顶级作家(拾)——白辛苦咖啡馆
老清老早爬起来，顶级作家发现自噶身朗厢有了点变化，他甚至感觉到血管里呃血好像流动了更强劲有力，伊无意识呃被昨涅呃梦支配着。伊庆幸昨涅能做到格只梦，愿意格能被支配。伊感到蛮扎劲，啊蛮有趣，伊受到了鼓舞，并且有了信心。
伊比平常起来勒早，早饭啊没切，踏好脚踏车，穿行勒洒满冬日阳光呃马路朗，直奔“白辛苦”咖啡馆。
伊每天要到法租界切咖啡。用伊自噶讲法，从来没勒勒法租界以外呃地方切过咖啡，哪怕只是一路之隔。虽然伊住呃地方远离法租界，但是，伊非常迷恋活跃而刺激呃法租界生活，从来没想过要放弃或者远离。
伊欢喜法租界。此地呃夜里活力十足，有交关老有情调呃西餐店、酒吧、咖啡馆，还有交关时装店、帽子店、鞋子店。美女帅哥川流不息，当然，伊只关心美女，伐管是上海美女还是外地美女。格一切，让伊自得其乐，心满意足。
伊欢喜一嘎头坐了安福路武康路口呃“白辛苦咖啡馆”门口，脚跷黄天霸，一杯咖啡，或者一杯啤酒，一包香烟加一只打火机，用眼睛，从来来往往美女中拣出伊欢喜呃，幻想伊再过几分钟就要进入伊拉呃生活，搀好手，一道逛马路。有辰光，伊用脑子跟牢伊拉，跟到某只墨擦乌黑呃弄堂里，美女转过头，朝牢伊微微一笑，然后，消失勒勒温暖呃黑暗中。反正瞎想想，没宁晓得，或者刚伊想入非非。
此地呃黄昏霞气迷宁，越是迷宁越是会让伊有挥之不去呃孤寂。如果没朋友请伊切饭或者是请伊喝一杯，伊啊只好荡荡看看，寻只面店，切碗拉面，加只荷包蛋。再脚踏车一踏，回去困高。在暮色中虚度并不灿烂呃年华，一夜中最美好呃辰光。
武康路是条伐长呃马路，一头连牢华山路，另一头连牢淮海路，单行道，马路两边侪是梧桐树还有花园洋房，安静，平常没啥宁呃。前两年，武康路开了只冰激凌店，一夜之间，生意飞上天，每天排队，队伍好从武康路店门口一直排到复兴西路，再打只弯。看啊看伐懂。伊刚，格种事体只会发生勒法租界。
法租界以外呃地方，勒勒伊眼睛里，侪是乡下，侪伐好称作为上海。去一次辛庄或浦东，伊侪认为是出差，需要带好充电宝和剃须刀。对上海以外呃地方，伊是一点兴趣啊没。
但是伊向往巴黎，向往伦敦，并迷恋东京，问伊为啥，伊刚，伊只去过格三只地方。至于其他地方，就像伊对沈从文一样，一无所知。
现实生活吸引伊，同时伊又被现实生活所控制，使伊满怀焦虑，充满矛盾。伊无法意识到伊格种冷暖交替呃双重人格，伊刚，格就是伊呃的格局，大中见小，小中见大。
咖啡没切几口，阴天了，要落雨呃样子。伊看看外面，心生惘然，曾几何时，一事无成，多少呃销魂欢愉侪已经变成前尘往事，不堪回首。
伊呃思路被走进“白辛苦咖啡馆”呃两个穿着漂亮呃小姑娘打断。突然之间，伊领会到一个事实，所有呃快乐侪是人为强调呃结果，一定要将混乱呃生活打造了有腔调。既然欢喜Apple，格么就要盯牢伊，女宁嘛，就格点花头经。
伊微信Apple，虽然有自信，但是，啊没抱啥希望，匹是伐是问一声。伊问伊有空一道切中饭伐，伊刚，附近有一家黄鱼面馆，黄鱼新鲜，面好切，价钿实惠，性价比比金茂大厦还要高。隔特两分钟，Apple回复刚，好呀，正好勒勒外头办事体，中朗空档，定好辰光，店里碰头。
爽气了伐得了。
历史文章：
Send to Author