顶级作家(贰 ）——半瓶红酒

     “顶级作家”朋友，老清老早微信我，要碰头，中朗十二点敲过，伊就来了，伊平常从来伐切香烟，但是，今朝，伊看台子朗厢有包香烟，伊抽出来一根，问我，打火机呢？点香烟辰光，伊咳嗽了几声，对我发条头，刚，弄瓶啤酒好伐？要冰呃，越冰越好。

      伊刚，昨天夜里，去相亲，约了安福路Alimandali，一只意大利杂货铺，马路廊厢蛮冷呃，楼上倒是蛮暖热呃。伊老早就去了，寻了只黑铁墨脱呃角落头，叫服务员点了两根蜡烛。

过特十分钟，女宁来了，伊自我介绍刚伊叫妮妮，打好招呼，妮妮招呼服务员，刚，蜡烛一根就够了，弄了暗点，要有情调。

      妮妮是上海女宁，打扮了老登样，穿了条蕾丝长袜子，高跟鞋，门克莱尔羽绒大衣一脱，酥胸汹涌，手白如玉，掐的出水来，一件黑颜色羊绒衫，一条千鸟格短裙，戴了一条白颜色围巾，看上去性感了伐得了，看的顶级作家眼花落花，还好像还蛮有知识呃样子 。

      开始随便聊聊，聊了蛮好，后来女宁明当明问伊，侬有房子伐？车子有伐？“顶级作家”想了想，刚，没。但是，我住了法租界，我每天混了法租界，我有两部车子，但是，伐是奔驰，伐是特斯拉，是两部老老卵呃脚踏车，其中一部是充电呃，从法租界踏到五角场，只要一刻钟。妮妮看牢伊，没响，伊又刚，法租界侬晓得伐？就是上海解放前，法国宁白相呃地方。妮妮立起来，讲，格有啥屁用啊，侬又伐是法国宁，梧桐树又伐好柴板烧，梧桐树叶子啊不好当小菜切。

      妮妮一边刚，一边穿羽绒衫，伐好意思，辰光伐早了，我还有眼事体要去办，侬再坐特一歇，我先跑了。

      “顶级作家”朋友一呆，戆特，看看妮妮呃红酒杯，一记头落场势啊没了，但是伊照样笃定如泰山，端起酒杯，摇了摇，刚，慢点，侬以为我只是没钞票买房子，啊没钞票买车子啊？老实帮侬刚，我穷的来汤汤滴，今朝红酒钞票啊付不出，伐要问我为啥，因为我是上海住勒法租界呃“顶级作家”，撒宁伐宁德我？沈从文都要请我切咖啡，拜我为师。

       伊又刚，侬有事体，侬先跑，没问题，但是，侬跑以前，到楼下头，乃红酒单买特。

       妮妮笑笑，刚，凹吆，瞎讲有啥讲头啦，册，碰着赤佬了，别转屁股就跑特了。

       台子朗红酒还挺下来一半。

       ……

       讲到此地，“顶级作家”朋友切了一口啤酒，乃切到一半呃香烟屁股，恶狠狠呃揿了烟灰缸里。

       我安慰伊，当心，不要乃烟灰缸揿碎特。