作勒胡天野地呃女宁 ——《顶级作家》连载之拾肆
顶级作家呃初恋是技校里同班同学，长得相当好看，高个子，长脚，一根马尾巴，欢喜穿粉红色衣裳，眉目清秀，不粗俗。
开学第一天顶级作家就铆牢伊了。老师排位置，伊坐了初恋后头，一根马尾巴墨赤黑，哈长。伊上课开小差，就白相格根马尾巴。后来么，顶级作家就写情书八伊，还约伊看电影，劈情操。格辰光伊倒是蛮大方呃，反正钞票侪是爷娘八呃，出手比现在大方多了。饭菜票、零用钿、压岁钿夯不郎当统统用光。食堂里切饭，伊帮初恋买大排骨、百叶结烧肉，伊自嘎切汤，冬瓜汤，番茄蛋汤，有啥汤切啥汤；伊帮初恋买肉馒头，自噶切菜馒头。一学期下来，自噶瘦特交关。
格辰光就开始行nike了，白鞋子，一只红钩子，一双要卖八十几块，伊没嘎许多钞票，买伐动呀。初恋过生日，伊牙齿一咬，买了双狼牌，四十几块，看上去，啊蛮弹眼落睛呃。生日格天早朗厢，伊拎好狼牌，等了校门口，要八初恋惊喜。过特一歇，初恋来了，穿了一双白颜色新鞋子，顶级作家一看，是一双nike。初恋看了看伊呃狼牌，有点尴尬，正好走过来一个闺密女同学，就搭顶级作家刚，伊明朝过生涅，送八伊好来。
顶级作家乃自噶搞了神魂颠倒，初恋一点啊伐当回事体，看上去好像木知木觉，其实宁嘎心里老清桑呃，又伐是戆度，装戆呀。虽然有辰光初恋似乎啊会用一丝感激来回报伊呃爱慕之情，但是，手，肯定是伐八伊搀呃，香面孔？想啊伐要想。初恋刚，香面孔要八爷娘骂呃。
开始辰光初恋没完全拒绝顶级作家，对伊有点小兴趣。有辰光初恋会得惹伊，搓伊，嘲伊，有辰光还会虐待伊，其实就是没奈伊当回事体，乃伊掇掇掼掼，召之即来，挥之即去，反正切足上风。宁嘎毕竟长了漂亮，顶级作家勒勒下风头朗，极其被动，经常报之以无奈呃幽怨眼神。
初恋曾经带八伊过交关奇妙呃开心辰光，同时啊带八伊交关精神折磨；惹出交关刚伐清桑呃尴尬事体，还有交关伐度伐小呃麻烦事体。用现在呃刚法，就是作呀，作得来，胡天野地。
有一趟，伊拉去切生煎馒头。大家侪晓得，切生煎馒头要蘸点醋，初恋刚，要勒勒醋里厢滴两滴酱油。伊要讨好初恋，只好听闲话，拎起隔壁台子呃酱油瓶，一抖豁，倒了三滴。初恋看看伊，光火了，刚，我明明叫侬滴两滴酱油，侬为啥多一滴，太咸，伐切了。面孔一板，筷子一掼，声音哈响，立起来，别转屁股就要跑。旁边台子交关宁看牢伊拉，顶级作家面孔涨了血血红，哈坍招势，火气哈度，心里偷偷骂了句册那，真想冲上去，八初恋辣辣两记尼光。
还有一趟，两界头荡淮海路，走到襄阳公园门口，切力了，初恋刚，进去寻只长凳休息一歇，最好闭闭眼睛，困特一歇。顶级作家刚，册那，多困有啥困头啦，西特有的好困来。乃么好了，初恋伐开心了，翻毛枪了，马路边朗一坐，一刻钟没睬伊。伊晓得初恋格脾气，格辰光要太平点，伐要去惹伊，过特一歇就好了。伊啊算蛮拎得清，闷声伐响，等了旁边东看看西望望。
正好马路旁边有只小猫，饿了哇哇乱叫，跑到伊面前，伊就寻牢格只小猫白相。乃么，初恋发声音了，嗲悠悠刚，侬跟格只猪头三白相做啥啦？伊看看初恋，刚，达令，侬看看清桑好伐，格只是猫，伐是猪猡。初恋哼了一记，刚，怪伐？我又没帮侬刚闲话，我勒勒帮猫刚呀。
格记伊胸哈闷。
顶级作家总算晓得，女宁是哪能作法呃。后来，伊一直号称自噶老懂女宁呃，三个字，“作”、“嗲”、“精”，就是格能总结出来呃，侪是初恋校路子校出来呃。
隔手，没多少辰光，初恋刚，侬对我老好呃，谢谢侬，阿拉还是做朋友更加好。初恋刚伊真呃对顶级作家没感觉，伐爱伊。因为，初恋发现，当伊离开顶级作家身边，马上就会得乃伊忘记特，忘记了清清桑桑，心甘情愿地接受别呃男生邀请，去切排挡，去看电影，去跳交谊舞，去谈情说爱。
两年就格能老快过去了。顶级作家总结了一下，送八自噶八个字，一场闹剧，草草收场。
历史文章：