顶级作家（玖）——格就是爱情
对顶级作家来刚，格几天涅结蛮难过呃，满脑子侪是Apple。老李背后刚伊点啥，南京光头背后哪能刚伊，还有别呃朋友背后刚伊点啥，伊侪晓得，让伊去，伊啊伐会当回事体。
虽然是冬天，但是，伊好像已经感觉到春天快到了，就是有点慢，就像伊每次微信Apple，Apple总归隔特一歇再回复伊一样，伐急伐慢，伐冷伐涅。伊心里急，但是又有啥办法呢？好几次，伊想约Apple出来，Apple总归嗲悠悠刚，近腔波忙，慢点好来。
格天夜里十点多，伊还没困，老李语音微信伊，约伊到乌鲁木齐路“老北京”切热气羊肉，老李刚就伊一嘎头。顶级作家踏了脚踏车就去了。
老李呢，确实是五短身材，板刷头，鹰爪鼻头，但伊别有一番自信呃魅力，加上粗犷的风度，嘴巴会刚，出手大方，马路上走过，伐需要介绍，就晓得是有钞票男宁，而且伊上过最好呃大学，专业是建筑设计，为此，老李非常讨女宁欢喜，伊脾气好，一直笑嘻嘻呃。伊一直刚，五斤哼六斤做啥啦，有啥闲话侪好刚，现在大多数宁呃生活以妥协告终，而我呃生活却是以妥协开始。
顶级作家踏了脚踏车就去了。跑到店里，店里宁坐了啪啪满，一记头暖涅交关。伊看到老李坐了靠门口只台子，一只铜镬子烧了咳，菜啊点好了，一台子，三盆热气羊肉，好几只素菜，台子高头还摆了三瓶廿两头呃二锅头。
老李身边坐了个女青年，丹凤眼，长波浪。老李介绍刚，女青年叫卡拉，姓徐，阿拉侪叫伊卡拉徐，搞音乐呃，敲扬琴，刚刚演出结束，正好马路朗碰着，就一道来了。
顶级作家刚了声，侬好，坐下来。伊帮卡拉徐刚，我只晓得有一个宁叫卡拉扬，蛮有名气呃，好像是侬同行，伐晓得侬宁得伐。
卡拉徐刚，格么，侬百度搜搜看呀。然后别转头帮老李刚，亲爱的，侬朋友蛮幽默呃嘛。
老李反复关照，卡拉徐呃口头语就是“亲爱的”，碰着啥宁侪是“亲爱的”，伐要当回事体，就是一般朋友。
顶级作家嗯了一记，心里想，随便是啥朋友，册那，管我啥事体啦，搭界伐啦。但是，伊进来辰光，明明看到老李右手拉牢卡拉徐呃左手，摸法摸法，油腻了伐得了。
其实伊老早就晓得格桩事体。三年前，老李出差到北京，回来乘高铁，靠窗，一等座，卡拉徐北京演出回来，正好坐了伊旁边，走廊。老李西装笔挺，头势煞清，老有风度呃立起来，让卡拉徐坐了靠窗位子，伊对老李印象老好呃，再刚，侪是上海宁，一路朗谈谈聊聊，加了微信。五个钟头，就像窗外景色，一晃而过。出了车站，老李有司机来接伊，卡拉徐就神魂颠倒呃上了老李车子，伊甚至伐晓得伊坐呃伐是地铁。
后头呃事体，就没必要多啰嗦了，每个宁得老李呃宁侪晓得，老李经常带卡拉徐勒勒外头混。反正，老李就是为了卡拉徐，八伊拉老婆赶出来呃。三年过去了，卡拉徐还是单身，但老李伊拉老婆就是伐肯离婚，所以，老李总觉得有点对伐起卡拉徐，想尽一切办法补偿伊，一歇买只包，一歇买只表，过节就发红包，过生日伊会得买只老老度呃蛋糕。
镬子里加了好几次汤，三瓶二锅头老早切光，羊肉又加了两盆，但是，三个人的局总归伐色宜，再看到老李勒勒卡拉徐旁边鲜格格呃腔调，两呃宁面孔啊贴了一道了，顶级作家哪能会得色宜，感觉自噶就是只电灯泡，尴尬，没劲。平常伊闲话蛮多，要搓宁，要帮宁嘎汰脑子，但是，现在就是刚伐出，心里有心事，啊伐想刚。伊立起来，打了声招呼，刚，切力了，回去困高了。卡拉徐酒有点多了，惹伊刚，亲爱的，慢点帮侬介绍女朋友奥。
伊从店里出来，立特一歇，凝望天空，双手插了袋袋里，打了只喷嚏。
伊回到窝里厢，头有点昏淘淘，灯啊没开，掼倒勒勒沙发朗。伊张开眼睛，看牢黑暗中呃天花板，胡思乱想，脑子里慢慢浮现出Apple迷人呃面容，伊听伐到墙壁朗挂钟滴答声。月光像水一样洒勒地朗一堆乱糟糟呃衣裳朗，想困，伊想勒勒格种栩栩如生呃幻境中困着，但是，伊困伐着。
伊爬起来，来到阳台，推开窗，听到外头传来汽车开过的声音。手机每响一记，伊就会想是伐是Apple发得来呃，但是伊晓得，认得Apple快一个礼拜了，Apple从来没主动先发过微信八伊。伊乃手机关特，掼了沙发高头。
隐约，听到，有声音传来，越来越近，就勒勒房间外头，门把手轻轻转动，是女宁呃脚步声，轻轻，柔柔。
伊紧张，激动，竖起耳朵，听，好像听到Apple轻微呼吸声，又好像看到Apple就立了自噶面前。
梦，格就是梦。醒来，梦逝去了，伊身朗有啥东西随梦一起被带走了。惊慌之下，伊拿起打火机，点起一根蜡烛，顺手又点了根香烟，试图再回想起梦中的画面。
迷迷糊糊中，伊默默对自噶刚，现状并伐一定是真实呃。
爱情，格就是爱情。
微信号 :白辛苦
沪语短篇小说连载
● 扫码关注我
历史文章：