顶级作家（肆）——坍招势
当天夜里，朋友老季约了“顶级作家”，勒勒复兴路，高邮路口一只酒吧碰头。
酒吧精致，但是伐度，因为伐是周末，人啊伐多。老季坐定，开了一瓶十年“阿贝”，要了三只杯子，自嘎倒了一点，咪了一口，袋袋里摸出一根雪茄，闻了闻，没点，眼睛看牢门外。
过忒一歇，门口飘过一部脚踏车，停好，咔嚓一声，撑脚架声音，“顶级作家”来了，打了声招呼，看了看台子高头呃酒，问了声，格是啥酒啦，拎起瓶子，假痴假眼看了一歇，刚，格只酒伐灵，我只切single malt威士忌。老季白了伊一记白眼，指了指酒瓶，嫌鄙呃看牢伊，刚，侬只戆逼样，就是要伐懂装懂，英文看得懂伐？嘎度呃single malt两个字侬没看到啊？伊伐买账，刚，奥，没看清桑。伊别过头，叫服务员，刚，加点冰块。老季勒牢伊，搓伊，刚，侬只洋盘，噶好呃酒，哪能好加冰块？侬以为此地是KTV啊？还号称自家混了法租界，作孽啊！
“顶级作家”闷特，倒了点酒。老季举起杯子，刚，切老酒切老酒。“顶级作家”刚，等歇，法租界切老酒，杯子要碰一记，要有声音，没声音哪能切法子啦。
窗门外头，上街沿高头，一个白衣白裤少女走过，牵了条狗，长发飘飘，皮肤雪白。“顶级作家”别转头，看了看，刚，长了蛮像芳芳嘛？侬看，女宁，如果伊皮肤细而且白，头发软而且飘，基本朗厢，脾气蛮好，伐大会得老作呃，但是，伊会得发嗲。老季放下酒杯，面孔一板，点好雪茄，刚，侬中朗厢约芳芳碰头，切小笼，伊回转去，隔手，微信里乃我骂特一顿，人家芳芳，老好呃小姑娘，卖相好，脾气好，侬只“沙坑”朋友，切么事只管自家，伐管人家。招势啊八侬坍光了。
“顶级作家”哈哈大笑，刚，兄弟啊，阿拉朋友嘎许多年数了，侬哪能越来越伐了解我了啦？我特老早伐一样了，我现在是一个有地位呃宁了，我现在是法租界顶级作家，马路朗厢交关宁看到我，要特我打招呼，我睬啊伐睬伊拉，当作伐宁得。
伊举起酒杯，朝老季晃了晃，老季没睬伊。
记牢，伊又刚，伐要特我谈政治，我伐是政治家，伐要特我谈经济，我伐是经济学家，要特我谈艺术，谈文学，谈哲学，谈美女。
还要记牢，我有一招绝技，就是懂女宁，上海女宁，尤其是法租界呃上海女宁，三个字，作，嗲，精。
老季摇摇头，喝了口酒，刚，作孽啊，真作孽，宁宁晓得侬是啥宁，就是侬自家伐晓得侬是啥宁。
如果喜欢这篇文章，点击“在看”
让更多的人看到
微信号 :白辛苦
沪语短篇小说连载
● 扫码关注我
历史文章：
Send to Author