顶级作家（柒）——撩妹妹
一部辣辣黄呃强生擦头开过来，Apple手一招，上车，刚了声再会，门一关，跑特勒。
顶级作家有眼挖色，袋袋里摸出来一根香烟，呼了几口，穿过马路，踏了脚踏车就回去了。车子踏到长乐路茂名路口，兰心剧院门口，红灯，伊左看看，右看看，没警察，加快速度，冲了过去。
刚过路口，警察面对面开了部摩托车，警灯哇哇乱叫，乃伊勒下来，叫伊靠边停。警察刚，我穷招手叫侬伐要穿红灯，侬看啊伐看我。来，身份证出示一下。
伊穷讨饶，刚，对伐起，爷叔，我真呃没看到侬。
警察刚，本来要罚侬五十，看侬态度蛮好，三十块算了。下趟注意。
伊心里一包气，脚踏车直接踏到安福路“白辛苦咖啡馆”。
“白吧”是安福路朗厢一只酒吧，开了交关年数了。安福路老早老安静，格两年，一记头宁多起来，用现在呃刚法，就是网红街，来来往往宁哈多，美女如云，潮潮翻翻。交关小姑娘勒勒马路朗拍照片，拍视频，老冷呃天，还穿超短裙。
有一帮住了附近呃老男人，一有空就坐了“白吧”门口嘎三湖，一杯啤酒，或者一杯咖啡，眼睛看牢门口走过呃漂亮小姑娘，评头论足。
伊拉还成立了一只协会，叫“低保协会”，会长是只光榔头男宁，听口音，好像是南京宁。南京光头欢喜车子，欢喜切茅台酒，还欢喜养狗，伊养了只“法斗”，名字叫“库里南”，好像是一部车子呃名字。
“顶级作家”朋友一有空啊会得来，伊刚，伊是作家，有层次，有深度，有想法。特叠帮老男人，呒啥共同语言，谈伐拢。伊刚伊拉格帮宁，勒勒光天化日之下虚度生命，糊里糊涂朝着一塌糊涂的命运前进。我特伊拉最度呃区别，在于伊拉只有生命呃长度，而我不但有生命呃长度，而且有生命呃宽度。我到此地来，没别呃事体，我是来撩妹妹呃。
“白吧”门口，老李一噶头，笃悠悠，一杯咖啡，一包香烟，凳子高头掼了只双肩包。看到顶级作家来了，打了声招呼，拖了只凳子过来，叫伊坐。
老李问伊，长远伐见，女朋友寻着了伐啦？最近写了点啥啦？
“顶级作家”招呼服务员，要了杯啤酒，坐下来，摆膘劲刚，最近，我勒勒构思一只剧本。老李一呆，吆，搞度了嘛，开始写剧本啦，啥题材啊？“顶级作家”勒勒凳子朗稍许动了动，身体前倾，两只手撑勒脚馒头朗，老神秘呃刚，法租界呃爱情故事，搞七廿三，哈精彩。
老李笑笑，搓伊，刚，侬写出来呃么事哪能会的伐精彩，侬每只标点符号侪会用了老精彩。侬会得写了老好呃，侬伐写会得更加好。
伊听得出老李呃意思，切了口啤酒，没响。别转头，看牢马路高头来来往往呃宁。
伊拍拍老李，指了指马路对过，压低嗓音，刚，老李，对过穿白颜色羽绒呃女宁看到伐？
老李顺牢伊眼光看过去，点点头。
伊又刚，格是我老早女朋友，叫囡囡，切煞我，爱煞我。侬相信伐？我一只微信发过去，伊马上过来。
老李摇摇头。
伊又刚，格么，王！伊如果过来，侬请伊切杯咖啡，我格杯啤酒啊侬埋单。伊如果伐过来，今朝我埋单。
老李刚，王就王，伊如果过来，册那，夜饭啊我埋单。“顶级作家”做了只OK手势.
伊打开手机，打字发微信，阿囡，在哪里？有空吗，要不要一起喝个咖啡？晚上一起吃饭，好吗？后面加了个笑脸表情。发好，抬头看牢对过。
果然，囡囡停下来，掏出手机，看了看，打字微信回答，不好意思，我在外地出差。
老李哈哈大笑，又搓伊，刚，坍招势啊坍招势，对过到底是啥宁啦？侬啊是认错宁啦？服务员，埋单埋单。
“顶级作家”刚，埋单急啥，等歇。伊切了口啤酒，又刚，阿拉宁得噶许多年了，侬懂呃呀，撩妹妹是我强项，特写作一样，一点伐打嗙，侪是顶级水平。
老李刚，伐要掼浪头，格么侬撩撩看。
“白吧”门口两个小姑娘勒勒拍照片，蛮冷的天，穿了老单薄。伊凑上去，假装老关心呃样子，刚，美女，冷伐？侬愿意接受我呃邀请，过来一道切杯咖啡，谈谈艺术，谈谈文学，谈谈音乐伐？
两呃小姑娘看看伊，用普通话回答，刚，不了，谢谢。
伊一听，好像伐是上海宁，伊就用国语刚，听口音，你们好像是东北人。
个子高点呃小姑娘笑笑，回答伊，不，我们是广东人。
老李勒勒旁边，装作没听到，伊穷想笑，但是，屏牢了。
“顶级作家”又刚，你们知道吗？这里是法租界，是个很有文化底蕴的地方，我是法租界的顶级作家，不是随便什么人我都邀请的。
个子高的小姑娘又微微一笑，刚，你也要知道，我们也不是什么人都拒绝的。再见，大叔。
格机，老李屏伐老了，笑了肚皮痛，刚，喇叭腔喇叭腔，东北口音广东口音都分伐清桑，还撩妹妹。埋单埋单，跑路跑路。
“顶级作家”立起来，刚，伐好意思，我有只重要呃会要开，来伐及了，我先跑了，单，侬先埋特，下趟我来。
如果喜欢这篇文章，点击“在看”让更多的人看到
微信号 :白辛苦
沪语短篇小说连载
● 扫码关注我
历史文章：