顶级作家（叁）——富春小笼

     前两天，半瓶红酒事件以后，“顶级作家”心里老伐色艺，蜡烛么点特半根，红酒么切特半瓶，虽然没买单，但是心里厢总归挖色了伐得了，闷了窝里好几天，伐想出门。

     伊刚，格种女宁我碰着多了，穿了蛮登样，腔势老浓，其实内心哈虚，就是要寻有钞票男宁，现实了一踏糊涂。为啥？因为伊没住了法租界，没大家闺秀呃气质，上了只厕所，出来门啊伐关，素质有问题，实在没感觉。

     昨涅，朋友老季看伊受刺激了，残古巴拉，陪伊切了一顿老酒。老季刚，有一个小姑娘，男朋友外插花，拗断了，正好空挡，要帮伊介绍认得一下。“顶级作家”马上就问，格小姑娘住了法租界伐？老季刚，对，住了愚园路愚谷村，资本家出身，爷娘大学老师。伊又问，漂亮伐？老季刚，漂伐漂亮，侬自家去看，我乃伊微信推八侬。

     格趟，伊调枪头了，伐装逼了，不搞红酒蜡烛格一套了，伊刚要接地气，万一没感觉，没看中，红酒价钿巨来西，哪能办啦，尴尬伐啦。伊就约了小姑娘中廊相碰头，勒勒愚园路高头呃富春小笼。

     格天，太阳是暖光，风伐度，但是比较冷，冬树枯叶，满目萧瑟，来来往往人伐多，侪戴了口罩。到店里，伊寻了只靠窗位置，阳光正好照到台面朗，暖洋洋。

十二点钟敲过，小姑娘推门进来，四周看看，“顶级作家”朝伊招招手，小姑娘微微一笑，走过来，打招呼刚，侬好，脱特口罩，对面坐下来。

    小姑娘叫芳芳，白领，国企做财务，长了蛮漂亮，眼睛蛮度，皮肤雪白，长波浪，戴一根红颜色围巾。刚闲话慢吞吞，笃悠悠，老优雅，老有礼貌呃样子，伊去卫生间辰光，“顶级作家”观察了一下，果然，出来辰光，随手关门，伊一记头老满意呃，心里想，到底是生活勒法租界呃女宁，就是伐一样，气质，格就是气质，四个字：大家闺秀。

     伊问芳芳想切啥，芳芳嗲悠悠回答，随便好来。伊又问芳芳想喝点啥，芳芳又嗲悠悠回答，啊随便好来。

“顶级作家”手一招，服务员过来，伊刚，来尼两小笼，一碗小馄饨，一块炸猪排，一瓶可乐，加冰块。

     伊又指指芳芳，对服务员刚，随便帮伊来点啥。

如果喜欢这篇文章，点击“在看”

让更多的人看到

微信号 :白辛苦  

沪语里弄小品文  

● 扫码关注我  

历史文章：