་ཏུ་དེ་བཞིན་བསྒྲུབས་ཏེ་རྒྱུན་མ་བཅད་པས་ནུས་པ་དེ་ལྟ་བུ་ལྡན་པ་རེད་ཟེར།
མཚོ་སྔོན་ལ་མཆོད་རྟེན་ཞིག་ཡོད་ཅིང་དེའི་ནང་དུ་བཙན་པོ་ཁྲི་རལ་བ་ཅན་གྱི་དབུ་སྐྲ་ཡོད། ། ༼བྱང་ཆུབ་སེམས་དཔའ་ཆེན་པོ་ཕྱག་ན་རྡོ་རྗེའི་སྤྲུལ་པ་ཡིན།༽ཐེངས་ཤིག ང་ཚོ་ལ་བསྐོར་བ་བྱེད་པའི་གོ་སྐབས་ཤིན་ཏུ་བཟང་པོ་ཞིག་མངོན་དུ་གྱུར་ཅིང་བྱིན་རླབས་ཀྱང་ཤིན་ཏུ་ཆེ་སྣང་ཤར། ངས་བསྐོར་བ་བྱེད་སྐབས་མིག་ཆུ་ཡང་རང་དབང་མེད་པར་ལྐོག་ཏུ་ཤོར། མཆོད་རྟེན་དེའི་ནང་དུ་རིན་ཐང་གཞལ་དུ་མེད་པའི་འཕགས་པ་གང་དེའི་དབུ་སྐྲ་ཡོད་པས་ཚེ་འདིའི་ནང་དུ་ང་ལ་མཆོད་རྟེན་འདི་འདྲ་མཇལ་བའི་སྐལ་བ་ལྡན་པ་ནི་དངོས་གནས་བསོད་ནམས་ཤིན་ཏུ་ཆེན་པོ་ཞིག་རེད་སྙམ་དུ་བསམས།
དོན་དུ་མཆོད་རྟེན་སོགས་ཚོགས་ཞིང་བསམ་གྱིས་མི་ཁྱབ་པ་གང་སར་ཡོད་ཀྱང་མཚམས་ལ་ལར་ང་ཚོ་ཤིན་ཏུ་རྨོངས་པར་གྱུར་ཏེ་དེའི་རིན་ཐང་རྩ་བ་ནས་མི་ཤེས་པས་ཐམས་ཅད་སྣང་མེད་དུ་བཞག་པ་རེད།
ད་ལྟའི་དགོན་པའི་ནང་དུ་ཕྱག་འཚལ་མཁན་ཡོད་ཅིང་སྤོས་མཆོད་མཁན་ཡང་ཡོད་ལ་བསྐོར་བ་བྱེད་མཁན་ཉུང་། ཉིན་ཞིག་ང་རང་སློབ་དཔོན་ཧོས་ནིང་གི་སྐུ་ཡི་དམར་གདུང་ལ་མཇལ་དུ་སོང་ཞིང་བསྐོར་བ་མང་དུ་བྱས་ཀྱང་ཕལ་ཆེ་བ་སྐོར་དུ་མ་ཡོང་བས། ང་རང་ཐབས་ཟད་དེ་ཁྱོད་ཅག་དགེ་བསྙེན་ཚང་མ་ང་དང་ལྷན་ཅིག་ཏུ་ཤོག་ཅེས་འབོད་སྐུལ་བྱས་པས་ངའི་རྗེས་སུ་འབྲངས་ནས་མཉམ་དུ་བསྐོར་ཀྱང་། ལན་ཁ་ཤས་བསྐོར་རྗེས་དགེ་བསྙེན་ཕལ་ཆེ་བས་སླར་ཡང་སྐོར་མི་བསམ་པར་བསྡད་འདུག ཁོ་ཚོས་བསྐོར་བ་བྱས་པ་ལ་ཕན་ཡོན་མེད་པའི་བསམ་པ་མེད་རུང་ཕན་ཡོན་ཁྱད་དུ་འཕགས་པ་ཡོད་པ་འདི་ཕལ་ཆེ་བས་གསལ་བོར་མི་ཤེས་པའི་རྐྱེན་ལ་ཐུག་འདུག
དོན་དུ་རྒྱ་ནག་གི་དམ་པ་ལ་ལས་མཆོད་རྟེན་སྐོར་བ་ལ་ཧ་ཅང་མཐོང་ཆེན་བྱེད་བཞིན་འདུག བཙུན་པ་རྒས་པ་པིན་ཧོན་དགུང་ལོ་བརྒྱ་ཐམ་པར་བཞེས་སྐབས་ང་རང་མཇལ་དུ་སོང་བ་ཡིན། ཁོང་གིས་གསོལ་རས་བཞེས་ཟིན་རྗེས་ངེད་ཅག་སངས་རྒྱས་ཀྱི་སྐུ་བརྙན་སྐོར་དུ་འགྲོ་ཞེས་གསུངས། བཙུན་པ་རྒས་པ་ཁོང་ཤིན་ཏུ་མགྱོགས་པས་ང་ཚོས་རྗེས་ཀྱང་ཟིན་བཞིན་མི་འདུག མཆོད་རྟེན་ལ་བསྐོར་བ་བྱེད་སྐབས་ལུང་མ་བསྟན་གྱི་ངང་དུ་སྐོར་མི་རིགས། དཔེར་ན་སྤྱན་རས་གཟིགས་ཀྱི་སྐུ་བརྙན་ལ་བསྐོར་བ་བྱེད་སྐབས། ཕྱི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་སྤྱན་རས་གཟིགས་དབང་ལ་ཐིམ་པ་དང་། ནང་རྩ་བརྒྱུད་བླ་མ་གང་ན་སུ་བཞུགས་པ་ཐམས་ཅད་སྤྱན་རིམ་གཟིགས་དབང་ལ་ཐིམ། གསང་བ་དག་པའི་ཞིང་དུ་བཞུགས་པའི་ཡི་དམ་མཁའ་འགྲོ་ཐམས་ཅད་སྤྱན་རས་གཟིགས་དབང་ལ་ཐིམ་པར་བསྒོམས་ནས་ངག་ཏུ་ཨོཾ་མ་ཎི་པདྨེ་ཧཱུྃཿཞེས་འདོན་བཞིན་བསྐོར་བ་བྱེད་དགོས། བསྐོར་བ་བྱེད་པའི་པེ་སྤྱན་རས་གཟིགས་དབང་གི་སྐུ་ལས་འོད་ཟེར་དཔག་མེད་ཏུ་སྤྲོས་ནས་རང་ལ་ཐིམ་ཞིང་རང་ཉིད་ཀྱིས་ཐོག་མེད་པ་ནས་ལུས་ངག་ཡིད་གསུམ་གྱིས་བྱས་པའི་སྡིག་སྒྲིབ་ཐམས་ཅད་ཡོངས་སུ་འདག་པར་སྒོམ་དགོས།
སྐྱེས་ཆེན་དམ་པ་ཤིན་ཏུ་མང་པོས་མཆོད་རྟེན་ལ་བསྐོར་བ་བྱེད་སྐབས་རྒྱས་པར་སྒོམ་ཐུབ་ན་ཤིན་ཏུ་བཟང་ཡང་གལ་ཏེ་སྒོམ་མ་ཐུབ་རུང་འདི་ཙམ་བསྒོམ་པར་བྱ་སྟེ་དཔེར་ན་བསྐོར་བྱའི་མཆོད་རྟེན་དེ་ཉིད་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་སྐུ་གསུང་ཐུགས་ཀྱི་བྱིན་རླབས་འདུས་པའི་སྤྱི་གཟུགས་ཡིན་ཞིང་། བསྐོར་བ་བྱེད་པའི་ཚེ་དེས་འོད་ཟེར་དཔག་མེད་ཏུ་སྤྲོས་ནས་རང་ལ་ཐིམ་ཞིང་རང་ཉིད་ཀྱིས་ཐོག་མ་མེད་པ་ནས་བསགས་པའི་སྡིག་སྒྲིབ་ཐམས་ཅད་ཡོངས་སུ་འདག་པར་སྒོམ་དགོས་ཞེས་གསུངས།
བསྐོར་བའི་ཚེ་གལ་སྲིད་བསྐོར་བའི་གཟུངས་སྔགས་འདོན་ཤེས་ན་འདོན་དགོས་ཤིང་འདོན་མ་ཤེས་ན་སྤྱན་རས་གཟིགས་ཀྱི་བསྙེན་པ་དང་ཡིག་བརྒྱ་དང་རྡོ་རྗེ་སེམས་དཔའི་བསྙེན་པ་སོགས་ཀྱང་འདོན་རུང་ངོ་། །
ང་རང་གིས་སྒྱུ་འཕྲུལ་སྐོར་སྐབས་ཐོག་མ་མེད་པ་ནས་བསགས་པའི་སྡིག་པ་ཤིན་ཏུ་མང་བས་གཙོ་ཆེར་རྡོ་རྗེ་སེམས་དཔའི་བསྙེན་པ་འདོན་པ་ཡིན་ཞིང་དེ་ལ་བརྟེན་ནས་སྡིག་སྒྲིབ་སྦྱོང་དགོས། དེ་ནས་སྒྱུ་འཕྲུལ་ལས་འོད་ཟེར་མཐའ་ཡས་པ་འཕྲོས་ནས་རང་གི་སྡིག་སྒྲིབ་ཐམས་ཅད་ཡོངས་སུ་སེལ་བར་སྒོམ་བཞིན་ཡོད། བསྐོར་ཟིན་རྗེས་བསྔོ་བ་རིང་ཐུང་ཅི་རིགས་བཏོན་ནས་སེམས་ཅན་ཐམས་ཅད་སྡུག་བསྔལ་ལས་བྲལ་ཏེ་བདེ་བ་དམ་པ་ཐོབ་པར་དམིགས་ནས་བསྔོ་ཞིང་དེ་ལྟར་བསྐོར་བའི་ལས་དེ་ད་གདོད་ཕུན་སུམ་ཚོགས་པའི་ངང་ནས་མཇུག་ཡོངས་སུ་གྲུབ་པ་རེད།