ཕ་མ་ལ་སྲི་ཞུ་ཆེས་ཆེ་བ་དེ་ནི་འཆི་བ་ལ་མི་འཇིགས་པར་བྱེད་པ་འདི་ཡིན།
ལེའུ་དྲུག་པ།
ཕ་མ་ལ་སྲི་ཞུ་སྒྲུབ་པའི་ཤེས་རབ།
མི་ཧ་ཅང་མང་པོས་ཕ་མའི་དྲིན་ལན་འཁོར་ཆེད་སྲོག་བསྡོས་ཀྱིས་སྒོར་མོ་བསྒྲུབས་ནས་ཕ་མའི་ཚེ་མཇུག་བདེ་སྐྱིད་ཀྱི་ངང་དུ་སྐྱེལ་འཇུག་པར་སྙམ། དོན་དུ་སྲི་ཞུ་ཞེས་པ་ལོ་ལོན་རྣམས་ལ་ཟས་གོས་གནས་མལ་འབེལ་པོ་ཞིག་བྱིན་ནས་ཁྱིམ་ཚང་གི་བདེ་སྐྱིད་ཀྱི་དཔལ་ལ་རོལ་བར་བྱེད་པ་ཙམ་མ་ཡིན་པར་ཁོང་ཚོའི་ནང་སེམས་ཀྱི་འཆི་བའི་འཇིགས་སྐྲག་འདི་སེལ་བར་བྱེད་དགོས།
བོད་ལ་གཏམ་རྒྱུད་འདི་སྐད་ཅིག་ཁྱབ་བདལ་དུ་ཡོད།
སྔོན་ཡིག་ངོ་མི་ཆོད་པའི་ཤིང་བཟོ་ཞིག་ཡོད་པ་དང་ཆུང་མ་སྔ་ནས་ཚེ་ལས་འདས་པས་ཁོ་དང་དེའི་སྲི་ཞུ་ཅན་གྱི་བུ་མོ་གཉིས་བརྩེ་བ་ཆེན་པོས་ཕན་ཚུན་འབྲལ་མི་ཕོད་པ་ལྟ་བུས་འཚོས་ཏེ་བསྡད།
ཉིན་ཞིག་བུ་མོ་ལྡོམ་བུ་ལ་བྱོན་པའི་རབ་བྱུང་བ་འགའ་ལ་འཕྲད་ཅིང་དབུ་བཞུགས་རབ་བྱུང་བ་དེས་སངས་རྒྱས་འོད་དཔག་ཏུ་མེད་པ་དང་བདེ་བ་ཅན་གྱི་ཡོན་ཏན་བསྟན་པས་ཤི་རྗེས་བདེ་བ་ཅན་དུ་སྐྱེ་བར་ཤོག་ཅིག་སྙམ་པའི་རེ་འདོད་ཆེན་པོ་ཞིག་གི་སྐུལ་སློང་བྱུང་བ་རེད། ཉིན་དེ་ནས་བཟུང་བུ་མོས་སངས་རྒྱས་འོད་དཔག་མེད་ལ་གསོལ་འདེབས་བར་མ་ཆད་དུ་བྱས་པས་སེམས་སུ་སྔར་བྱུང་མ་མྱོང་བའི་བློ་བདེ་དང་ཞི་བའི་སྣང་བས་ཁྱབ།
ཕྱིས་སུ་ཤིང་བཟོའི་ལུས་པོ་ཇེ་བས་ཇེ་སྡུག་ཏུ་གྱུར་ནས་ལས་དོན་སྒྲུབ་མི་ནུས་པར་གྱུར། བུ་མོས་ཕ་རྒན་པོ་ལ་བདེ་བ་ཅན་ལ་སྡུག་བསྔལ་དང་འཚེ་བ་མེད་པས་ཁྱེད་ཀྱིས་དེ་རུ་སྐྱེ་བའི་སྨོན་ལམ་འདེབས་དགོས། འཆི་བདག་གིས་འཇིག་རྟེན་འདི་ལས་འགུགས་ཚེ་ཁྱེད་ཉིད་ནམ་ཡང་དགའ་བ་དང་ཞི་བས་ཁེངས་པའི་གནས་དེར་འགྲོ་ཆོག་ཅེས་སྨྲས། ཡིན་ཡང་བུ་མོའི་བསམ་པ་དག་པའི་རེ་བ་ལ་ཕ་རྒད་པོས་དང་ལེན་མ་བྱས།
བུ་མོའི་བསམ་པ་ལ་སངས་རྒྱས་འོད་དཔག་ཏུ་མེད་པས་ཁོང་ཡིད་ལ་བྱེད་པའི་སེམས་ཅན་ཐམས་ཅད་བདེ་བ་ཅན་དུ་འདྲེན་པའི་སྨོན་ལམ་མཛད་འདུག་པས་ང་རང་ཤི་རྗེས་བདེ་བ་ཅན་དུ་སྐྱེ་ནུས་པར་ཐེ་ཚོམ་མེད། ཡིན་ཡང་ངས་ཨ་ཕ་ལ་རོགས་བྱས་ཏེ་སེམས་ཀྱི་འདུན་པ་བདེ་བ་ཅན་ལ་གཏོད་ཐུབ་པར་ཇི་ལྟར་བྱེད་དགོས་སྙམ། མོས་སངས་རྒྱས་འོད་དཔག་མེད་ལ་གསོལ་བ་བཏབ་སྟེ་བསམ་བློ་གཏིང་དུ་སྤྲུགས་པས་མཐར་ཐབས་བཟང་པོ་ཞིག་ཡིད་ལ་འཁོར།
བུ་མོས་ཨ་ཕ་ལ་འདི་སྐད་སྨྲས། སངས་རྒྱས་འོད་དཔག་མེད་བྱ་བའི་རབ་ཏུ་བྱུང་བ་ཞིག་ཉི་མ་ནུབ་ཕྱོགས་སུ་བཞུགས་འདུག དེས་གཟི་བྱིན་བླ་ན་མེད་པའི་ཕོ་བྲང་ཞིག་བཞེང་པར་དགོངས་ནས་ཨ་ཕ་ཁྱེད་ལྟ་རྟོག་པར་སྐོ་བར་བྱེད་དགོས་གསུང་པར་གདའ་བས་ཁྱེད་ཀྱིས་ཁོང་གི་རེ་འདོད་སྐོང་ཐུབ་བམ།
ཤིང་བཟོ་རྒས་པ་དེས་ཁེངས་སེམས་དང་བཅས་ཏེ་བུ་མོ། ཁྱོད་ཀྱིས་ངས་བཞེང་སྐྲུན་བྱས་པའི་ལས་གཞི་གང་ཞིག་ལ་ལས་བཤོལ་བཏབ་པ་མཐོང་། ཁང་པ་ཆེ་ཆེ་ཆུང་ཆུང་གང་ཡིན་ཡང་ངས་ཇུས་འགོད་ལེགས་པོ་བྱས་ཏེ་དངོས་སུ་ལྟ་རྟོག་པ་བྱས་ནས་ཡོངས་སུ་འགྲུབ་རྒྱུ་ཡིན་ཞེས་སྨྲས།
དེ་ནས་བཟུང་ཕ་རྒད་པོས་བློ་སེམས་རྩེ་གཅིག་གིས་སངས་རྒྱས་འོད་དཔག་མེད་ཀྱི་ཕོ་བྲང་ཡིད་ལ་བྱེད་བཞིན་འདུག་པ་མཐོང་ནས་བུ་མོ་ཤིན་ཏུ་དགའ་བར་གྱུར། དེ་ནས་མོས་ཕ་རྒན་ལ་སངས་རྒྱས་འོད་དཔག་མེད་ལ་བློ་ཡིད་གཏོད་དགོས་ཚུལ་དང་ཁོང་གི་བདེ་བ་ཅན་གྱི་ཕོ་བྲང་ལ་མཁོ་བའི་ཡོ་བྱད་ཚང་མ་གསལ་བཤད་བྱས།
བུ་མོས་ཐབས་ལ་མཁས་པའི་སྒོ་ནས་དང་ཐོག་བདེ་བ་ཅན་གྱི་ཞིང་ཁམས་ལ་མོས་པ་མེད་པའི་ཤིང་བཟོ་རྒས་པའི་བློ་སྣ་དྲངས་ཏེ་ཉིན་མཚན་མེད་པར་བདེ་བ་ཅན་གྱི་ཞིང་ཁམས་ཡིད་ལ་བྱས་ཤིང་དུས་རྟག་ཏུ་དེ་རུ་འགྲོ་དགོས་པར་སྙམ་ནས་སེམས་བཏད་པས་མཐར་རྒྱལ་བ་འོད་དཔག་ཏུ་མེད་པས་བདེ་བ་ཅན་གྱི་ཞིང་དུ་དྲངས་སོ། །
དེའི་ཕྱིར། ཤེས་རབ་ལྡན་པའི་མི་ཡིས་ཐབས་སྣ་ཚོགས་པ་ལ་བརྟེན་ནས་ཉེ་འཁོར་གྱི་མི་རྣམས་ངང་ངམ་ཤུགས་ཀྱིས་དགེ་བའི་ལམ་དུ་འགོད་ནུས། དཔེར་ན་ད་སྐབས་རྒྱ་ནག་གི་མི་ཤིན་ཏུ་མང་པོ་ཡོ་ག་སྦྱོང་བར་མོས། གལ་སྲིད་ནུས་པ་ཡོད་ན་ཡོ་ག་སྦྱོར་བརྡར་ཁང་ཞིག་བཙུགས་ཏེ། གྱང་ངོས་སུ་སངས་རྒྱས་འོད་དཔག་མེད་ཀྱི་ཐང་ག་བཤམས་ནས་སློབ་མ་རྣམས་ལ་ཐོག་མར་འོད་དཔག་མེད་ཡིད་ལ་སྒོམ་དུ་འཇུག་པ་དང་ཡོ་གའི་ཤིང་རྟ་ འདི་ལ་གསོལ་བ་གདབ་ཏུ་འཇུག་ཅིང་། ད་དུང་ཕྱག་བྱེད་པའི་རྣམ་འགྱུར་ཡོ་གའི་སྟངས་སྟབས་ཀྱི་ནང་དུ་སྒྲིག་སྦྱོར་བྱེད་ཐུབ་པ་དེ་ལྟ་ན་མི་ཤིན་ཏུ་མང་པོས་ཡོ་ག་སྦྱོང་བ་དང་མཉམ་དུ་བསོད་ནམས་རྒྱ་ཆེན་པོ་གསོག་ནུས་སོ། །
དོན་དངོས་སུ་རང་རེའི་ཉེ་འཁོར་དུ་མིག་གིས་བཤེར་ན་སྐྱེ་བོ་མི་ཉུང་བ་ཞིག་ཤིང་བཟོ་རྒས་པ་དེ་དང་འདྲ་བར་རང་ཉིད་ཀྱི་ལས་དོན་དང་བརྩེ་དུང་ལ་འཛིན་ཆགས་ཆེན་པོ་བྱེད་པ་རེད། གལ་སྲིད་ཁོ་ཚོས་དེ་འདྲའི་བརྩོན་པ་ཆེན་པོས་དགེ་བའི་ལས་ལམ་ལ་གཞོལ་ནུས་ན་འཁོར་བའི་སྡུག་བསྔལ་ལས་གྲོལ་ཏེ་ཐར་བའི་གོ་འཕང་ཐོབ་པ་གདོན་མི་ཟའོ། །ཇི་སྐད་དུ་སྔོན་གྱི་སྐྱེས་ཆེན་དམ་པ་ཞིག་གིས། སེམས་པ་འདི་ལ་འགྲོ་འགྲོ། །
དམ་པའི་ཆོས་ལ་སོང་ན། །
ཚེ་གཅིག་ལུས་གཅིག་ཉིད་ལ། །
སངས་རྒྱས་ཐོབ་པར་འདུག་གོ། ཞེས་གསུངས་ཡོད།
བླ་མ་ཡིད་བཞིན་ནོར་བུའི་ཞལ་ནས་ཀྱང་གལ་སྲིད་སེམས་པ་སོང་བའི་མཛའ་བོ་ཡིད་ལ་དྲན་པ་ལྟར་ཉིན་མཚན་དབྱེར་མེད་དུ་རྒྱལ་བ་འོད་དཔག་མེད་ཡིད་ལ་བྱེད་ནུས་ན་མི་དེ་བདེ་བ་ཅན་དུ་སྐྱེ་ཁོ་ཐག་ཡིན་ནོ་ཞེས་རྟག་ཏུ་གསུངས་པ་རེད།