大吊车——《光华里故事》之十五

一物降一物，不仅仅只有自然界中有，在人间也有，也是人间的法则。

男人眼中的女人，无非是他自己制造出的幻象，再用来迷惑他自己。也是悲哀，但也是快乐。

男人不要觉醒，就不会受到女人的折磨。

阴天，无风。

男宁佝头缩颈，右手拿了根香烟，左手拿了杯茶。

台子上有块女宁刚烧好额牛肉，男宁一看，放下茶杯，拎起来就咬，吃相哈难看。

老婆：希宁啊，还没斩好。我哪能觉着侬登了一只牛身朗厢乱咬。

老公：肚皮饿了，哈好切。

老婆：窝里关了一个多号头了，我问侬，如果现在好册去了，侬最想组撒事体啊？

老公：两桩事体。第一，去买九十九朵玫瑰花巴侬。第二，寻奶只光榔头姐夫搓麻将。伊只戆度，哈戆，水平臭了伐得了，泥头哈粗。

老婆：侬要斩伊冲头啊，十三伐，自家宁呀。

老公：我刚两则“大吊车”额故事巴侬听，侬就晓得伊戆了撒地方

老婆：好呀。

老公：有一趟，伊听庄了，8只花，大吊车，还是清一色。伊有一个毛病，一听庄，就唱歌。格天伊唱《火红的萨日朗》，唱啥“花开一抹红，尽情地怒放”，还有“一梦到天涯，遍地是花香”，想自摸，做梦！

老婆：后来呢。

老公：伊骨头轻呀，伊奶格只牌贴了额骨头高头，侬晓得额呀，伊是只光榔头，伊奶牌再放下来，大家才看到了，有只一筒额印子了了伊额骨头高头，看了哈清桑，上家有一只，下家有一只，我啊有一只。乃么好了，伊相公了呀，大家关特，只看到伊一摸牌就拼命额捏，我特伊刚，轻眼，牌捏碎特啊没用。黄翻。

老婆：格只光榔头是蛮戆额。

老公：我再刚只“大吊车”额故事巴侬听闹。去年热天，有一个东北女宁一道搓麻将，好像是做房产中介额，穿了件吊带衫，胸哈大，电话一只接一只，哈烦。大家摸好牌，东北女宁乃两只花台子郎一摆，刚：我两只花。光榔头两只眼乌珠定烊烊额盯牢东北女宁胸口高头一只黑点痣看，刚：侬三只花。东北女宁刚：啥地方三只啦？光榔头刚：侬自噶阿是一只花呀。 东北女宁拉拉两根吊带，面孔啊红了。

老婆：光榔头蛮花擦擦额么，我要刚巴阿拉阿姐听。

老公：有一副牌，东北女宁大吊车，接了只电话，跑到外头去了，光榔头乃东北女宁额牌翻出来一看，特阿拉刚：三筒。伊正好有只三筒伐敢打，伊就赖脚皮，乃三筒摆了杠头郎厢，调了张牌，笃悠悠点了根香烟。东北女宁进来，摸了只花，杠头高头一摸，三筒，大吊车杠开！挖色啊！我真想巴光榔头切两只大头耳光。老婆啊，侬晓得伐，格副牌输特额钞票，好帮侬买九百九十九朵玫瑰花。

老婆：缺西啊。

微信号 :白辛苦  

沪语里弄小品文 

● 扫码关注我  

历史文章：

《光华里故事》之五：切老酒（原文被删，改文后重发）