天天混勒法租界——《顶级作家》连载之拾伍
毕业后，虽然没谈成功朋友，但是，顶级作家还是心伐西，跟初恋断断续续保持电话联系。
直到有一天。
格天半夜里，初恋打电话八伊，初恋刚伊要去法国了，明朝一早呃飞机。伐是巴黎，是诺曼底。因为，伊寻了只法国男宁，比伊度廿三岁，长了像踢足球呃普拉蒂尼，老是老了点，但是还是蛮帅呃，胸毛腊腊黄，密密麻麻呃，长到喉咙口，像永远穿了件马海毛绒线衫，而且伊桑活邪气好。初恋刚，侬是男宁，格侬懂呃呀。
顶级作家听了咳，蛮伤心呃，刚，侬就是寻了只法国乡下宁。
初恋刚，乡下宁就乡下宁，哪能啦，侬是伐是切伐着葡萄刚葡萄酸啊？侬以为，只有男宁要色宜啊，做女宁一样呃呀，色宜一趟是一趟。诺曼底靠海边，海边侪是沙滩，漂亮了伐得了，没啥宁呃，想做啥就做啥，想哪能做就哪能做。初恋还刚，伊买了交关宁参、西洋参，到法国，烧汤，好好叫八法国男宁补补身体。
电话挂特，顶级作家突然意识到，自噶跟初恋呃缘分算是彻彻底底到头了。伐好算失恋，但是感觉比失恋还失恋。伊反复告诫自噶，最终还是让自噶接受了格只事实。伊困伐着了，陷入纠结，老早呃饭菜票、零用钿、压岁钿，统统掼了黄浦江里，买了只炮仗让只法国乡下人放特，册那，啥名堂，想想就一包气。格种事体，本来是伐可原谅啊，但是，已经原谅伊了。
格辰光么网络，么微信，也么e-mail，只有国际长途电话，但是没电话号码，初恋，像今朝夜到的月亮一样，消失了。
法国变成了顶级作家没去过呃伤心地，对法国的向往变成了伊心里厢呃童话和幻想，变成了伊的精神粮食，伊晓得，初恋已经变成了一只影子，勒勒伊脑子里晃来晃去，碰伐着，摸伐着，而格些侪让伊无法适应现实生活。涅结总归要过呃，如果伐彻底打碎格种么名堂呃幻想，伊就废特了。伊切力，撒度。并伐是生离死别，才是爱之苦涩。
伊想到了法租界。勒勒上海，特法国最搭界呃地方，就是法租界。
从此以后，顶级作家就乃法租界当作了伊呃初恋，当作伊呃女宁，法租界就是伊心中的法兰西，能够八伊带来力量。勒勒格种无形呃力量驱使下，伊就天天混勒法租界，到处奔波，但是，格能做，啥呃目的？伊伐晓得。似乎只是为奔波而奔波，混伐出啥花头经。
乃么，顶级作家开始自暴自弃了。老早子，伊相信爱情，爱情就是一切，现在爱情变成了撩妹妹。
往事，已经逐渐淡忘。伐管哪能，总归算是伊美好呃青春时光，伐刻骨，但铭心。伊关照自噶，下趟勒勒女宁身朗，用情千万伐要太深，钞票千万伐要乱用。
马路朗，一部车子开过，灯光从顶级作家面孔朗闪烁而过，但是，没照亮伊呃面孔。
生活，除了切饭困高，还包括一整天的所思所想。
历史文章：