顶级作家（伍）——滑脚

再过两个礼拜，就要过年了，天气一歇冷一歇热，还好没落雨。到东到西，宁宁侪戴口罩，到啥地方侪要扫码，烦了伐得了，格种涅脚伐晓得啥辰光到头。              

伐晓得啥宁，帮“顶级作家”介绍女朋友，伊刚，我人缘好，没办法，大家晓得，我懂女宁，但是没女宁，没女宁呢，我就写伐出好么事。

老季上趟酒吧里骂伊“沙坑”，伊嘴巴朗没响，但是，伊心里厢是老伐买账呃，伊刚，我懂女宁，忒女宁打交道，我是有原则呃，一般女宁，我绝对是伐埋单，漂亮点呢，让伊埋单，实在太漂亮了呃女宁，就每趟让伊埋单。

昨涅，伊加好对方微信，一看，微信名字叫Apple，蛮可爱呃。

格趟，伐切红酒，伐切小笼，伊想看电影，交关辰光没看电影了。伊就约了国泰电影院门口碰头，看香港电影《拆弹专家》。伊微信帮Apple刚，侬买电影票，我请侬切夜饭Apple刚，好。

国泰电影院门口车多人多，“顶级作家”到呃辰光，Apple已经等了门口头了，伊假痴假呆打招呼刚，伐好意思，堵车。Apple笑笑，然后，伊迅速乃Apple上下打量一番，身材蛮好，因为Apple戴口罩，伊只看到伊童花头，前刘海一刀平，眼角有点吊，一双凤眼，长睫毛，肯定伐是粘上去呃。

电影开场，灯一记头暗下来，绿颜色底板高头，一只金龙兜了一圈，发了几道光，停了当中。

伊坐左边，Apple坐右边，两旁边没啥宁，Apple轻轻摘下口罩，放了包里。银幕朗厢，刘德华看上去有点老，但是还是帅了一天世界，电影里一声爆炸声，碎片漫天飞舞，Apple两只眼睛瞪了老度，“顶级作家”趁机转过头，瞄了伊一记，一呆，伊隐约看到，Apple嘴巴里两只牙齿爬了外头，黑贴墨搨也伐是看了老清桑，伊后悔了，蛮好门口碰着呃辰光，让伊口罩拿下来。

乃么哪能办啦，一只橄榄屁股坐伐牢了。

再看看电影里女主角，倪妮，小姑娘长了赞啊，卖相，身材，头势，胸，走路腔调，伊眼痒了伐得了。

伊想滑脚，又伐好意思跑，屏特一歇，实在坐不牢了，伊悄悄帮Apple刚，去趟卫生间，Apple没响。

伊出来后，就溜特了。路朗厢，伊微信Apple，刚，肚皮痛，切伐消了，先回去了。

如果喜欢这篇文章，点击“在看”

让更多的人看到

微信号 :白辛苦  

沪语短篇小说连载  

● 扫码关注我  

历史文章：